କେନ୍ଦୁଝର,୨ା୮(ନରେଶ ଚନ୍ଦ୍ର ପଟ୍ଟନାୟକ): ବୁଧବାର ଲଗାଣ ବର୍ଷାରେ କେନ୍ଦୁଝର ସୀମା ଜୁଡ଼ିଆ ଘାଟିରେ ଭୂସ୍ଖଳନ ହୋଇଛି। ପାହାଡ଼ରୁ ମାଟି, ଗଛଲତା ସହିତ ବଡ଼ ପଥର ଖଣ୍ଡ ୪୯ ନଂ ଜାତୀୟ ରାଜପଥ ଉପରେ ପଡ଼ିବାରୁ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଥିଲା। ଏକ ମିନି ଟ୍ରକ୍ ଉପରେ ପଥର ଖଣ୍ଡ ପଡ଼ିବାରୁ ଗାଡ଼ିଟି କ୍ଷତିଗସ୍ତ ହୋଇ ଅଟକି ରହିଥିଲା। ଗାଡ଼ିରେ ଥିବା ଡ୍ରାଇଭର ଏବଂ ହେଲପର ଅଳ୍ପକେ ରକ୍ଷା ପାଇଛନ୍ତି।
ଜାତୀୟ ରାଜପଥର ରେସ୍କ୍ୟୁ ଟିମ୍ ପଥର ଉଠାଇବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଥିଲା। ଜୁଡିଆ ଘାଟିରେ କୌଣସି ଧନଜୀବନ ନଷ୍ଟ ହୋଇ ନ ଥିଲେ ବି ଭୟର ବାତାବରଣ ସୃଷ୍ଟି ହୋଇଛି। ଏହି ଘାଟିରୁ ବର୍ଷା ହେଲେ ଏଭଳି ଅତଡ଼ା ଖସୁଥିଲେ ହେଁ ସ୍ଥାୟୀ ସମାଧାନ କରାଯାଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ଅତଡ଼ା ନ ଖସିବା ପାଇଁ ବହୁ ଅର୍ଥ ବ୍ୟୟରେ ତାର ଜାଲି ବିଛା ଯାଇଥିଲେ ହେଁ ସେ ସବୁ ଛିଣ୍ଡି ଯାଉଛି । ଫଳରେ ପୂର୍ବ ଭଳି ମାଟି ଓ ପଥର ଖସୁଥିବାରୁ ଲୋକମାନେ ଭୟଭୀତ ହୋଇ ଯାତାୟାତ କରୁଛନ୍ତି। ସଠିକ୍ ମାନର ତାରଜାଲି ବିଛା ଯାଉ ନ ଥିବାରୁ ଏଭଳି ଅବସ୍ଥା ବାରମ୍ବାର ଉପୁଜିଛି ବୋଲି ଅଭିଯୋଗ ହେଉଛି।
