ସୌରମଣ୍ଡଳ ଏବେ ସୁଦ୍ଧା ମଣିଷ ସମାଜ ପାଇଁ ଏକ ଅସରନ୍ତି ରହସ୍ୟମୟ ।
ପୃଥିବୀ ସୂର୍ଯ୍ୟ ଚାରିପଟେ ବୁଲିବା ସହିତ ନିଜ ଚାରିପଟେ ମଧ୍ୟ ବୁଲୁଥାଏ, ଯେଉଁଥିପାଇଁ ଦିନରାତି ହୋଇଥାଏ। ତେବେ ବିଭିନ୍ନ ସ୍ଥାନରେ ଦିନରାତିର ସମୟସୀମା ଭିନ୍ନ ଭିନ୍ନ ହୋଇଥାଏ। କିନ୍ତୁ ଏମିତି ବି କିଛି ବିସ୍ମୟ ସ୍ଥାନ ରହିଛି; ଯେଉଁଠାରେ ସୂର୍ଯ୍ୟ ଅସ୍ତ ହୁଅନ୍ତି ନାହିଁ…
ନରଓ୍ବେ : ନରଓ୍ବେର ହାମରଫେଷ୍ଟ ନାମକ ଏକ ସ୍ଥାନରେ ଆର୍କଟିକ୍ ସର୍କଲ ଥିବାରୁ ଏଠାରେ ଖୁବ୍ କମ୍ ସମୟ ପାଇଁ ସୂର୍ଯ୍ୟାସ୍ତ ହେଉଥିବା ସୂଚନା ରହିଛି। ମୁଖ୍ୟତଃ ମେ’ରୁ ଜୁଲାଇ ମାସ ଭିତରେ ଏଠାରେ ସୂର୍ଯ୍ୟାସ୍ତ ଆଦୌ ହୁଏ ନାହିଁ , ଆଉ ଯଦି ବି ହୁଏ ତାହା ମଧ୍ୟ ରାତ୍ରିରେ ହୋଇ ମାତ୍ର ୪୦ ରୁ ୪୫ ମିନିଟ୍ର ବ୍ୟବଧାନ ପରେ ପୁଣିଥରେ ସୂର୍ଯ୍ୟୋଦୟ ହୋଇଯାଏ।
ଫିନ୍ଲ୍ୟାଣ୍ଡ : ଏକାଧିକ ଝରଣା ଓ ଦ୍ୱୀପର ଆକର୍ଷଣରେ ଆକର୍ଷିତ ଫିନ୍ଲ୍ୟାଣ୍ଡର ପ୍ରାକୃତିକ ସୌନ୍ଦର୍ଯ୍ୟ ସତରେ ବେଶ୍ ନିଆରା ଲାଗେ। ତା’ଠୁ ଆହୁରି ନିଆରା ଲାଗେ ଏଠାରେ ସୂର୍ଯ୍ୟାସ୍ତ ହେଉ ନଥିବା ଘଟଣା ସମ୍ପର୍କରେ ଜାଣିଲେ। ଅର୍ଥାତ୍ ଖରାଦିନେ ଏଠାରେ ପ୍ରାୟ ୭୩ ଦିନ ପର୍ଯ୍ୟନ୍ତ ସୂର୍ଯ୍ୟ ଅହରହ ନିଜର କିରଣ ବିଚ୍ଛୁରିତ କରିଥାନ୍ତି। କିନ୍ତୁ ଏହାର ଠିକ୍ ଓଲଟା ହୋଇଥାଏ ଶୀତଦିନେ। ଶୀତଦିନେ ଏଠାରେ ପ୍ରାୟତଃ ଅନ୍ଧାର ଘୋଟିକି ରହିଥାଏ। ସେଥିପାଇଁ ସ୍ଥାନୀୟ ଲୋକେ ଖରାଦିନେ କମ୍ ଓ ଶୀତଦିନେ ଅଧିକ ସମୟ ଶୋଉଥିବାର ଦେଖାଯାଏ। ତେବେ ଏହି ବିରଳ ଦୃଶ୍ୟ ଫିନ୍ଲ୍ୟାଣ୍ଡର ସେହି ସ୍ଥାନରେ ଦେଖାଯାଏ, ଯେଉଁଠାରେ କେବଳ ଆର୍କଟିକ୍ ସର୍କଲ ରହିଛି।
ସ୍ବିଡେନ୍ : କିରୁନା ସ୍ବିଡେନସ୍ଥିତ ଏମିତି ଏକ ସହର, ଯେଉଁଠାରେ ମେ’ରୁ ଅଗଷ୍ଟ ମାସ ମଧ୍ୟରେ ପ୍ରାୟତଃ ଖୁବ୍ କମ୍ ସମୟ ପାଇଁ ସୂର୍ଯ୍ୟାସ୍ତ ହେଉଥିବା ଦେଖିବାକୁ ମିଳିଥାଏ। ସୂଚନାନୁଯାୟୀ, ଏଠାରେ ସୂର୍ଯ୍ୟ ମଧ୍ୟରାତ୍ରିରେ ଅସ୍ତ ହୋଇ ପୁଣି ଭୋର୍ ୪ଟା ବେଳକୁ ଉଦୟ ହୋଇଥାନ୍ତି। ଏଭଳି ବିରଳ ଦୃଶ୍ୟକୁ ଉପଭୋଗ କରିବା ପାଇଁ ଏଠାରେ ପର୍ଯ୍ୟଟକଙ୍କର ବେଶ୍ ଭିଡ଼ ଜମୁଥିବା ମଧ୍ୟ ଦେଖିବାକୁ ମିଳେ।
