ସମ୍ବଲପୁର/ବରଗଡ଼,୧୮ା୪(ପ୍ରମୋଦ ବହିଦାର/ପ୍ରେମାନନ୍ଦ ଖମାରୀ): ସମ୍ବଲପୁର ଅଇଁଠାପାଲି ବସଷ୍ଟାଣ୍ଡରେ ଗୁରୁବାର ସନ୍ଧ୍ୟାରେ ବସ୍ ଭିତରେ ଜଣେ ଯାତ୍ରୀଙ୍କ ମୃତ୍ୟୁ ଘଟିଛି। ମୃତ ଯାତ୍ରୀ ଜଣକ ହେଲେ ବରଗଡ଼ ଜିଲା ସୋହେଲା ଥାନା ଅନ୍ତର୍ଗତ କରଣ୍ଡୁଲା ଦାମପାଲି ଗ୍ରାମର କୁଳମଣି କୁମ୍ଭାର(୩୦)। ଗୁରୁବାର ସନ୍ଧ୍ୟାରେ କୁଳମଣି ବରଗଡ଼ ଯିବା ପାଇଁ ଅଇଁଠାପାଲି ନୂଆଁବସ୍ଷ୍ଟାଣ୍ଡରେ ଏକ ଘରୋଇ ବସ୍ରେ ବସିଥିଲେ। ଏହି ସମୟରେ ସେ ହଠାତ ଅସୁସ୍ଥ ହୋଇ ପଡ଼ିଥିଲେ। ଏହାଦେଖି ସହଯାତ୍ରୀମାନେ ତୁରନ୍ତ ପୋଲିସକୁ ଖବର ଦେଇଥିଲେ। ଖବରପାଇ ଅଇଁଠାପାଲି ଥାନା ପୋଲିସ ଘଟଣାସ୍ଥଳରେ ପହଞ୍ଚତ୍ କୁଳମଣିଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ତୁରନ୍ତ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ତାଙ୍କ ଆଧାରକାର୍ଡରୁ ତାଙ୍କ ପରିଚୟ ପାଇ ଏସମ୍ପର୍କରେ ପରିବାର ଲୋକଙ୍କୁ ଖବର ଦେବା ସହ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା। ପରିବାର ଲୋକ ଖବର ପାଇ ରବିବାର ସମ୍ବଲପୁର ପହଞ୍ଚତ୍ଥିଲେ। ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।
ଏନେଇ ମୃତକ କୁଳମଣିଙ୍କ ଭଉଣୀ ମମତା ଅଗ୍ରୱାଲ ତାଙ୍କ ଭାଇଙ୍କୁ ଅତ୍ୟଧିକ ମାଡ଼ ମରାଯାଇଥିବାରୁ ତାଙ୍କର ମୃତ୍ୟୁ ହୋଇଛି ବୋଲି ଏକ ଗୁରୁତର ଅଭିଯୋଗ କରିଛନ୍ତି। ସେ ଅଭିଯୋଗ କରି କହିଛନ୍ତି, ତାଙ୍କ ଭାଇ କୁଳମଣି ବରଗଡ଼ ଜିଲା ୱାର୍ଡ ନମ୍ବର ୧୮ ଅନ୍ତର୍ଗତ ବାନ୍ଦୁଟିକରାର ଜଣେ ବ୍ୟକ୍ତିଙ୍କ ନିକଟରେ ପିକ୍ଅପ୍ ଚାଳକ ଭାବେ କାର୍ଯ୍ୟ କରୁଥିଲେ। ତେବେ ୨ଦିନ ତଳେ ଅନ୍ୟଜଣେ ଚାଳକଙ୍କ ସହ ସେ ବରଗଡ଼ ଜିଲା ଆମ୍ବାଭୋନା ଯାଇଥିବାବେଳେ ତାଙ୍କ ଗାଡ଼ି ଦୁର୍ଘଟଣା ହୋଇଥିଲା। ଖବରପାଇ ଗାଡ଼ି ମାଲିକ ଘଟଣାସ୍ଥଳରେ ପହଞ୍ଚତ୍ କୁଳମଣିଙ୍କୁ ମାଡ଼ ମାରିଥିଲେ। ଏପରିକି ସେ ଅସୁସ୍ଥତା ଅନୁଭବ କରୁଥିଲେ ସୁଦ୍ଧା ଗାଡ଼ି ମାଲିକ ତାଙ୍କୁ ଘରକୁ ଛାଡ଼ି ନ ଥିଲେ ଓ ଅନ୍ୟଜଣେ ଚାଳକଙ୍କ ସହିତ ତାଙ୍କୁ ଉକ୍ତ ଗାଡ଼ିରେ ରାଉରକେଲା ପଠାଇଥିଲେ। ସେଠାରେ ପହଞ୍ଚତ୍ କୁଳମଣି ଗୁରୁବାର ଏକାକୀ ଟ୍ରେନ୍ରେ ସମ୍ବଲପୁର ଆସି ବରଗଡ଼ ଯିବା ପାଇଁ ଏଠାରେ ଉକ୍ତ ବସ୍ରେ ବସିଥିଲେ। ମାତ୍ର ତାଙ୍କର ମୃତ୍ୟୁ ହୋଇଯାଇଛି ବୋଲି ତାଙ୍କ ଉଭଣୀ ଅଭିଯୋଗ କରିଛନ୍ତି। ଏହାକୁ ନେଇ ଅଇଁଠାପାଲି ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ପୋଲିସ କହିଛି।
