ଚାନ୍ଦବାଲି,୧୨ା୧(ଅଶୋକ ପଣ୍ଡା): ରାଜ୍ୟ ସରକାରଙ୍କ ଅବହେଳାରୁ ଅବହେଳିତ ହୋଇ ପଡ଼ିଥିବା କନିକା ବାଲିଦ୍ୱୀପରେ ଜାତୀୟ ପତାକା ଉତ୍ତୋଳନ ହୋଇଛି। କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ପବିତ୍ର ୭୬ତମ ଗଣତନ୍ତ୍ର ଦିବସର ଅବ୍ୟବହିତ ପୂର୍ବରୁ ଦ୍ୱୀପରେ ଏହି ପତାକା ଉତ୍ତୋଳନ ହୋଇଛି। ଭାରତୀୟ ନେଭି ରାଜ୍ୟ ସରକାରଙ୍କ ମେରାଇନ ପୋଲିସ ଓ ମତ୍ସ୍ୟ ବିଭାଗର ସାଗରମିତ୍ରଙ୍କ ସହଯୋଗରେ ଏହା ଅନୁଷ୍ଠିତ ହୋଇଛି। ଧାମରା ମୁହାଣରେ ବଙ୍ଗୋପସାଗର ମଧ୍ୟରେ ଏହିପରି କେତେକ ଦ୍ୱୀପ ସ୍ଥାନୀୟ ଭାଷାରେ ଚଢ଼ା ଅବହେଳିତ ଅବସ୍ଥାରେ ଥିବାର ଖବର କେନ୍ଦ୍ର ଗୃହ ବିଭାଗ ପାଖରେ ପହଞ୍ଚିଛି। ଗୃହ ବିଭାଗର ନିର୍ଦ୍ଦେଶରେ ଉପକୂଳ ଅଞ୍ଚଳରେ ଥିବା ସମସ୍ତ ଦ୍ୱୀପକୁ ଏହି ଅଧିକାରୀମାନେ ଯାଇ ତଥ୍ୟ ସଂଗ୍ରହ କରିବା ସହ ସରକାରଙ୍କୁ ଅବଗତ କରାଇବେ। ଏହି ସମସ୍ତ ଦ୍ୱୀପକୁ ସରକାର ନିଜ ହେପାଜତକୁ ଆଣିବା ସହ ଆଗାମୀ ଦିନରେ କିପରି ଏହି ଦ୍ୱୀପପୁଞ୍ଜ ଲୋକାଭିମୁଖୀ ହୋଇ ପାରିବ ସେ ନେଇ କେନ୍ଦ୍ର ସରକାର ବହୁ ଯୋଜନା ହାତକୁ ନେଉଛନ୍ତି। ଏହାକୁ ଦୃଷ୍ଟିରେ ରଖି ଭାରତୀୟ ନେଭିର କେତେକ ଅଫିସର ଧାମରା ମେରାଇନ ଥାନାଧିକାରୀଙ୍କ ସହ ଯୋଗାଯୋଗ କରି ଏକ ସ୍ପିଡ୍ ବୋଟରେ କନିକା ବାଲିଦ୍ୱୀପରେ ପହଞ୍ଚିଥିଲେ। ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଫଟୋ ଚିତ୍ର ଥିବା ସାଇନବୋର୍ଡ ଲଗାଇବା ସହ ଧାମରା ମେରାଇନ ଥାନାଧିକାରୀ କୃଷ୍ଣଚନ୍ଦ୍ର ଜାନି ଜାତୀୟ ପତାକା ଉତ୍ତୋଳନ କରିଥିଲେ। ଏହି ପତାକା ଉତ୍ତୋଳନ ସମୟରେ ଭାରତୀୟ ନେଭିର ଅଫିସର, ଧାମରା ସାମୁଦ୍ରିକ ଥାନାର କର୍ମଚାରୀ, ସାଗରମିତ୍ର ଶ୍ରୀକୃଷ୍ଣ ବେହେରା, ବିଜୟ ମାଝୀ, ଅଜୟ ବେହେରା ପ୍ରମୁଖ ଉପସ୍ଥିତ ଥିଲେ।
ସୂଚନାଯୋଗ୍ୟ, ୧୨ ଶହ ଏକର ପରିମିତ ଏହି ବାଲିଦ୍ୱୀପଟି ଏକ ଅନ୍ସର୍ଭେଡ ଅଞ୍ଚଳ ଅଟେ। ଏଠାରେ ପ୍ରାୟ ୪ଶହ ୫୦ ଏକର ଜମିରେ ଲୁଣା ଜଙ୍ଗଲ ରହିଛି। ୧୯୮୭ରେ ଧାମରା ଉପକୂଳରେ ଥିବା ବାଲିଦ୍ୱୀପଗୁଡ଼ିକର ସର୍ଭେ ହୋଇ ଖତିୟାନ ପ୍ରସ୍ତୁତ ହୋଇଥିବା ବେଳେ କୌଣସି କାରଣରୁ କନିକା ବାଲି ରାଜ୍ୟ ସରକାର ତଥା ଚାନ୍ଦବାଲି ତହସିଲର ଜମିଜମା ସଂକ୍ରାନ୍ତୀୟ ରେକର୍ଡଭୁକ୍ତ ହୋଇନାହିଁ।
କୋଲାକାତା ପୋର୍ଟଟ୍ରଷ୍ଟର ସୀମା ସମ୍ପ୍ରସାରଣ ବେଳେ ଏହାର ମାଲିକାନାକୁ ନେଇ ପଶ୍ଚିମବଙ୍ଗ ଓ ଓଡିଶା ସରକାରଙ୍କ ମଧ୍ୟରେ ୨୦୦୫ ମସିହାରୁ ବିବାଦ ଲାଗି ରହିଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶରେ କେନ୍ଦ୍ର ସରକାରଙ୍କ ହସ୍ତକ୍ଷେପ ଫଳରେ ୨୦୧୩ରୁ ବିବାଦ ଥମିଥିଲେ ମଧ୍ୟ ଓଡ଼ିଶା ସରକାରଙ୍କର ସେଟଲ୍ମେଣ୍ଟ ଓ ଲ୍ୟାଣ୍ଡ ସର୍ଭେ ବିଭାଗ ପକ୍ଷରୁ ଅଦ୍ୟାବଧି ଏହାର ରେକର୍ଡପତ୍ର ପ୍ରସ୍ତୁତ ହୋଇନାହିଁ। ଏ ଦିଗରେ ରାଜ୍ୟ ସରକାର ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।
