ଦୁନିଆରେ ଅଜବ ଜିନିଷ ସବୁ ଦେଖିବାକୁ ମିଳିଥାଏ। ଯାହା ବିଷୟରେ କେହି ବି କିଛି ଜାଣି ନ ଥାନ୍ତି। ଏହି ଯେମିତି ବିଶ୍ୱର ସବୁଠାରୁ ଶୀତଳ ସ୍ଥାନରେ ଲାଲ୍ ବରଫ ଦେଖିବାକୁ ମିଳିଥାଏ। ଏହାର କାରଣ ବୈଜ୍ଞାନିକଙ୍କୁ ମଧ୍ୟ ଅଛପା ରହିଛି।
ଏହାକୁ ‘ବ୍ଲଡ୍ ଫଲ୍ସ’ର କୁହାଯାଏ। ଯାହାର ରହସ୍ୟ ବର୍ଷ ବର୍ଷ ଧରି ବୈଜ୍ଞାନିକଙ୍କୁ ଚକିତ କରି ରଖିଛି। ପରେ ବୈଜ୍ଞାନିକମାନେ ଏକ ସତ୍ୟ ଆବିଷ୍କାର କରିଛନ୍ତି । ଯାହା ପରେ ଲୋକମାନେ ଜାଣିବାକୁ ପାଇଲେ ଯେ, ଏହା ପ୍ରକୃତରେ ନାଲି ବରଫ କିମ୍ବା ରକ୍ତ ନୁହେଁ। ପ୍ରକୃତିର ସ୍ବତନ୍ତ୍ରତା ହେତୁ ଏହା ହିଁ ହୋଇଥାଏ। ‘ଟେଲର ଗ୍ଲେସିୟର’ ନାମରେ ଏହା ପ୍ରସିଦ୍ଧ। ଆଣ୍ଟାର୍କଟିକାରେ ଏକ ଗ୍ଲେସିୟର ଅଛି, ଯେଉଁଠାରୁ ଲାଲ୍ ରଙ୍ଗ ବାହାରୁଥିବା ଦେଖାଯାଏ। ଏହା ମ୍ୟାକ ମର୍ଡୋ ଡ୍ରାଏ ଭ୍ୟାଲିରେ ରହିଛି। ଏହା ପ୍ରଥମେ ୧୯୧୧ରେ ଆବିଷ୍କୃତ ହୋଇଥିଲା। ଦଶନ୍ଧି ଧରି ବୈଜ୍ଞାନିକମାନେ ଏହାର ରହସ୍ୟ ଖୋଜିବାରେ ନିୟୋଜିତ ଥିଲେ।
ନିକଟ ଅତୀତରେ, ଆଲାସ୍କା ଫେୟାରବ୍ୟାଙ୍କ ବିଶ୍ୱବିଦ୍ୟାଳୟ ଏହି ରହସ୍ୟର ସମାଧାନ କରିଛି। ଅନୁସନ୍ଧାନ ଅନୁଯାୟୀ, ଲାଲ୍ ଗ୍ଲେସିୟର କିମ୍ବା ବରଫ ଆଜିଠାରୁ ନୁହେଁ, ଏହା ପ୍ରାୟ ୧.୫ ମିଲିୟନ ବର୍ଷରୁ ରହିଆସିଛି। ଏହା କ୍ରମାଗତ ଅକ୍ସିଡେସନ କାରଣରୁ ହୋଇଥାଏ। ବାସ୍ତବରେ, ଏହି ଉପତ୍ୟକାରେ ଲୁଣିଆ ପାଣି ଅଛି, ଯେଉଁଥିରେ ଲୌହର ପରିମାଣ ବହୁତ ଅଧିକ। ଏହା ଏକ ବନ୍ଦ ଝରଣାରେ ରହିଛି। ଯେଉଁଠାରେ ସୂର୍ଯ୍ୟକିରଣ କିମ୍ବା ଅମ୍ଳଜାନ ସଠିକ ଭାବରେ ପହଞ୍ଚେ ନାହିଁ। ଏହି କାରଣରୁ ଏଥିରେ ଅମ୍ଳଜାନ ପରିମାଣ ବହୁତ କମ୍ ଅଟେ।
ଯେତେବେଳେ ଜଳର ପ୍ରବାହ ବାୟୁରେ ଥିବା ଅମ୍ଳଜାନ ସଂସ୍ପର୍ଶରେ ଆସେ, ଏଥିରେ ଥିବା ଲୁହା କଳଙ୍କିତ ହୋଇଯାଏ। ଯାହା ହେତୁ ଏହା ଜଳର ରଙ୍ଗକୁ ଲାଲ୍ କରିଦିଏ। ଲୋକମାନେ ଏହି ଅଞ୍ଚଳରେ ରୁହନ୍ତି ନାହିଁ। କାରଣ ଏଠାରେ ପାଗ ଅତ୍ୟଧିକ ଥଣ୍ଡା। ବ୍ଲଡ ଫଲ୍ସରେ ପହଞ୍ଚିବା ପାଇଁ ହେଲିକପ୍ଟର ହେଉଛି ଏକମାତ୍ର ବିକଳ୍ପ। ଯାହା ଆମେରିକାର ମ୍ୟାକ୍ମର୍ଡୋ ଷ୍ଟେଶନରୁ କିମ୍ବା ନ୍ୟୁଜିଲାଣ୍ଡର ସ୍କଟ ବେସ୍ରୁ ମିଳିପାରିବ। ଅନୁସନ୍ଧାନକାରୀମାନେ ଜାଣିବାକୁ ପାଇଛନ୍ତି ଯେ, ସେହି ଜଳରେ ଅନେକ ଜୀବାଣୁ ବାସ କରନ୍ତି, ଯାହା ସମାନ ଲୌହ ଏବଂ ସଲଫେଟ ସାହାଯ୍ୟରେ ବଢ଼ିଥାଏ।
