ପିଲାଦିନର କାର୍ଯ୍ୟକଳାପ ଅନେକ ସମୟରେ ସେମାନଙ୍କ ଭବିଷ୍ୟତକୁ ଦର୍ଶାଇଦେଇଥାଏ। ଠିକ୍ ଯେମିତି କଲରାଡୋର ୯ ବର୍ଷୀୟା କାଇଆ ଆରାଗୋନ। ଏଇ ବୟସରେ ସେ ତିଆରି କରିପାରୁଛନ୍ତି ଅନେକ ପ୍ରକାରର ଡିଜାଇନର୍ ପୋଷାକ। ୨୦୨୧ରେ ତାଙ୍କ ମା’ ତୋନ୍ୟା ତାଙ୍କୁ ସିଲେଇ କରିବା ସିଖାଇଥିଲେ। କାରଣ କାଇଆ ମା’ଙ୍କୁ କହିଥିଲେ, ସେ ବଡ ହେଲେ ଫ୍ୟାଶନ ଡିଜାଇନର୍ ହେବାକୁ ଚାହୁଁଛନ୍ତି। ଏହା ଶୁଣି ମା’ ତୋନ୍ୟା କହିଥିଲେ ବଡ ହେବା ପର୍ଯ୍ୟନ୍ତ ଅପେକ୍ଷା ନ କରି ଏବେଠାରୁ ପୋଷାକ ତିଆରି କରିବା ଆରମ୍ଭ ହେଇଯାଉ। ଆଉ ସେ ଝିଅ କାଇଆକୁ ସିଲେଇ ଶିଖାଇଲେ। ଏବେ କାଇଆ ଡ୍ରେସ୍, ଗାଉନ୍, ଟୁ ପିସ୍ ଭଳି ଅନେକ ଡିଜାଇନର୍ ପୋଷାକ ତିଆରି କରିପାରୁଛନ୍ତି। ପ୍ରାୟ ସବୁ ଡ୍ରେସ୍କୁ ସେ ନିଜ ସାଇଜ୍ ଅନୁସାରେ ତିଆରି କରନ୍ତି। ଆଉ ଡ୍ରେସ୍ଗୁଡିକ କିଭଳି କମ୍ଫର୍ଟେବୁଲ ହେବ ସେଥିପ୍ରତି ସେ ଅଧିକ ଗୁରୁତ୍ୱ ଦିଅନ୍ତି। ଡ୍ରେସ୍ ତିଆରି କରିବା ପରେ ତାକୁ ସେ ପିନ୍ଧି ଘରେ କ୍ୟାଟ୍ ଓ୍ବାକ୍ କରନ୍ତି। ତା’ର ଭିଡିଓ କରି ସୋସିଆଲ ମିଡିଆରେ ଅପଲୋଡ ବି କରନ୍ତି। ଫଳରେ ଏବେ ତାଙ୍କର ଅନେକ ଫ୍ୟାନ ଅଛନ୍ତି। କାଇଆ ଭବିଷ୍ୟତରେ ଜଣେ ପ୍ରଫେଶନାଲ ଓ ନାମକରା ଫ୍ୟାଶନ ଡିଜାଇନର୍ ହେବାକୁ ଆଶା ରଖିଛନ୍ତି।
