ରାଉରକେଲା ଅଫିସ,୩।୧୦: ପ୍ରେମ ପାଇଁ ପ୍ରେମିକଙ୍କୁ ହତ୍ୟା କରି ଏକ କୋଇଲା ବୋଝେଇ ଟ୍ରେନ ବଗିରେ ଫିଙ୍ଗି ଦିଆଯାଇଥିବା ଅଭିଯୋଗରେ ରାଉରକେଲା ପ୍ଲାଣ୍ଟସାଇଟ୍ ପୋଲିସ ୬ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଫଟାପାଇପ୍ ଅଞ୍ଚଳର ମୂଳବାସିନ୍ଦା ତଥା ଶିବଶଙ୍କର ନଗରରେ ରହୁଥିବା ବିନୋଦ ସିଂ ଓରଫ ବାବୁ (୩୯), ଶିବ ସିଂ ଓରଫ ପାକୁ (୨୬), ଚନ୍ଦନ ସୋନି (୨୩), ବିଶାଲ ରାଠୋର ଓରଫ ପନି (୧୯), ଅଜୟ ସା (୨୨), ରାଜ ସିଂ ଓରଫ ଚକ୍ଲେଟ୍ (୨୫)। ସମସ୍ତ ଅଭିଯୁକ୍ତଙ୍କୁ ରବିବାର କୋର୍ଟଚାଲାଣ କରାଯାଇଛି। ଏହାସହ ହତ୍ୟାରେ ବ୍ୟବହୃତ ୩ଟି ବେସ୍ବଲ ବ୍ୟାଟ୍, ଗୋଟିଏ ଲୁହା ପାଇପ୍, ଠେଙ୍ଗା, ଲୁହା ବାର୍ ସହ ୨ଟି ବାଇକ୍ (ନଂ.ଓଡି୧୪ପି-୫୬୬୨) ଓ ଗୋଟିଏ ନମ୍ବର ବିହୀନ ବାଇକ୍ ଜବତ କରିଛି। ଏହି ଘଟଣାରେ ଅନ୍ୟ ଜଣେ ଅଭିଯୁକ୍ତ ଫେରାର ଅଛନ୍ତି। ତାଙ୍କୁ ଗିରଫ କରିବା ପାଇଁ ତନାଘନା ଚାଲିଛି ବୋଲି ରବିବାର ପ୍ଲାଣ୍ଟସାଇଟ୍ ଥାନା ପରିସରରେ ଅନୁଷ୍ଠିତ ଖବରଦାତା ସମ୍ମିଳନୀରେ ରାଉରକେଲା ଅତିରିକ୍ତ ଏସ୍ପି ବିକ୍ରମ କେଶରୀ ଭୋଇ କହିଛନ୍ତି। ଅତିରିକ୍ତ ଏସ୍ପି ଭୋଇ ସୂଚନା ଦେଇ କହିଥିଲେ, ଶ୍ରୀନିବାସ ରାଓ ଓରଫ ସିନୁ(୧୯) ଗୋପବନ୍ଧୁପାଲି ବସ୍ତିରେ ଏକଟୁଆ ଘର ଭଡା ନେଇ ରହି ସ୍ଥାନୀୟ ପାୱାରହାଉସ୍ ରୋଡ୍ ଅଞ୍ଚଳର ଏକ ଡକି ଶୋରୁମ୍ରେ କାମ କରୁଥିଲେ। ଫଟାପାଇପ୍ ଶିବଶଙ୍କର ନଗର ବସ୍ତିର ଜଣେ ଯୁବତୀ ଓ ଶ୍ରୀନିବାସଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା। ଶ୍ରୀନିବାସ ଗୋଟିଏ ମୋବାଇଲ କିଣି ସମ୍ପୃକ୍ତା