ନୂଆଦିଲ୍ଲୀ, ୨୨ା୩: ୨୦୨୪ ଲୋକ ସଭା ନିର୍ବାଚନ ଲାଗି ଅବଗଣନା ଆରମ୍ଭ ହୋଇଥିବାବେଳେ ଆଞ୍ଚଳିକ ଦଳଗୁଡ଼ିକ ସମେତ ସମସ୍ତ ବୃହତ୍ ବିରୋଧୀ ଦଳ ଭାଜପାକୁ କ୍ଷମତାରୁ ହଟାଇବା ପାଇଁ ବଡ଼ ଧରଣର ରାଜନୈତିକ ଲଢ଼େଇ ପାଇଁ ପ୍ରସ୍ତୁତ ହେଉଛନ୍ତି। ତେବେ ବହୁ ବିରୋଧୀ ଦଳ ମେଣ୍ଟ ୧୯୯୬ ଭଳି ସ୍ଥିତି ସୃଷ୍ଟି କରିବା ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ ବୋଲି ଅନେକେ ମତ ଦେଇଛନ୍ତି। ପ୍ରାୟ ଦୁଇବର୍ଷ ହେଲା ନିର୍ଦ୍ଦିଷ୍ଟ ସମୟ ବ୍ୟବଧାନରେ ବିରୋଧୀ ଦଳଗୁଡ଼ିକ ଏକାଠି ହେଉଛନ୍ତି। ଭାଜପା ଓ ଏହାର ସହଯୋଗୀଙ୍କ ବିରୋଧରେ ଏକାଠି ଲଢ଼ିବା ପାଇଁ ପ୍ରତିଥର ଆଶା ପ୍ରକାଶ ପାଉଛି ଓ ପରେ ତାହା ଫିକା ପଡ଼ିଯାଉଛି। ନିକଟରେ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମ୍ସି ନେତ୍ରୀ ମମତା ବାନାର୍ଜୀଙ୍କୁ ଭେଟିଥିଲେ। ସେମାନେ ଭାଜପା ଓ କଂଗ୍ରେସଠାରୁ ସମଦୂରତ୍ୱ ରକ୍ଷା କରିବା ଲାଗି ସହମତ ହୋଇଥିଲେ। ଏଥିରେ ବିଜୁ ଜନତା ଦଳ ଅଧ୍ୟକ୍ଷ ତଥା ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଭାରତ ରାଷ୍ଟ୍ର ସମିତି ଅଧ୍ୟକ୍ଷ ତଥା ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଓ ଅନ୍ୟ ନେତାମାନଙ୍କୁ ସାମିଲ କରିବା ଲାଗି ମମତା ଯୋଜନା କରିଛନ୍ତି। ମହାରାଷ୍ଟ୍ରର କଂଗ୍ରେସ, ଏନ୍ସିପି, ଶିବସେନା-ୟୁବିଟି ମେଣ୍ଟ (ମହାବିକାଶ ଅଘାଡ଼ି) ସ୍ଥିତି ଉପରେ ନଜର ରଖିଛି। ସେହିପରି ଆନ୍ଧ୍ରପ୍ରଦେଶ, ତାମିଲନାଡୁ, କେରଳ, କର୍ନାଟକର ବିଭିନ୍ନ ଦଳ, ବିହାରର ଜେଡିୟୁ ଏବଂ ଆର୍ଜେଡି, ଆମ୍ ଆଦ୍ମୀ ପାର୍ଟି ଓ ଅନ୍ୟ ଆଞ୍ଚଳିକ ଦଳଗୁଡ଼ିକ ମଧ୍ୟ ସମ୍ଭାବ୍ୟ ମେଣ୍ଟକୁ ନେଇ ଅନୁଧ୍ୟାନ ଚଳାଇଛନ୍ତି, ଯାହା ଏକ ଦ୍ୱନ୍ଦ୍ୱାତ୍ମକ ସ୍ଥିତି ସୃଷ୍ଟି କରିଛି। କଂଗ୍ରେସ ବିନା ବିରୋଧୀ ମେଣ୍ଟ ସମ୍ଭବ ନୁହେଁ ବୋଲି ଏହି ଦଳ ସମେତ ଏନ୍ସିପି ଏବଂ ଶିବସେନା-ୟୁବିଟି ପକ୍ଷରୁ କୁହାଯାଇଛି। ଦେଶରେ ଏପର୍ଯ୍ୟନ୍ତ ଭାଜପା ବିରେଧୀ ହାଓ୍ବା ଆସି ନ ଥିବା ସେନା-ୟୁବିଟି ନେତା ସ୍ବୀକାର କରିଥିବାବେଳେ ଖୁବ୍ଶୀଘ୍ର ଲୋକଙ୍କ ମାନସିକତାରେ ପରିବର୍ତ୍ତନ ଆସିବ ବୋଲି କହିଛନ୍ତି।
