ବ୍ରହ୍ମପୁର,୨୭।୪(ସୁବାସ ଚନ୍ଦ୍ର ପାଢ଼ୀ): ମହାରାଜା କୃଷ୍ଣଚନ୍ଦ୍ର ଗଜପତି(ଏମକେସିଜି) ମେଡିକାଲର ବିଭିନ୍ନ ବିଭାଗରେ କାର୍ଯ୍ୟରତ ସିନିୟର୍ ରେସିଡେଣ୍ଟ(ଏସ୍ଆର) ତଥା ଟ୍ୟୁଟରମାନେ ଘରୋଇ ମେଡିକାଲରେ ରୋଗୀ ଚିକିତ୍ସା କରୁଥିବା ନେଇ ବାରମ୍ବାର ଅଭିଯୋଗ ଆସୁଛି।
ଏହା ଉପରେ ଅଂକୁଶ ଲଗାଇବା ପାଇଁ ଏମ୍କେସିଜି କର୍ତ୍ତୃପକ୍ଷ କଡା ଆଭିମୁଖ୍ୟ ଗ୍ରହଣ କରିଛନ୍ତି। ଏମ୍କେସିଜିରେ କାର୍ଯ୍ୟରତ ଏସଆର୍, ଜେଆର୍ ଓ ଟ୍ୟୁଟର୍ ଘରୋଇ ଡାକ୍ତରଖାନାରେ ରୋଗୀ ଚିକିତ୍ସା କରିବେ ନାହିଁ ବୋଲି ସତ୍ୟପାଠ ଦାଖଲ କରିବେ। ଯଦି କେହି ଘରୋଇ ଡାକ୍ତରଖାନାରେ ଚିକିତ୍ସା କରୁଥିବା ଜଣାପଡେ, ତେବେ ତାଙ୍କୁ ଚାକିରିରୁ ବାହାର କରାଯିବାକୁ ନିଷ୍ପତ୍ତି ହୋଇଛି। ଏ ସମ୍ପର୍କରେ ଏମକେସିଜି ମେଡିକାଲ କଲେଜ ଓ ହସ୍ପିଟାଲର ଅଧ୍ୟକ୍ଷ ତଥା ଡିନ ପ୍ରତ୍ୟେକ ବିଭାଗ ମୁଖ୍ୟଙ୍କୁ ଚିଠି ଜାରି କରିଛନ୍ତି।
ଏହା ସହିତ ସେହି ଡାକ୍ତରମାନଙ୍କ କାର୍ଯ୍ୟଶୈଳୀ ରିପୋର୍ଟ ପ୍ରଦାନ କରିବାକୁ ମଧ୍ୟ କୁହାଯାଇଛି। କିଛିଦିନ ତଳେ ଜଣେ ଏସଆର୍ ଗୋଇଲୁଣ୍ଡିସ୍ଥିତ ଏକ ଘରୋଇ ଡାକ୍ତରଖାନାରେ ଚିକିତ୍ସା କରୁଥିବା ନେଇ ଜଣାପଡିଥିଲା। ସେଥିନେଇ ଏମକେସିଜିର ଡିନ ତାଙ୍କୁ କାରଣ ଦର୍ଶାଅ ନୋଟିସ ଜାରି କରିଥିଲେ। ଏବେ ପ୍ରତ୍ୟେକ ଏସଆର୍, ଜେଆର୍ ଓ ଟ୍ୟୁଟର୍ ଘରୋଇ ଡାକ୍ତରଖାନାରେ କାମ କରିବେ ନାହିଁ ବୋଲି ଲିଖିତ ଆକାରରେ ଦାଖଲ କରିବେ। ପ୍ରତ୍ୟେକ ବିଭାଗୀୟ ମୁଖ୍ୟ ଏହି କାର୍ଯ୍ୟକୁ ତଦାରଖ କରିବାକୁ ଡିନ ତଥା ଅଧ୍ୟକ୍ଷ ନିର୍ଦ୍ଦେଶନାମା ଜାରି କରିଛନ୍ତି।