ଆଲାସ୍କା : ମେ’ ମାସ ଶେଷରୁ ଜୁଲାଇ ମାସ ଶେଷ ପର୍ଯ୍ୟନ୍ତ ଆଲାସ୍କାର ବାରୋ (ଯାହା ଉଟକିୟାଗଓ୍ବିକ୍ ନାମରେ ମଧ୍ୟ ପରିଚିତ )ନାମକ ସହରରେ ସୂର୍ଯ୍ୟାସ୍ତ ହେଉ ନଥିବା ସୂଚନା ମଧ୍ୟ ରହିଛି। କିନ୍ତୁ ଏହାର କିଛିଦିନ ପରେ ଅର୍ଥାତ୍ ଶୀତଦିନେ ଠିକ୍ ଏହାର ଓଲଟା ଦେଖିବାକୁ ମିଳିଥାଏ। ଶୀତ ପଡିବା ମାତ୍ରେ ଏଠାରେ ପାଖାପାଖି ୩୦ ଦିନ ପର୍ଯ୍ୟନ୍ତ ଅନ୍ଧକାର ଘୋଟି ରୁହେ, ଯାହାକୁ ସାଧାରଣତଃ ପୋଲାର୍ ନାଇଟ୍ ବୋଲି କୁହାଯାଇଥାଏ।
ଆଇସ୍ଲ୍ୟାଣ୍ଡ : ଗ୍ରେଟ୍ ବ୍ରିଟେନ୍ ପରେ ଏହା ୟୁରୋପର ଦ୍ୱିତୀୟ ବୃହତ୍ତମ ଦ୍ୱୀପ ଭାବେ ଜଣାଶୁଣା। ତା’ଛଡ଼ା ଏହା ଏମିତି ଏକ ଦେଶ ଯେଉଁଠାରେ ମଶା ଖୁବ୍ କମ୍ ଦେଖାଯାଇଥାନ୍ତି ବୋଲି ସୂଚନା ମଧ୍ୟ ରହିଛି। କୁହାଯାଏ, ମୁଖ୍ୟତଃ ଜୁନ୍ ମାସରେ କୁଆଡେ ଆଇସ୍ଲ୍ୟାଣ୍ଡର କେତେକ ଅଞ୍ଚଳରେ ସୂର୍ଯ୍ୟ ଆଦୌ ଅସ୍ତ ହୁଅନ୍ତି ନାହିଁ। ରାତିରେ ବି ଏଠାରେ ସୂର୍ଯ୍ୟାଲୋକ ଏମିତି ଦେଖାଯାଏ, ଲାଗେ ସତେ ଯେମିତି ଦିନ ହୋଇଗଲାଣି। ଏଭଳି ବିରଳ ଦୃଶ୍ୟ ଦେଖିବାକୁ ହେଲେ ପର୍ଯ୍ୟଟକଙ୍କୁ ଏଠାକାର ଆର୍କଟିକ୍ ସର୍କଲରେ ଥିବା ଆକୁରେୟରୀ ସହର ଏବଂ ଗ୍ରୀମ୍ସୀ ଦ୍ୱୀପକୁ ବୁଲିଯିବାକୁ ହେବ।
କାନାଡ଼ା: ନୁନାବୁତ କାନାଡ଼ାର ଉତ୍ତରପଶ୍ଚିମ ପ୍ରଦେଶରେ ଥିବା ଆର୍କଟିକ୍ ସର୍କଲରୁ ମାତ୍ର ଦୁଇ ଡିଗ୍ରୀ ଉଚ୍ଚତାରେ ଥିବା ଏକ ସ୍ଥାନ, ଯେଉଁଠାରେ ପ୍ରାୟ ତିନି ହଜାର ଲୋକ ବସବାସ କରୁଥିବା ସୂଚନା ରହିଛି। ତଥ୍ୟ ଅନୁଯାୟୀ, ଏଠାରେ ଶୀତଦିନେ କୁଆଡ଼େ ପାଖାପାଖି ୩୦ ଦିନ ପର୍ଯ୍ୟନ୍ତ ଘନ ଅନ୍ଧକାର ଘୋଟିଯାଏ। ଅନ୍ୟପକ୍ଷେ ଗ୍ରୀଷ୍ମଋତୁରେ ପ୍ରାୟ ୨ ମାସ ପର୍ଯ୍ୟନ୍ତ ଏଠାରେ ୨୪ ଘଣ୍ଟା ସୂର୍ଯ୍ୟାଲୋକ ଦେଖାଯିବାର ବିରଳ ଦୃଶ୍ୟ ଅନୁଭବ କରିହୁଏ।