ନୂଆଦିଲ୍ଲୀ: କରୋନା ମହାମାରୀ ଦେଶର ଅର୍ଥ ବ୍ୟବସ୍ଥାକୁ ସଙ୍କଟ ସ୍ଥିତିକୁ ଠେଲି ଦେଇଛି। ଏହାର ପ୍ରଭାବ ମଧ୍ୟ ଦେଶର ରିଟେଲ ଶିଳ୍ପ ଉପରେ ପଡ଼ିଛି। ଫଳରେ ଏହି ଶିଳ୍ପ ଆର୍ଥତ୍କ ସଙ୍କଟ ଦେଇ ଗତି କରୁଛି। ସମସ୍ୟାରେ ଥିବା ଏହି ଶିଳ୍ପ ଲାଗି ସରକାର ପ୍ୟାଜେକ ଘୋଷଣା କରନ୍ତୁ ବୋଲି ଭାରତୀୟ ରିଟେଲ ଆସୋସିଏଶନ ପକ୍ଷରୁ ଦାବି କରାଯାଇଛି। ଏହି ଶିଳ୍ପ ଦେଶ ମଧ୍ୟରେ ୪୬ ନିୟୁତ ନିଯୁକ୍ତି ସୁଯୋଗ ସୃଷ୍ଟି କରିଛି। ଏହା ସହ ଦେଶର ମୋଟ ଜିଡିପିରେ ଏହି ଶିଳ୍ପର ଯୋଗଦାନ ୧୦%।
ପରିପ୍ରେକ୍ଷୀରେ ଭାରତୀୟ ରିଟେଲ ଆସୋସିଏଶନର ସିଇଓ କୁମାର ରାଜଗୋପାଳନ କହିଛନ୍ତି, କୋଭିଡ୍ କଟକଣା ଯୋଗୁ ଦେଶର ବିଭିନ୍ନ ରାଜ୍ୟରେ ୮୦% ରିଟେଲ ଷ୍ଟୋର ବନ୍ଦ ରହିଛି। କ୍ୟାଶ୍ ଫ୍ଲୋ ସ୍ଥିର ରହିଥିବା ବେଳେ ପରିଚାଳନାଗତ ଖର୍ଚ୍ଚ ପୂର୍ବପରି ଜାରି ରହିଛି। ପ୍ୟାକେଜ ଜରୁରୀ ହୋଇଥିବା ବେଳେ ସରକାର ଯଦି ସହାୟତା ନ କରନ୍ତି ତେବେ ଶିଳ୍ପ ତିଷ୍ଠିତା କଷ୍ଟକର ହୋଇପଡ଼ିବ। ଭୁବନେଶ୍ୱରସ୍ଥିତ ପଣ୍ଡା ରିଟେଲ ପ୍ରାଇଭେଟ ଲିମିଟେଡ୍ର ପରିଚାଳନା ନିର୍ଦ୍ଦେଶକ ଶିବପ୍ରସାଦ ପଣ୍ଡା କହିଛନ୍ତି, ରିଟେଲ ଏକ ଲୋକାଭିମୁଖୀ ଶିଳ୍ପ ହୋଇଥିବା ବେଳେ ବିଭିନ୍ନ ଷ୍ଟୋରରେ ପ୍ରାୟ ୯୦% କର୍ମଚାରୀ କାର୍ଯ୍ୟ କରିଥାନ୍ତି। ଏହି କର୍ମଚାରୀଙ୍କ ଅବସ୍ଥା ବର୍ତ୍ତମାନ ଦୟନୀୟ ହୋଇପଡ଼ିଛି। ରିଟେଲର ସେମାନଙ୍କୁ ଠିକ୍ ଭାବେ ଦରମା ମଧ୍ୟ ଦେଇପାରୁନାହାନ୍ତି। ଶିଳ୍ପର ୭୦% ଫିକ୍ସଡ ଖର୍ଚ୍ଚ ଉଠାଇବା କଷ୍ଟକର ହୋଇପଡୁଛି। ଏହାକୁ ଧ୍ୟାନରେ ରଖି ସରକାର ସହାୟତା ଯୋଗାଇ ଦେବାକୁ ଆଗେଇ ଆସିବାର ଆବଶ୍ୟକତା ରହିଛି।
ଭୁବନେଶ୍ୱରସ୍ଥିତ କଳାମନ୍ଦିର ଫ୍ୟାଶନର ପରିଚାଳନା ଅଂଶୀଦାର ଯଶପାଲ ସିଂ ଅରୋରା କହିଛନ୍ତି, ମହାମାରୀଜନିତ କଟକଣା ଯୋଗୁ ରିଟେଲରଙ୍କ ଆର୍ଥତ୍କ ସ୍ଥିତି ଖରାପ ହୋଇଯାଇଛି। ସପ୍ଲାୟରଙ୍କୁ ପେମେଣ୍ଟ ଦେବାରେ ସମସ୍ୟା ଉପୁଜୁଛି। ସପ୍ଲାୟର ଏମ୍ଏସ୍ଏମ୍ଇ କ୍ଷେତ୍ର ସହ ଜଡ଼ିତ ଥିବାରୁ ଯୋଗାଣ ଚେନ୍ ଚାପରେ ରହିଛି। ବିଭିନ୍ନ ଚାପ ଯୋଗୁ ବ୍ୟବସାୟ ବନ୍ଦ ହେବା ସ୍ଥିତି ଉପୁଜିଛି। ଏହାକୁ ଧ୍ୟାନରେ ରଖି ସଂଘ ପକ୍ଷରୁ ଅର୍ଥ ମନ୍ତ୍ରଣାଳୟ ଏବଂ ରିଜର୍ଭ ବ୍ୟାଙ୍କକୁ ବିଭିନ୍ନ ସହାୟତା ଲାଗି ନିବେଦନ କରାଯାଇଛି।
