କାଏମା,୨୧ା୨(ଡି.ଏନ୍.ଏ.): ପ୍ରଧାନମନ୍ତ୍ରୀ ଆବାସ ଯୋଜନା ରାମଚନ୍ଦ୍ର ପରିଡାଙ୍କ ପାଇଁ ସାତ ସପନ ହୋଇଛି। ବୃଦ୍ଧ ବୟସରେ ରାମଚନ୍ଦ୍ରଙ୍କ ଜୀବନ ଭଙ୍ଗାଘରେ ଦୁର୍ଦ୍ଦଶା ଭିତରେ ବିତୁଛି। ଧର୍ମଶାଳା ଥାନା ଅନ୍ତର୍ଗତ ମିର୍ଜାପୁର ଗ୍ରାମପଞ୍ଚାୟତ ଗୋବିନ୍ଦରାମପାଟଣାରେ ରାମଚନ୍ଦ୍ରଙ୍କ ଘର। ପରିବାର କହିଲେ ସେ ଆଉ ତାଙ୍କ ସ୍ତ୍ରୀ ସରସ୍ବତୀ। ପୁଅ କୈଳାସ ଅଲଗା ହୋଇ ଅନ୍ୟତ୍ର ରହୁଛନ୍ତି। ଦିନବେଳା ରାମଚନ୍ଦ୍ର ଗୁହାଳ ଘରେ ରହୁଥିବା ବେଳେ ରାତିି ସମୟରେ ଘରପିଣ୍ଡାରେ ଶୁଅନ୍ତି। ନିର୍ବାଚନ ସମୟରେ ବିଭିନ୍ନ ପ୍ରତିଶ୍ରୁତି ମିଳିଥିବା ବେଳେ ଏବେ ତାହା ପାଣିର ଗାର ହୋଇଛି ବୋଲି ରାମଚନ୍ଦ୍ର କହିଛନ୍ତି। ସରସ୍ବତୀ ୨ ମାସ ହେବ ଭତ୍ତା ପାଉନାହାନ୍ତି। ଏଥିପାଇଁ ସେ ପଞ୍ଚାୟତ କାର୍ଯ୍ୟାଳୟକୁ ଦୌଡ଼ି ଦୌଡ଼ି ନୟାନ୍ତ ହୋଇସାରିଛନ୍ତି। ଭତ୍ତା ମିଳୁ ନ ଥିବାରୁ ବହୁକଷ୍ଟରେ ଜୀବନ ବିତୁଛି। ଆବାସ ଯୋଜନାରେ ନାମ ମଧ୍ୟ ନାହିଁ। କୌଣସି ଗରିବ ଦୁଃଖକଷ୍ଟରେ ଏବଂ କଚ୍ଚା ଘର ରହିବ ନାହିଁ ବୋଲି ସରକାର କହୁଥିବାବେଳେ ରାମଚନ୍ଦ୍ରଙ୍କ କ୍ଷେତ୍ରରେ ଏହା ଓଲଟା ହୋଇଛି।
