ରାୟଗଡ଼ା ଅଫିସ,୪ା୧୧: ଗୁଜରାଟ ଝୁଲାପୋଲ ଭୁଶୁଡ଼ିବା ପରେ ଜାତୀୟ ରାଜପଥ ବିଭାଗର ଚେତା ପଶିଛି। ଦୀର୍ଘଦିନ ଧରି ଅବହେଳିତ ଏବଂ ବିପଜ୍ଜନକ ଅବସ୍ଥାରେ ରହିଥିବା ରାୟଗଡ଼ା ଓଭରବ୍ରିଜ୍ର ମରାମତି ପାଇଁ ବିଭାଗୀୟ ଅଧିକାରୀ ତପତ୍ରତା ପ୍ରକାଶ କରିଛନ୍ତି। ବୁଧବାର ଭୁବନେଶ୍ୱରରୁ ଟେଷ୍ଟିଂ ଟିମ୍ ଆସି ଉକ୍ତ ଓଭରବ୍ରିଜ୍ର ସ୍ଥିତି ଯାଞ୍ଚ କରିଛନ୍ତି।
ଭୁବନେଶ୍ୱର ସ୍ଥିତ ଘରୋଇ ସଂସ୍ଥା ନିୟୁଜେନ୍ ପ୍ରାଇଭେଟ୍ ଲିମିଟେଡକୁ ଟେଷ୍ଟିଂ ଦାୟିତ୍ୱ ଦିଆଯାଇଛି। ସଂସ୍ଥାର ଯନ୍ତ୍ରୀ ବିକାଶ ବେହେରା ନିଜ ଟିମ୍ ସହ ରାୟଗଡ଼ା ଆସି ରିବାଉଣ୍ଡିଂ ହାମର୍ ଟେଷ୍ଟିଂ କରିଛନ୍ତି ା ଫ୍ଲାଏ ଓଭର ବିଶେଷ କ୍ଷତି ହୋଇ ନ ଥିବା ଏବଂ ମରାମତି କରାଯାଇପାରିବ ବୋଲି ଜାତୀୟ ରାଜପଥ ବିଭାଗ କନିଷ୍ଠ ଯନ୍ତ୍ରୀ ଭଞ୍ଜ କିଶୋର ସିଂ ସୂଚନା ଦେଇଛନ୍ତି। ୧୦ ଦିନ ମଧ୍ୟରେ ଅନ୍ୟ ଏକ ଟିମ୍ ପୁଣି ଆସି ଏହାର ଲୋଡ୍ ଟେଷ୍ଟ ଏବଂ ନନ୍ ଡେଷ୍ଟ୍ରକ୍ଟିଭ୍ ଟେଷ୍ଟ କରିବେ ବୋଲି ସେ ସୂଚନା ଦେଇଛନ୍ତି ା
ପ୍ରକାଶଯୋଗ୍ୟ, ରାୟଗଡ଼ାକୁ ପଡ଼ୋଶୀ ଆନ୍ଧ୍ର ପ୍ରଦେଶ ତଥା ସହରର ଏପାଖରୁ ସେପାଖକୁ ସଂଯୋଗ ପାଇଁ ରହିଥିବା ଏହି ଏକମାତ୍ର ଫ୍ଲାଏ ଓଭର ବିପଜ୍ଜନକ ଅବସ୍ଥାରେ ରହିଛି ା ପ୍ରତ୍ୟେକ ଦିନ ଏହା ଉପର ଦେଇ ହଜାର ହଜାର ସଂଖ୍ୟାରେ ଯାନବାହନ ଚଳାଚଳ କରୁଛି। ହେଲେ ଜାତୀୟ ରାଜପଥ ବିଭାଗର ରକ୍ଷଣାବେକ୍ଷଣ ଅଭାବ ଯୋଗୁ ଏହାର ଅବସ୍ଥା ଖରାପ ହୋଇଛି। ପୂର୍ବରୁ ରେଳଲାଇନ୍ ଦେଇ ଯାତାୟତର ସୁବିଧା ଥିଲ। ହେଲେ ଟ୍ରେନ୍ ଚଳାଚଳ ଯୋଗୁ ବିଭିନ୍ନ ଆକସ୍ମିକ ଦୁର୍ଘଟଣା ପରେ ୧୯୯୯ ରେ ଏହି ଫ୍ଲାଏଓଭର ନିର୍ମାଣ କରାଯାଇଥିଲା। ପରବର୍ତ୍ତି ସମୟରେ ସହର ଦେଇ ଯାଇଥିବା ମୁଖ୍ୟ ସଡ଼କ ଜାତୀୟ ରାଜପଥ ଭାବେ ଘୋଷଣା ହୋଇ ୩୨୬ ନଂ ଜାତୀୟ ରାଜପଥରେ ମିଶିଥିଲା। ୨୦୧୮ରେ ଏହି ଫ୍ଲାଏ ଓଭରର ରକ୍ଷଣାବେକ୍ଷଣ ଦାୟିତ୍ୱ ଜାତୀୟ ରାଜପଥ ବିଭାଗକୁ ହସ୍ତାନ୍ତର ହୋଇଥିଲା। ୨ଶହ ମିଟରର ଫ୍ଲାଏ ଓଭରରେ ହଜାର ହଜାର ଛୋଟ ବଡ଼ ଗର୍ତ୍ତ ସୃଷ୍ଟି ହୋଇଛି। ଏଭଳିକି ବ୍ରିଜର ଛାତରେ ରହିଥିବା ଚାନେଲ ପ୍ଲେଟ ଗୁଡ଼ିକ ବାହାରି ଦେଖାଗଲାଣି। ଫଳରେ ଅଞ୍ଚଳବାସୀ ଭୟଭୀତ ଅବସ୍ଥାରେ ରହିଛନ୍ତି। କନିଷ୍ଠ ଯନ୍ତ୍ରୀ ସିଂ ସୂଚନା ଅନୁଯାୟୀ ୨୦୧୯-୨୦ ରେ ଫ୍ଲାଏଓଭର ଏବଂ ଜେକେପୁର ସ୍ଥିତ ନାଗାବଳୀ ନଦୀ ବ୍ରିଜ୍ ମରାମତି ପାଇଁ ୨୧ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ଏହା ପରଠାରୁ ଅନ୍ୟ କୌଣସି ଅନୁଦାନ ଆସିନାହିଁ। ଏହାର ପ୍ରକୃତ ରକ୍ଷଣାବେକ୍ଷଣ ଏବଂ ମରାମତି ନେଇ ମନ୍ତ୍ରୀ, ଏମପି, ପୂର୍ବତନ ରାଜ୍ୟସଭା ସଦସ୍ୟ ପ୍ରମୁଖ ଜାତୀୟ ରାଜପଥ ବିଭାଗକୁ ଅବଗତ କରାଇଥିଲେ ମଧ୍ୟ ବିଭାଗୀୟ ଅଧିକାରୀ ଚୁପ୍ ରହିଥିଲେ। ଫଳରେ ଜନ ଅସନ୍ତୋଷ ବଢ଼ିବାରେ ଲାଗିଥିଲା। ଏବେ ଶୀଘ୍ର ଏହାର ମରାମତି ହେବ ବୋଲି ଅଞ୍ଚଳବାସୀ ଆଶା ରଖିଛନ୍ତି।
