ଭାରତୀୟ ଅର୍ଥନୀତି ଜୁଲାଇ-ସେପ୍ଟେମ୍ବର ତ୍ରୈମାସିକରେ ଅତି ଭଲ ପ୍ରଦର୍ଶନ କରିଥିବା ସଂକ୍ରାନ୍ତ ଏକ ରିପୋର୍ଟ ଜାତୀୟ ପରିସଂଖ୍ୟାନ କାର୍ଯ୍ୟାଳୟ ପକ୍ଷରୁ ୨୮ ନଭେମ୍ବରରେ ପ୍ରକାଶ ପାଇଛି। ଏହି ସମୟ ଅବଧିରେ ଭାରତର ଆର୍ଥିକ ଅଭିବୃଦ୍ଧି ୮.୨ ପ୍ରତିଶତ ରହିଥିବା ଦର୍ଶାଯାଇଛି, ଯାହା ଗତ ୬ଟି ତ୍ରୈମାସିକ ମଧ୍ୟରେ ଏହା ସର୍ବାଧିକ ବୋଲି କୁହାଯାଉଛି। ଉତ୍ପାଦନ ବୃଦ୍ଧି ଓ ସେବା କ୍ଷେତ୍ରରେ ଉତ୍ତମ ପ୍ରଦର୍ଶନ ଯୋଗୁ ଏଭଳି ସକାରାତ୍ମକ ଫଳ ଆସିଥିବା ରିପୋର୍ଟରେ ଦର୍ଶାଯାଇଛି। ଏହି ରିପୋର୍ଟ ପ୍ରକାଶ ପାଇବା ସହ ଜୁଲାଇ-ସେପ୍ଟେମ୍ବର ତ୍ରୈମାସରେ ଚାଇନାର ଆର୍ଥିକ ଅଭିବୃଦ୍ଧି ୪.୮ ପ୍ରତିଶତ ରହିଥିବା ସୂଚନା ଦିଆଯାଇଛି। ଏଠାରେ ଚାଇନାର ଅଭିବୃଦ୍ଧି ପ୍ରତିଶତ ସହ ଭାରତର ତଥ୍ୟ ତୁଳନାତ୍ମକ ଭାବେ ପ୍ରଦାନ କରାଯିବା ପଛରେ ନିହିତ ଥିବା ଲକ୍ଷ୍ୟଟି ବୁଝି ହେଉଛି ବୋଲି କୁହାଯାଇପାରେ। ବାସ୍ତବରେ ଭାରତର ତଥ୍ୟ ଉପରେ ଆଧାରିତ ସଂଖ୍ୟା କୌଣସି ଭାବେ ଅନ୍ୟ ବୃହତ୍ ଦେଶ ସହିତ ତୁଳନା କରାଯାଇ ପାରିବ ନାହିଁ। ଉଦାହରଣ ସ୍ବରୂପ ୨୦୨୫-୨୬ରେ ଆମେରିକାର ଅର୍ଥନୀତି ୩୦.୪ ଟ୍ରିଲିୟନ ଡଲାର ହୋଇଥିବା ବେଳେ ଚାଇନାର ଅର୍ଥନୀତି ୧୯.୬ ଟ୍ରିଲିୟନ ଆମେରିକୀୟ ଡଲାର ରହିଛି। ସେହି ତୁଳନାରେ ଭାରତର ଅର୍ଥନୀତି ମାତ୍ର ୪.୩ ଟ୍ରିଲିୟନ ଡଲାରରେ ଅଛି ବୋଲି ସରକାରୀ ତଥ୍ୟ ପ୍ରକାଶ କରୁଛି। ଏଥିରୁ ବୁଝିବାକୁ ହେବ ଯେ, ଗୋଟେ କ୍ଷୁଦ୍ର ଅର୍ଥନୀତିରେ ବିରାଟବଡ଼ ସଂଖ୍ୟାର ପ୍ରତିଶତ ବୃହତ୍ ଅର୍ଥନୀତିର କ୍ଷୁଦ୍ର ସଂଖ୍ୟାର ପ୍ରତିଶତ ସହିତ ତୁଳନା କଲେ ତାହା ଅର୍ଥନୀତିର ମୂଳମନ୍ତ୍ର ଅବୁଝା ରହିଯିବ। ଅନ୍ୟ ଶବ୍ଦରେ କହିଲେ ସମକକ୍ଷ ଅର୍ଥନୀତି ସହିତ ତୁଳନା କରାଯାଇପାରେ। ବିଶ୍ୱ ସ୍ତରରେ ଚାଇନା ଅର୍ଥନୀତିର ଏକ ବିରାଟ ପ୍ରଭାବ ରହିଛି। ତେଣୁ ତାହାର ଅଭିବୃଦ୍ଧି ହାର କମ୍ ହୋଇଥିବା ଦର୍ଶାଯାଇ ଭାରତର ଅର୍ଥନୀତିକୁ ଉଚ୍ଚା କରି ଦେଖାଇଦେଲେ ସେସବୁ ସାଧାରଣ ଭାରତୀୟଙ୍କ ଦ୍ୱାରା ଗ୍ରହଣୀୟ ହୋଇଯାଉଛି। କାରଣ ଭାରତୀୟଙ୍କର ସାଧାରଣ ଅର୍ଥନୀତି ସଂକ୍ରାନ୍ତ ଜ୍ଞାନ ଅତ୍ୟନ୍ତ ସୀମିତ। ଦେଖାଯାଇଛି ଭାରତୀୟମାନେ ଦୁଇଟି ବିଷୟରେ ବେଶି ଖୁସି ହୋଇଥାଆନ୍ତି ଯେତେବେଳେ ସାମରିକ କଥା ଉଠିଲେ ପାକିସ୍ତାନକୁ ନୀଚା କରି ଦେଖାଯାଇଥାଏ ଏବଂ ଚାଇନାର ଆର୍ଥିକ ଶକ୍ତି ହ୍ରାସ ହୋଇଥିବା ଆଲୋଚନା ହୁଏ। ଏହା ମଣିଷର ଈର୍ଷାକୁ ପ୍ରଦର୍ଶନ କରିବାଛଡ଼ା ଅନ୍ୟ କୌଣସି କାର୍ଯ୍ୟରେ ସାହାଯ୍ୟ କରେନାହିଁ।
