ବାସୁଦେବପୁର,୨୮ା୯(ନାରାୟଣ ପ୍ରସାଦ ବାରିକ)ଭଦ୍ରକ ଜିଲା ବାସୁଦେବପୁର ଇରମ ମେଳଣ ପଡ଼ିଆଠାରେ ବ୍ରିଟିଶ ଫୌଜଙ୍କ ଗୁଳିରେ ଶହୀଦ ହୋଇଥିବା ସଂଗ୍ରାମୀଙ୍କ ଉଦ୍ଦେଶ୍ୟରେ ସ୍ମୃତି ଦିବସ ପ୍ରତିବର୍ଷ ପାଳିତ ହୋଇଥାଏ। ଚଳିତ ବର୍ଷ ଗୁରୁବାର ସ୍ମୃତିଦିବସ ଅବସରରେ ରାଜ୍ୟପାଳ ଗଣେଶୀ ଲାଲ ଶହୀଦଙ୍କୁ ଶ୍ରଦ୍ଧାଞ୍ଜଳି ଦେବା କାର୍ଯ୍ୟକ୍ରମ ରହିଥିବା ବେଳେ ପ୍ରଥମ ମହିଳା ଶହୀଦ ପରୀ ବଓ୍ବୋଙ୍କ ପ୍ରତିମୂର୍ତ୍ତି ସ୍ଥାପନ ହେବ। ଦିବସ ପାଳନ ନେଇ ପୋଲିସ ଓ ପ୍ରଶାସନ ତତ୍ପର ଥିବା ବେଳେ ଅଞ୍ଚଳ ଚଳଚଞ୍ଚଳ ହୋଇପଡ଼ିଛି।
ଯେ, ୧୯୪୨ ସେପ୍ଟେମ୍ବର ୨୮ରେ ରକ୍ତତୀର୍ଥ ଇରମ ମେଳନ ପଡ଼ିଆରେ ଲୋମହର୍ଷଣକାରୀ ଗୁଳିକାଣ୍ଡ ହୋଇଥିଲା। ସ୍ବାଧୀନତା ଆଣିବା ପାଇଁ ବାସୁଦେବପୁର ତଥା ନଦୀଘେର ଅଞ୍ଚଳର ୫ ହଜାରରୁ ଊର୍ଦ୍ଧ୍ୱ ସଂଗ୍ରାମୀ ପଡ଼ିଆଠାରେ ଇଂରେଜ ସରକାରଙ୍କ ବିରୋଧରେ ଏକଜୁଟ ହୋଇ ସଭା କରୁଥିବା ବେଳେ ବ୍ରିଟିଶ ଫୌଜ ସଂଗ୍ରାମୀଙ୍କ ଉପରକୁ ଅଚାନକ ଗୁଳିବର୍ଷଣ କରିଥିଲେ। ଗୁଳିରେ ୨୯ ଜଣ ସଂଗ୍ରାମୀ ଶହୀଦ ହୋଇଥିବା ବେଳେ ୫୬ରୁ ଊର୍ଦ୍ଧ୍ୱ ଗୁରୁତର ହୋଇଥିଲେ। ଏହି ଐତିହାସିକ ଇରମ ଗୁଳିକାଣ୍ଡକୁ ଦ୍ୱିତୀୟ ଜାଲିଆନାୱାଲାବାଗ ହତ୍ୟାକାଣ୍ଡ ଭାବେ ଆଖ୍ୟା ଦିଆଯାଏ। ଶହୀଦ ପୀଠର ପୂର୍ଣ୍ଣ ବିକାଶ ପାଇଁ ରାଜ୍ୟ ସରକାର ୨୦୧୪-୧୫ରେ ରାଜ୍ୟ ପର୍ଯ୍ୟଟନ ସ୍ଥଳର ମାନ୍ୟତା ଦେଇଥିଲେ। ଏଥିସହ ସଂସ୍କୃତି, ପର୍ଯ୍ୟଟନ ବିଭାଗ ପ୍ରଦତ୍ତ ଅର୍ଥରେ ପୀଠର ଉନ୍ନତୀକରଣ ହୋଇଥିବା ବେଳେ ଚଳିତବର୍ଷ ଏହି ପୀଠକୁ ମୁଖ୍ୟମନ୍ତ୍ରୀ ଉନ୍ନୟନ ଯୋଜନାରେ ସାମିଲ କରାଯାଇ ବିକାଶ କାର୍ଯ୍ୟ ଚାଲୁରହିଛି। ଚଳିତ ବର୍ଷ ପୀଠର ୮୧ ତମ ବାର୍ଷିକ ଉତ୍ସବରେ ମୁଖ୍ୟ ଅତିଥିଭାବେ ରାଜ୍ୟପାଳ ଯୋଗଦେବା କାର୍ଯ୍ୟକ୍ରମ ଥିବା ବେଳେ ପୋଲିସ ପ୍ରଶାସନ ଚଳଚଞ୍ଚଳ ହୋଇପଡ଼ିଛି। ଅତିଥିମାନେ ପୂର୍ବାହ୍ନ ୧୧ଟା ବେଳେ ଶ୍ରଦ୍ଧାଞ୍ଜଳି ଦେବା ସହ ସାଧାରଣ ସଭାରେ ଉଦ୍ବୋଧନ ଦେବା କାର୍ଯ୍ୟକ୍ରମ ରହିଛି।
ଭାରତ ଛାଡ଼ ଆନ୍ଦୋଳନରେ ଶହୀଦ ହୋଇଥିବା ସଂଗ୍ରାମୀଙ୍କ ମଧ୍ୟରୁ ପରୀ ବେୱା ହେଉଛନ୍ତି ପ୍ରଥମ ମହିଳା ଶହୀଦ। ବିଳମ୍ବରେ ହେଲେ ମଧ୍ୟ ତାଙ୍କର ଏକ ପୂର୍ଣ୍ଣ ଅବୟବ ପ୍ରତିମୂର୍ତ୍ତି ଶହୀଦ ସ୍ମୃତି ଦିବସରେ ଉନ୍ମୋଚିତ ହେବ। ସେହିପରି ଶହୀଦଙ୍କ ମଧ୍ୟରୁ ବିଜୁଳି ଦାସ ହେଉଛନ୍ତି ସର୍ବକନିଷ୍ଠତମ ଶହୀଦ ବାଳକ। ବ୍ରିଟିଶ ଫୌଜଙ୍କ ପୋଷାକରେ ପରିସ୍ରାକରି ଜାଳିଦେବାକୁ ଉଦ୍ୟମ କରିଥିବା ସଂଗ୍ରାମୀ ମଣି ବେଜ, ବ୍ରିଟିଶ ଫୌଜଙ୍କୁ ଗମେଈ ନଦୀରେ ଡଙ୍ଗାରେ ପାରକରାଇ ଦେଇ ନ ଥିବା ନାଉରିଆ କୁଶ ତରାଇ ଏହି ଅଞ୍ଚଳ ପାଇଁ ଗୌରବ ଅଟନ୍ତି।
ଶହୀଦ ଓ ସଂଗ୍ରାମୀଙ୍କ ପରିବାରର ଆର୍ଥିକ, ସାମାଜିକ ଚିତ୍ର ବଦଳାଇବା ସହ ପୀଠର ପୂର୍ଣ୍ଣ ବିକାଶ ଦିଗରେ ଉଭୟ ରାଜ୍ୟ ଓ କେନ୍ଦ୍ର ସରକାର ଦୃଷ୍ଟିଦେବାକୁ ବାସୁଦେବପୁରବାସୀ ଦାବି କରିଛନ୍ତି।
