ନୂଆଦିଲ୍ଲୀ,୮।୯(ପି.ଟି.): ଜାତୀୟ ଶିକ୍ଷା ନୀତି(ଏନ୍ଇପି)-୨୦୨୦ ଆତ୍ମନିର୍ଭର ଭାରତ ନିର୍ମାଣ କରିବା ଦିଗରେ କାର୍ଯ୍ୟ କରୁଛି। ଏହା ଆତ୍ମନିର୍ଭର ଭାରତର ଲକ୍ଷ୍ୟ ପୂରଣ କରିବାରେ ବେଶ୍ ସହାୟକ ହୋଇପାରିବ ବୋଲି ଶିକ୍ଷା ନୀତି ଉପରେ ସୋମବାର ଆୟୋଜିତ ରାଜ୍ୟପାଳ ସମ୍ମିଳନୀ ଉଦ୍ଘାଟନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ଭିଡିଓ କନ୍ଫରେନ୍ସ ଜରିଆରେ ଆୟୋଜିତ ସମ୍ମିଳନୀକୁ ସମ୍ବୋଧିତ କରି ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି ଯେ, ଏକବିଂଶ ଶତାବ୍ଦୀର ଆଶା- ଆକାଂକ୍ଷା ଓ ଆବଶ୍ୟକତା ଅନୁଯାୟୀ ଜାତୀୟ ଶିକ୍ଷା ନୀତି ଦେଶବାସୀ ବିଶେଷକରି ଯୁବଗୋଷ୍ଠୀକୁ ଆଗକୁ ଆଗେଇ ନେବାରେ ବେଶ୍ ସକ୍ଷମ ହେବ। ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ଦେଶର ଆକାଂକ୍ଷାକୁ ପୂରଣ କରିବା ପାଇଁ ଶିକ୍ଷା ନୀତି ଏବଂ ଶିକ୍ଷା ବ୍ୟବସ୍ଥା ଏକ ଗୁରୁତ୍ୱପୂର୍ଣ୍ଣ ମାଧ୍ୟମ। ନୂତନ ଶିକ୍ଷା ନୀତିରେ ପଢ଼ିବା ପରିବର୍ତ୍ତେ ଶିକ୍ଷଣ ଉପରେ ଧ୍ୟାନ ଦିଆଯିବା ସହ ପାଠ୍ୟକ୍ରମ ବାହାରେ ଗଭୀର ଚିନ୍ତାଧାରାକୁ ଗୁରୁତ୍ୱ ଦେବାର ବ୍ୟବସ୍ଥା କରାଯାଇଛି। ଏହି ନୀତି ପ୍ରକ୍ରିୟା ଅପେକ୍ଷା ଅଧିକ ଉତ୍ସାହ, ବ୍ୟବହାରିକ ଏବଂ କାର୍ଯ୍ୟଦକ୍ଷତା ଉପରେ ଗୁରୁତ୍ୱ ଦେଇଛି। କେନ୍ଦ୍ର ସରକାର, ରାଜ୍ୟ ସରକାର ଓ ଶିକ୍ଷା ବ୍ୟବସ୍ଥା ଦ୍ୱାରା ସମ୍ପୃକ୍ତ ସମସ୍ତ ବ୍ୟକ୍ତିବିଶେଷ ଏହି ଶିକ୍ଷାନୀତି ସହିତ ଜଡ଼ିତ। ହେଲେ ଏହା ମନେରଖିବାକୁ ହେବ ଯେ, ଶିକ୍ଷାନୀତି ଉପରେ ଅନ୍ୟମାନଙ୍କ ହସ୍ତକ୍ଷେପ ନ ରହିବା ଆବଶ୍ୟକ ବୋଲି ମୋଦି କହିଛନ୍ତି। ପୂର୍ବର ଶିକ୍ଷାନୀତି ଅନୁସାରେ ଜଣେ ଛାତ୍ର +୨ରେ ଏକ ନିର୍ଦ୍ଧିଷ୍ଟ ବିଭାଗ(ଷ୍ଟ୍ରିମ୍)କୁ ବାଛିବାକୁ ବାଧ୍ୟ ହେଉଥିଲା। ଯାହାକି ତାକୁ ବୁଝିବାରେ ଅଧିକ ସମୟ ଲାଗି ଯାଉଥିଲା। ଏହି ସମସ୍ୟାଗୁଡ଼ିକର ସମାଧାନ ନୂଆ ଶିକ୍ଷାନୀତିରେ କରାଯିବାକୁ ଚେଷ୍ଟା କରାଯାଇଛି। ପିଲାଟିଏ ତା’ର ନିଜର ସୁବିଧା ଅନୁସାରେ ବିଷୟ ନେଇ ପଢ଼ିପାରିବ। ଏପରି କି ନୂଆ ଶିକ୍ଷାନୀତିରେ କମ୍ ବୟସରେ ପିଲାମାନଙ୍କୁ ଧନ୍ଦାମୂଳକ ଶିକ୍ଷା ପ୍ରତି ମନୋନିବେଶ କରିବାକୁ ସୁଯୋଗ ଦିଆଯାଇଛି, ଯାହାଫଳରେ ଯୁବାବସ୍ଥାରେ ସେମାନେ ଆତ୍ମନିର୍ଭର ହେବା ସହ ଏକ ସୁନ୍ଦର ଜୀବନ ଯାପନ କରିପାରିବେ ବୋଲି ମୋଦି କହିଛନ୍ତି।
ଉଚ୍ଚତର ଶିକ୍ଷାକୁ ବାସ୍ତବତାରେ ରୂପାନ୍ତରିତ କରିବାରେ ରାଜ୍ୟପାଳଙ୍କ ଭୂମିକାକୁ ନେଇ ଏନ୍ଇପି-୨୦୨୦ ଶୀର୍ଷକ ସମ୍ମିଳନୀ ଶିକ୍ଷା ମନ୍ତ୍ରଣାଳୟ ଦ୍ୱାରା ଆୟୋଜନ କରାଯାଇଛି। ଦୀର୍ଘ ୩୪ବର୍ଷ ପରେ ଏକବିଂଶ ଶତାବ୍ଦୀର ପ୍ରଥମ ଶିକ୍ଷାନୀତି ଭାବେ ଏନ୍ଇପି-୨୦୨୦କୁ ମଞ୍ଜୁରୀ ମିଳିଛି। ଗତ ଜୁଲାଇ ୨୯ରେ କେନ୍ଦ୍ର କ୍ୟାବିନେଟ ଜାତୀୟ ଶିକ୍ଷାନୀତି-୨୦୨୦କୁ ମଞ୍ଜୁରୀ ଦେଇଛି। ଉଭୟ ବିଦ୍ୟାଳୟ ଓ ଉଚ୍ଚତର ଶିକ୍ଷା କ୍ଷେତ୍ରରେ ବ୍ୟାପକ ସଂସ୍କାର ଆଣିବା ଏନ୍ଇପି-୨୦୨୦ର ଲକ୍ଷ୍ୟ ଅଟେ। ଭାରତକୁ ଏକ ସମାନତା ଏବଂ ଚଳଚଞ୍ଚଳ ଜ୍ଞାନଭିିତ୍ତିକ ସମାଜ ଭାବେ ଗଢ଼ିତୋଳିବା ହେଉଛି ନୂଆ ଜାତୀୟ ଶିକ୍ଷାନୀତିର ଉଦ୍ଦେଶ୍ୟ। ଭାରତକୁ ପ୍ରତ୍ୟକ୍ଷ ଭାବେ ଏକ ବିଶ୍ୱ ଶକ୍ତିରେ ରୂପାନ୍ତରିତ କରିବା ପାଇଁ ଏହି ଶିକ୍ଷାନୀତିରେ ଗୁରୁତ୍ୱ ଦିଆଯାଇଛି। ଗ୍ରାମାଞ୍ଚଳର ଜଣେ ଶିକ୍ଷକ ହୁଅନ୍ତୁ ବା ବଡ଼ ଶିକ୍ଷାବିତ୍ ହୁଅନ୍ତୁ, ସମସ୍ତେ ଜାତୀୟ ଶିକ୍ଷାନୀତି ଉପରେ ଦୃଷ୍ଟି ରଖିଛନ୍ତି। ସମସ୍ତଙ୍କର ଭାବନା ଯେ, ନୂଆ ଶିକ୍ଷାନୀତିରେ ହୋଇଥିବା ପରିବର୍ତ୍ତନ ଉଚିତ ଏବଂ ସମୟୋପଯୋଗୀ ଅଟେ। ଆଜି ଦ୍ରୁତ ପରିବର୍ତ୍ତନଶୀଳ ଚାକିରି, ଭବିଷ୍ୟତର କାର୍ଯ୍ୟ ପ୍ରଣାଳୀ ଉପରେ ବିଶ୍ୱ ଆଲୋଚନା କରୁଛି। ତେଣୁ ଭବିଷ୍ୟତର ଆବଶ୍ୟକତା ଅନୁଯାୟୀ ଏହି ନୀତି ଦେଶର ଯୁବବର୍ଗଙ୍କୁ ନୂଆ ଜ୍ଞାନ ଏବଂ କୌଶଳ ଉଭୟ ଦିଗରେ ପ୍ରସ୍ତୁତ କରିବାରେ ସହାୟକ ହେବ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି। ଏହି ରାଜ୍ୟପାଳ ସମ୍ମିଳନୀରେ ସବୁ ରାଜ୍ୟର ଶିକ୍ଷାମନ୍ତ୍ରୀ, ବିଶ୍ୱବିଦ୍ୟାଳୟର କୁଳପତି ଏବଂ ବରିଷ୍ଠ ଅଧିକାରୀମାନେ ଯୋଗଦେଇଥିଲେ।
