ଭବାନୀପାଟଣା,୨୫।୮(ଉତ୍ତମ କୁମାର ଦାଶ): ଦିନେ ସେ ପୁନେରେ ସିଭିଲି ଇଞ୍ଜିନିୟର ଭାବେ ଏକ ବେସରକାରୀ କମ୍ପାନୀରେ କାମ କରି ମୋଟା ଅଙ୍କର ଦରମା ପାଉଥିଲେ। ହେଲେ ଲକ୍ଡାଉନରେ ଘରକୁ ଚାଲି ଆସି ସମନ୍ବିତ ଚାଷ ପ୍ରଣାଳୀ ପ୍ରତି ଆକର୍ଷିତ ହୋଇଥିଲେ। ଫଳରେ ସେ ଚାକିରି ଛାଡି ବିନିଯାଇଥିଲେ ଜଣେ ସଫଳ ଚାଷୀ। ବର୍ତ୍ତମାନ ସେ ନିଜ ୨୨ ଏକର ସ୍ଥାନରେ ବିଭିନ୍ନ ପ୍ରକାରର ସମନ୍ବିତ ପ୍ରଣାଳୀର ଚାଷ କରି ଜିଲାରେ ଚର୍ଚ୍ଚାକୁ ଆସିଛନ୍ତି। ଏପରିକି କୃଷି ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ମଧ୍ୟ ତାଙ୍କ ଫାର୍ମ ପରିଦର୍ଶନରେ ଆସିବା ସହ ଆଗକୁ ବଢିବା ପାଇଁ ଉତ୍ସାହିତ କରିଥିଲେ। ଏହି ଯୁବ ଚାଷୀ ଜଣକ ହେଉଛନ୍ତି କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ବୋର୍ଡି ଗ୍ରାମର ମନ୍ମଥ ସାହୁ। ପୁନେରେ ୩ ବର୍ଷ ସିଭିଲ ଇଞ୍ଜିନିୟର ଭାବେ ଚାକିରି କରିବା ପରେ ଗତ ଲକ୍ଡାଉନରେ ସେ ଘରକୁ ଚାଲିଆସିଥିଲେ। ଘରେ ଥିବା ସମୟରେ ସେ ସମନ୍ବିତ ଚାଷ ପ୍ରଣାଳୀ ପ୍ରତି ଆକୃଷ୍ଟ ହୋଇଥିଲେ। ପରେ ମନ୍ମଥ ଜୁନାଗଡ ବ୍ଲକ ଦୁନ୍ଦେଲମାଲ ପଞ୍ଚାୟତ ଜଙ୍ଗଳ ନିକଟରେ ଥିବା ସିନାଖୁଣ୍ଟି ଗ୍ରାମରେ ୨୨ ଏକର ଜମି ନିଜ ସାଙ୍ଗରୁ କିଣଥିଲେ। ଏହି ଜମି କ୍ରୟ ପାଇଁ ସେ ଚାକିରିରେ ସଞ୍ଚତ୍ଥିବା ଟଙ୍କା ଓ ନିଜ ଗଁା ବୋର୍ଡିରେ ଥିବା ଜମି ବିକ୍ରି କରିଥିଲେ। ସମନ୍ବିତ ପ୍ରଣାଳୀର ଚାଷ କରିବା ପାଇଁ ସେ ବୋର୍ଡିରୁ ନିଜ ପରିବାର ସହିତ ଚାଲିଆସିଥିଲେ ସିନାଖୁଣ୍ଟିକୁ। ଏବେ ସେ ତାଙ୍କ ଫାର୍ମରେ ବାଇଗଣ, ପାତଳଘଣ୍ଟା, କଲରା, ବୋରବୋଟି, ମରିଚ, ଭେଣ୍ଡି ଆଦି ପନିପରିବା ଚାଷ କରିଥିବାବେଳେ ଶସ୍ୟ ଜାତୀୟ ଫସଲରେ ଧାନ ଓ କପା, ଡାଲି ଜାତୀୟ ଫସଳରେ କାନ୍ଦୁଲ ଓ ବିରି ଚାଷ କରିଛନ୍ତି। ସେହିପରି ମାଛ, ଛେଳି, କୁକୁଡା ଚାଷ ମଧ୍ୟ ତାଙ୍କ ଫାର୍ମରେ କରିଛନ୍ତି। ଏବେ ତାଙ୍କ ଫାର୍ମରେ ୧୨୦ଟି ଦେଶୀ ଛେଳି ଓ ୩ଶହଟି ଦେଶୀ କୁକୁଡା ରହିଛି। ଏହାସହ ମୁଢି ଲିଆ ପାଇଁ ସେ ଏକ କାରଖାନା ମଧ୍ୟ ନିର୍ମାଣ କରିଛନ୍ତି। ଯେଉଁଥିରେ କି ସୁନ୍ଦର ଓ ଉତ୍ତମ ମାନର ମୂଢି ଲିଆ ମଧ୍ୟ ବାହାରୁଛି। ଚାଷ କାମରେ ପରିବାର ଲୋକ ତାଙ୍କୁ ସହଯୋଗ କରୁଥିବାବେଳେ ଗ୍ରାମର ୧୫ଜଣ ଯୁବକ ଓ ମହିଳାଙ୍କୁ ମଧ୍ୟ ଏହାର ଦେଖାଶୁଣା କରିବା ରଖି ରୋଜଗାର ଦେଇଛନ୍ତି। ତାଙ୍କ ଏହି ସଫଳ ଚାଷ କାମ ବିଷୟରେ ଖବର ପାଇ ଗତ ୧୭ ତାରିଖରେ କୃଷି ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ମନ୍ମଥଙ୍କ ଫାର୍ମ ବୁଲି ଦେଖିବା ସହ ଆଗକୁ ବଢିବା ପାଇଁ ଉତ୍ସାହିତ କରିଥିଲେ।
