କୋଚି,୯।୧୦: ପୁରୁଷ ବିବାହିତ ଥିବା ଜାଣି ମଧ୍ୟ ମହିଳା ଯଦି ତାଙ୍କ ସହ ଯୌନ ସମ୍ପର୍କ ଜାରି ରଖିଥାନ୍ତି, ତେବେ ମିଥ୍ୟା ବିବାହ ପ୍ରତିଶ୍ରୁତିରେ ବଳାତ୍କାର ଅଭିଯୋଗକୁ ଗ୍ରହଣ କରାଯିବ ନାହିଁ ବୋଲି କେରଳ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଯୋଡ଼ିଙ୍କ ମଧ୍ୟରେ ଏଭଳି ଯୌନ ସମ୍ପର୍କକୁ କେବଳ ପ୍ରେମ ଓ ଆବେଗ କୁହାଯିବ, କିନ୍ତୁ ବିବାହ ପାଇଁ ମିଥ୍ୟା ପ୍ରତିଶ୍ରୁତି ଆଧାରିତ ବୋଲି କୁହାଯିବ ନାହିଁ। ଜଷ୍ଟିସ୍ କୌସେର ଏଡ଼ାଗାପାଥ୍ଙ୍କ ଖଣ୍ଡପୀଠ ଏଭଳି ରାୟ ଦେଇଛନ୍ତି।
ଅଭିଯୋଗ ଅନୁଯାୟୀ ମହିଳା ଜଣକ ୨୦୧୦ରୁ ଆବେଦନକାରୀଙ୍କ ସହ ଯୌନ ସମ୍ପର୍କ ରଖିଥିଲେ। ପୁରୁଷ ଜଣକ ବିବାହିତ ବୋଲି ସେ ୨୦୧୩ରେ ଜାଣିବାକୁ ପାଇଲେ। ଏହା ସତ୍ତ୍ୱେ ସେ ତାଙ୍କ ସହ ୨୦୧୯ ପର୍ଯ୍ୟନ୍ତ ଯୌନ ସମ୍ପର୍କ ଜାରି ରଖିଥିଲେ ବୋଲି ସ୍ବୀକାର କରିଛନ୍ତି। ତେଣୁ ମିଥ୍ୟା ବିବାହ ପ୍ରତିଶ୍ରୁତି ଦେଇ ପୁରୁଷ ଜଣକ ଯୌନ ସମ୍ପର୍କ ରଖିଥିବା ଅଭିଯୋଗକୁ ଖଣ୍ଡପୀଠ ଖାରଜ କରିଦେଇଛନ୍ତି। ଖଣ୍ଡପୀଠ କହିଛନ୍ତି, ବିବାହ ପ୍ରତିଶ୍ରୁତି ଦେଇ ଯୌନ ସମ୍ପର୍କ ରଖିବା ପରେ ଯଦି ପ୍ରତିଶ୍ରୁତି ଭଙ୍ଗ କରାଯାଏ, ତେବେ ଆଇପିସିର ଧାରା ୩୭୬ରେ ବଳାତ୍କାର ମାମଲା ରୁଜୁ ହୋଇପାରିବ। ଏଠାରେ ମହିଳା ଜଣକ ପୁରୁଷଙ୍କୁ ବିବାହିତ ଜାଣି ମଧ୍ୟ ସମ୍ପର୍କ ରଖିଥିବାରୁ ଏଠାରେ ମିଥ୍ୟା ବିବାହ ପ୍ରତିଶ୍ରୁତିର ଆଳ ଦେଖାଯାଇପାରିବ ନାହିଁ। ଆବେଦନକାରୀଙ୍କ ବିରୋଧରେ ଆଇପିସିର ଧାରା ୩୭୬ ସମେତ, ୪୦୬ ଏବଂ ୪୨୦ରେ ରୁଜୁ ହୋଇଥିବା ମାମଲା ଖାରଜ କରିଦେବାକୁ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି।
