ଭୁବନେଶ୍ୱର,୨୬ା୯(ବ୍ୟୁରୋ): ମା’ ଆସୁଛନ୍ତି। ଚଳଚଞ୍ଚଳ ହୋଇପଡ଼ିଛି ରାଜଧାନୀ। ଚାରିଆଡ଼େ ଖୁସିର ମାହୋଲ। କରୋନା ମହାମାରୀ ଯୋଗୁଁ ୨ ବର୍ଷ ନିରାଡ଼ମ୍ବରରେ ପାଳିତ ହୋଇଥିବା ଦୁର୍ଗାପୂଜା ଚଳିତ ବର୍ଷ ମହାଆଡ଼ମ୍ବରରେ ପାଳନ ହେବାକୁ ଯାଉଛି। ଏଥିପାଇଁ ବିଭିନ୍ନ ପୂଜା କମିଟି ପକ୍ଷରୁ ଜୋରଦାର ପ୍ରସ୍ତୁତି ଆରମ୍ଭ ହୋଇଯାଇଛି। ଏହି ଦୌଡ଼ରୁ ବାଦ ପଡ଼ିନି ଚନ୍ଦ୍ରଶେଖରପୁର ଡିଷ୍ଟ୍ରିକ୍ଟ ସେଣ୍ଟର ଓନର୍ସ ଆସୋସିଏଶନ ଦୁର୍ଗାପୂଜା କମିଟି। ଚନ୍ଦ୍ରଶେଖରପୁର ଅଞ୍ଚଳରେ ଅଖଣ୍ଡ ଭାଇଚାରାର ନିଦର୍ଶନ ଦେଖାଉଥିବା ଏହି କମିଟି ଚଳିତ ବର୍ଷ ସର୍ବଧର୍ମ ସମନ୍ବୟର ବାର୍ତ୍ତା ବହନ କରୁଥିବା ଏକ ଆକର୍ଷଣୀୟ ତୋରଣ ନିର୍ମାଣ କରୁଛି, ଯେଉଁଥିରେ ଦେଖିବାକୁ ମିଳିବ ହିନ୍ଦୁ, ମୁସଲମାନ ଓ ଖ୍ରୀଷ୍ଟିଆନ ଧର୍ମ ସଂକେତର ଚିତ୍ର। ଏଥିସହିତ ସମସ୍ତଙ୍କ ଦୁଆର ମୁହଁରେ ପୂର୍ଣ୍ଣ କଳସ ବସିବା ସହିତ ଦୀପ ଜଳା ହେବ। ସହର ଭିତରେ ତିନୋଟି ସମ୍ପ୍ରଦାୟର ମିଳିତ ଭାଇଚାରାକୁ ବଜାୟ ରଖି ୨୦୦୮ ମସିହାରୁ ଡଷ୍ଟ୍ରିକ୍ଟ ସେଣ୍ଟର ଓନର୍ସ ଆସୋସିଏଶନ ମା’ଙ୍କ ପୂଜା ଆରମ୍ଭ କରିଥିଲା। ଆସୋସିଏଶନ୍ ପକ୍ଷରୁ ଚଳିତ ବର୍ଷ ଚାନ୍ଦା ଆଦାୟକୁ ବନ୍ଦ କରିଛି। ମା’ଙ୍କ ମଣ୍ଡପରେ ଏକ ହୁଣ୍ଡି ବସାଯାଇଛି। ସ୍ବ ଇଚ୍ଛାରେ ଯିଏ ଯାହା ଦେବ ତାହା ମା’ଙ୍କ ପୂଜାରେ ଲାଗିବ ବୋଲି ଆସୋସିଏଶନ୍ ପକ୍ଷରୁ କୁହାଯାଇଛି। ମଣ୍ଡପକୁ ସଂଯୋଗ କରୁଥିବା ରାସ୍ତାରେ ଏଲଇଡି ଲାଇଟ୍ ଗେଟ୍ରେ ଲାଗିବା ସହିତ ରଙ୍ଗୀନ ଆଲୋକ ମାଳାରେ ସୁସଜ୍ଜିତ କରାଯିବ। ୧୪ ଫୁଟର ମା’ଙ୍କ ମୃଣ୍ମୟୀ ମୂର୍ତ୍ତି କାମ ଜାରି ରହିଛି। ଏହାକୁ କେନ୍ଦ୍ରାପଡ଼ାର କାରିଗର ପ୍ରଫୁଲ କୁମାର ବେହେରା ନିର୍ମାଣ କରୁଛନ୍ତି। ତୋରଣ ଓ ଆଲୋକ ସଜ୍ଜାର ଦାୟିତ୍ୱ ନେଇଛନ୍ତି ଭୁବନେଶ୍ୱରର କାରିଗର ବ୍ରଜ କିଶୋର ସାହୁ। ଷଷ୍ଠୀଠାରୁ ଦଶମୀ ପର୍ଯନ୍ତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଯୋଜନା ରହିଛି। ଆସୋସିଏଶନ ପକ୍ଷରୁ ପୂଜା ୫ ଦିନ ମଣ୍ଡପ ଓ ଏହାର ଚାରିପାଖ ସଫେଇ କରାଯିବା ସହ ବିଶୋଧନ କରାଯିବ। ସମସ୍ତ ଭକ୍ତଙ୍କ ଘରେ ଚାରା ବଣ୍ଟନ କରାଯିବ। ପାରମ୍ପରିକ ବାଦ୍ୟରେ ଭସାଣି କରି ମା’ଙ୍କୁ ମେଲାଣି ଦିଆଯିବ ବୋଲି କମିଟି ପକ୍ଷରୁ ଜଣାଯାଇଛି।
