ନୂଆଦିଲ୍ଲୀ: ମହାମାରୀ କରୋନା ସଂକ୍ରମଣକୁ ରୋକିବା ଲାଗି କେନ୍ଦ୍ର ସରକାର ନାନାଦି କଟକଣା ଲଗାଇଥିଲେ। ସେ୍ଥିରୁ ଗୋଟିଏ ଥିଲା ରେଳସେବା ବନ୍ଦ। ଦେଶର ପ୍ରମୁଖ ସହରଗୁଡ଼ିକ ମଧ୍ୟରେ ଟ୍ରେନ୍ ଚଳାଚଳକୁ ଠପ୍ କରି ଦିଆଯାଇଥିଲା। ଫଳରେ ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଥିଲେ। ଧିରେ ଧିରେ ପରିସ୍ଥିତି ସ୍ବାଭାବିକ ହେଉଥିବାରୁ ମୁମ୍ବାଇ ଲୋକାଲ ଟ୍ରେନ୍ ଚଳାଚଳ ପୁଣି ଆରମ୍ଭ ହୋଇଛି। ଦୀର୍ଘ ୧୦ ମାସ ପରେ ଏହାକୁ ଅନୁମତି ମିଳିଛି। ଏହି ସମୟରେ ଏଭଳି ଏକ ଫଟୋ ଭାଇରାଲ ହେଉଛି, ଯାହାକୁ ଦେଖିଲେ ଆପଣ ଘଡ଼ିଏ ଚିନ୍ତାରେ ପଡ଼ିଯିବେ। କାରଣ ଫଟୋଟି ହେଲା ଜଣେ ଯାତ୍ରୀଙ୍କର। ଲୋକାଲ୍ ଟ୍ରେନ୍ରେ ଚଢ଼ିବା ପୂର୍ବରୁ ସେ ମୁଣ୍ଡ ନୁଆଁଇ ଟ୍ରେନ୍କୁ ପ୍ରଣାମ କରୁଥିବା ଦେଖାଯାଇଛି। ଏହି ଫଟୋ ବମ୍ବେବାସିନ୍ଦାଙ୍କ ପାଇଁ ଲୋକାଲ ଟ୍ରେନ୍ର ଗୁରୁତ୍ୱକୁ ବୁଝାଉଛି ବୋଲି କୁହାଯାଉଛି।
ବ୍ୟବସାୟୀ ଆନନ୍ଦ ମହିନ୍ଦ୍ରା ମଧ୍ୟ ଏହି ଫଟୋକୁ ଶେୟାର କରି ‘ଭାରତର ଆତ୍ମା.. ମୁଁ ପ୍ରାର୍ଥନା କରୁଛି ଏହାକୁ କେବେ ଆମେ ନ ହଜାଉ’ ବୋଲି ଲେଖିଛନ୍ତି। ସୋସିଆଲ ମିଡିଆ ବ୍ୟବହାରକାରୀ ଏହାକୁ ନେଇ ଭଳିକି ଭଳି ପ୍ରତିକ୍ରିୟା ଦେଉଛନ୍ତି।
