କାଲିମେଳା/ଏମ୍ଭି-୭୯, ୨୩|୧(ଡି.ଏନ.ଏ.) ମାଲକାନଗିରି ଜିଲା କାଲିମେଳା ବ୍ଲକ ତଥା ଏମଭି- ୭୯ ଥାନା ଅନ୍ତର୍ଗତ ତେଳରାଇ ପଞ୍ଚାୟତର ଏମ୍ଭି-୧୨୬ ଗ୍ରାମ ନିକଟସ୍ଥ ଜଙ୍ଗଲରେ ଗୋଟିଏ ପୋଡ଼ିଯାଇଥିବା କାର୍ ପଡ଼ିରହିଥିବା ଦେଖିବାକୁ ମିଳିଛି l ୩୨୬ ଜାତୀୟ ରାଜପଥଠାରୁ ପ୍ରାୟ ୩୦ ମିଟର ଦୂର ଜଙ୍ଗଲିଆ ସ୍ଥାନରେ ଏହି କାର୍ ପଡ଼ିରହିଛି। ନିଆଁ ଲାଗି କାର୍ଟି ସମ୍ପୂର୍ଣ୍ଣ ଭାବେ ପୋଡି ନଷ୍ଟ ହୋଇଯାଇଛି। ଜଙ୍ଗଲରେ ଏପରି ଅବସ୍ଥାରେ ଏକ କାର୍ ଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚତ୍ ତଦନ୍ତ ଆରମ୍ଭ କରିଛି। କାର୍ଟି ସମ୍ପୂର୍ଣ୍ଣ ରୂପେ ଜଳି ଯାଇଥିବା ବେଳେ ଏହାର ନଂ. ଓଡି ୧୦ ଟି-୧୯୨୩ ଲେଖା ରହିଛି। କାର୍ଟି ଏମ୍ଭି-୯୦ ଗ୍ରାମର କଳ୍ପନା ପାଲ୍ଙ୍କ ନାମରେ ରହିଥିବା ଜଣାପଡିଛି। ତେବେ ଜଙ୍ଗଲ ଭିତରକୁ କାର୍ ନେଇ କେଉଁମାନେ ଏପରି ଘଟାଇଛନ୍ତି ତାହା ସ୍ପଷ୍ଟ ହୋଇନାହିଁ। ସୂଚନାଯୋଗ୍ୟ, ଏମ୍ଭି-୯୦ ଗ୍ରାମରୁ ଗତ ୨୦ ତାରିଖ ରାତିରେ କାର୍ଟି ଘରେ ଥିବା ସମୟରେ ଚୋରି ହୋଇଥିବା ନେଇ ୨୧ ତାରିଖରେ କାର୍ ମାଲିକ ପାଲ୍ କାଲିମେଳା ଥାନାରେ ଲିଖିତ ଅଭିଯୋଗ କରିଥିଲେ l ତେବେ ଏହି କାର ଦ୍ୱାରା ଗଞ୍ଜେଇ ଚୋରାଚାଲାଣକୁ ନେଇ ଏପରି ଘଟଣା ଘଟିଥାଇପାରେ ବୋଲି ଆଲୋଚନା ହେଉଛି। ପ୍ରକୃତ ଘଟଣା କଣ ତାହା ତଦନ୍ତ ପରେ ଜଣାପଡିବ ବୋଲି ଥାନା ଅଧିକାରୀ ରଘୁନାଥ ମାଝୀ କହିଛନ୍ତି।