ଯୁବତୀଙ୍କୁ ଦେଇଥିଲେ। ଏହାକୁ ଯୁବତୀଙ୍କ ବାପା ବିନୋଦ ବିରୋଧ କରିଥିଲେ। ଶ୍ରୀନିବାସ ଏହାକୁ ଖାତିର ନ କରି ପ୍ରତିଦିନ ବିଳମ୍ବିତ ରାତି ଯାଏ ଯୁବତୀଙ୍କ ସହ କଥାବାର୍ତ୍ତା ହେଉଥିଲେ। ଗତ ସେପ୍ଟେମ୍ବର ୨୪ ତାରିଖ ରାତି ୧୦ଟାରେ ବିନୋଦ ତାଙ୍କର କିଛି ସହଯୋଗୀଙ୍କୁ ଦୁଇଟି ବାଇକ୍ରେ ଶ୍ରୀନିବାସଙ୍କୁ ଗୋପବନ୍ଧୁପାଲିରୁ ଉଠାଇ ଆଣିଥିଲେ। ଏହାପରେ ଫଟାପାଇପ୍ ନିକଟରେ ତାଙ୍କୁ ଲୁହାପାଇପ୍, ବେସବଲ ବ୍ୟାଟ ଓ ଲାଠିରେ ସଂଘବଦ୍ଧ ଆକ୍ରମଣ କରିଥିଲେ। ଫଳରେ ଶ୍ରୀନିବାସଙ୍କ ମୃତ୍ୟୁ ହୋଇଥିଲା। ଅଭିଯୁକ୍ତମାନେ ଧରା ପଡିଯିବା ଭୟରେ ମୃତଦେହକୁ ଏକ କୋଇଲା ଟ୍ରେନ ବଗିରେ ଫିଙ୍ଗି ଦେଇଥିଲେ। ଉକ୍ତ ଟ୍ରେନ୍ ରାୟଗଡ଼ସ୍ଥିତ ଜିନ୍ଦଲ ପ୍ଲାଣ୍ଟରେ କୋଇଲା ଖାଲି କରୁଥିବାବେଳେ ମୃତଦେହ ଦେଖି ରାୟଗଡ ଜିଆରପି ରାଉରକେଲା ଜିଆରପି ପୋଲିସକୁ ଖବର ଦେଇଥିଲା। ଅନ୍ୟପକ୍ଷେ ଶ୍ରୀନିବାସଙ୍କ ବଡ ଭଉଣୀ ଶିବାଙ୍ଗୀ ରାଓ ତାଙ୍କ ଭାଇ ନିଖୋଜ ଥିବା ନେଇ ପ୍ଲାଣ୍ଟସାଇଟ୍ ଥାନାରେ ଗତ ସେପ୍ଟେମ୍ବର ୨୬ ତାରିଖରେ ଅଭିଯୋଗ କରିଥିଲେ। ଏ ନେଇ ପୋଲିସ ଏକ ମାମଲା (ନଂ.୩୮୦/୨୨) ରୁଜୁ କରି ଘଟଣାର ତଦନ୍ତ କରିଥିଲା । ଗତ ୨୭ ତାରିଖରେ ପ୍ଲାଣ୍ଟସାଇଟ୍ ପୋଲିସର ଏକ ସ୍ବତନ୍ତ୍ର ଦଳ ରାୟଗଡ ଯାଇ ଶ୍ରୀନିବାସଙ୍କ ମୃତଦେହକୁ ରାଉରକେଲା ଆଣିଥିଲା। ଏ ନେଇ ରାୟଗଡ଼ ଜିଆରପି ଥାନାରେ ଏକ ଅପମୃତ୍ୟୁ ମାମଲା (ନଂ.୫୯/୨୨) ମାମଲା ରୁଜୁ ହୋଇଛି। ମୃତକଙ୍କ ଶରୀରରେ ବହୁ କ୍ଷତଚିହ୍ନ ଥିବାରୁ ଏହା ଏକ ହତ୍ୟାକାଣ୍ଡ ବୋଲି ଜାଣି ତଦନ୍ତ କରିଥିଲା ଏବଂ ୬ ଅଭିଯୁକ୍ତଙ୍କୁ ଗିରଫ କରିଥିଲା।
