ବଲାଙ୍ଗୀର ଅଫିସ/ପାଟଣାଗଡ଼,୨୫ା୫ (ଡି.ଏନ୍.ଏ.): ବଲାଙ୍ଗୀର ଜିଲା ପାଟଣାଗଡ଼-ତମିଆଁ ରାସ୍ତାର ତମିଅଁା ଛକ ନିକଟରେ ବୁଧବାର ପୂର୍ବାହ୍ନ ପ୍ରାୟ ସାଢ଼େ ୧୧ଟାରେ ରାଜ୍ୟ ସଭା ସଦସ୍ୟ ନିରଞ୍ଜନ ବିଶିଙ୍କ କାର୍ ଧକ୍କାରେ ଜଣେ ସ୍କୁଟି ଆରୋହୀଙ୍କ ମୃତ୍ୟୁ ଘଟିଛି। ମୃତକ ହେଲେ ଇନ୍ଦପୁର ଗ୍ରାମର ଟଙ୍କଧର ବିଶ୍ୱାଳ(୩୫)। ମିଳିଥିବା ସୂଚନା ଅନୁସାରେ, ସାଂସଦ ବିଶି ଇନୋଭା କାର (ଓଡି ୦୩ ଏକ୍ସ ୪୬୧୩)ରେ ପାଟଣାଗଡ଼ରୁ ଲରମ୍ଭା ଯାଉଥିବାବେଳେ ବିପରୀତ ଦିଗରୁ ଆସୁଥିବା ସ୍କୁଟି (ଓଡି ୦୩ ଡି ୭୬୦୯) ସହ ଧକ୍କା ହୋଇଥିଲା। ସ୍କୁଟିରେ ଥିବା ଟଙ୍କଧର ଗୁରୁତର ଆହତ ହୋଇଥିଲେ। ପୋଲିସ ଘଟଣାସ୍ଥଳରୁ ଆହତ ଟଙ୍କଧରଙ୍କୁ ପାଟଣାଗଡ଼ ଉପଖଣ୍ଡ ହସ୍ପିଟାଲ ଆଣିଥିଲେ।
ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଦୁର୍ଘଟଣା ଘଟିବା ପରେ ଲରମ୍ଭା ପୋଲିସ କାର ଏବଂ ସ୍କୁଟିକୁ ଥାନାକୁ ନେଇଛି। ଦୁର୍ଘଟଣା ସମୟରେ ସାଂସଦ ବିଶି କାରରେ ବସିଥିଲେ ବୋଲି ପ୍ରଚାର ହେଉଥିବାବେଳେ ସେ ଏହାକୁ ଖଣ୍ଡନ କରିଛନ୍ତି। ଦୁର୍ଘଟଣା ସମୟରେ ସେ ଉକ୍ତ ଗାଡ଼ିରେ ନ ଥିଲେ। ସେତିକିବେଳେ ସେ ତାଙ୍କ ପାଟଣାଗଡ଼ସ୍ଥିତ ଘରେ ରହିଥିଲେ ଏବଂ କାର ତାଙ୍କ ଗଁା କୁତୁର୍ଲା ଅଭିମୁଖେ ଯାଉଥିଲା ବୋଲି ବିଶି କହିଛନ୍ତି। ଏହି ଦୁର୍ଘଟଣାକୁ ନେଇ ସେ ମର୍ମାହତ ଏବଂ ଦୁଃଖିତ ବୋଲି କହିବା ସହ ମୃତ ଟଙ୍କଧର ତାଙ୍କର ଜଣେ ସମ୍ପର୍କୀୟ ପୁତୁରା ହେବେ ବୋଲି କହିଛନ୍ତି। ଅପରାହ୍ଣରେ ବିଶି ଇନ୍ଦପୁରରେ ପହଞ୍ଚତ୍ ମୃତକଙ୍କ ପରିବାରବର୍ଗଙ୍କୁ ସମବେଦନା ଜଣାଇଥିବା କହିଛନ୍ତି। ରେଡ୍କ୍ରସ ତରଫରୁ ମୃତକଙ୍କ ପରିବାରକୁ ପାଟଣାଗଡ଼ ପ୍ରଶାସନ ୩୦ ହଜାର ଟଙ୍କା ସହାୟତା ଦେଇଥିବା ତହସିଲଦାର ଲକ୍ଷ୍ମଣ ମାଝି ସୂଚନା ଦେଇଛନ୍ତି । ଲରମ୍ଭା ଥାନା ପୋଲିସର ପ୍ରତିକ୍ରିୟା ମିଳିପାରି ନାହିଁ।