ହଟ୍ମେଲ୍ ଡଟ୍ କମ୍ (ବର୍ତ୍ତମାନ ଆଉଟ୍ଲୁକ୍ ଡଟ୍ କମ୍)ର ସ୍ରଷ୍ଟା ସବୀର ଭାଟ୍ଟିଆ ଗତ ସପ୍ତାହରେ ମତ ପ୍ରକାଶ କରିଛନ୍ତି ଯେଉଁଥିରେ ସ୍ପଷ୍ଟ ଭାବେ କହିଛନ୍ତି ଯେ, ଭାରତର ମୋଟ ଘରୋଇ ଉତ୍ପାଦ (ଜିଡିପି) ଆକଳନ ପଦ୍ଧତି ସମ୍ପୂର୍ଣ୍ଣ ଭାବେ ତ୍ରୁଟିପୂର୍ଣ୍ଣ। ବାସ୍ତବ ସଂଖ୍ୟା ଏହି ଦେଶରେ ଜାଣିବା କଷ୍ଟକର ହେଉଛି, କାରଣ ଅସତ୍ୟକୁ ବାରମ୍ବାର ତଥ୍ୟ ଭାବେ ଦର୍ଶାଯାଇ ଭାରତୀୟଙ୍କୁ ଚତୁର୍ଥ ବୃହତ୍ ବିଶ୍ୱ ଅର୍ଥନୀତି ଭାବେ ପ୍ରଦର୍ଶନ କରାଯାଉଛି। ଯେତେବେଳେ ବାସ୍ତବ ତଥ୍ୟ ଲୋକଲୋଚନକୁ ଆସିବ ଏବଂ ଦେଶର ନାଗରିକ ଏହିସବୁ ତଥ୍ୟକୁ ପ୍ରଶ୍ନ କରିପାରିବେ ସେତେବେଳେ ଚିତ୍ର ସ୍ପଷ୍ଟ ହୋଇପାରିବ। ନଚେତ୍ ସବୁବେଳେ ଭୁଲ ତଥ୍ୟରେ ବୁଡ଼ିରହିଲେ ସମ୍ପୂର୍ଣ୍ଣ ଦେଶର ପ୍ରକୃତ ଉନ୍ନତି ଘଟିବ ନାହିଁ ଓ ଗଣତନ୍ତ୍ର ମଧ୍ୟ କ୍ଷତିଗ୍ରସ୍ତ ହେବ। ଏହାକୁ ବୁଝିବାର ଏକ ସହଜ ମାପକାଠି ହୋଇପାରେ ଯେଉଁ ୮୦ କୋଟି ଭାରତୀୟଙ୍କୁ ବିନା ମୂଲ୍ୟରେ ମାସିକ ୫ କେଜି ଚାଉଳ ଦେବାର ଘୋଷଣା କରିବାକୁ ସରକାର ବାଧ୍ୟ ହୋଇଛନ୍ତି। ଏହାସହିତ ନିର୍ବାଚନ ପ୍ରଚାର ସମୟରେ ଯେତେବେଳେ ଶାସକ ଦଳ ପକ୍ଷରୁ ମହିଳା ଭୋଟରଙ୍କୁ ଆକର୍ଷିତ କରିବା ପାଇଁ ୧୦ ହଜାର ଟଙ୍କା (ପ୍ରାୟ ୧୧୨ ଆମେରିକୀୟ ଡଲାର) ହାତଗୁଞ୍ଜା ରାଜକୋଷରୁ ଦେବାର ଘୋଷଣା କରାଯାଉଛି। ପ୍ରତିବର୍ଷ ୧୦ ହଜାର ଟଙ୍କା ଅର୍ଥ ହେଉଛି ଦୈନିକ ମାତ୍ର ୨୭ ଟଙ୍କା ଘୁସ୍ ଦେଇ ଭୋଟ କିଣାଯାଇ ପାରୁଛି। ତେଣୁ ସେହି ମହିଳାମାନଙ୍କର ଅର୍ଥନୈତିକ ସ୍ଥିତି କିଭଳି ଅଛି ସେ ସମ୍ପର୍କରେ ଏହା ଏକ ସ୍ପଷ୍ଟ ଧାରଣା ସୃଷ୍ଟି କରୁଛି। ଯଦି ଦେଶରେ ଜିଡିପି ବିଶ୍ୱରେ ଚତୁର୍ଥ ବୃହତ୍ ହେଲାଣି ତେବେ ଏଭଳି ସଂଖ୍ୟାରେ ପ୍ରଲୋଭିତ କରାଇ ଭୋଟରଙ୍କୁ ବାଉଳା କରିବାର ପରିସ୍ଥିତି ଉପୁଜନ୍ତା ନାହିଁ।
ଏଠାରେ ଭାରତୀୟ ଅର୍ଥନୀତି ସଂକ୍ରାନ୍ତରେ ପ୍ରକାଶିତ ରିପୋର୍ଟକୁ ଦେଖି କେବଳ ସାଧାରଣ ବୁଦ୍ଧିକୁ ପ୍ରୟୋଗ କରି ଭାବିଲେ ଅନେକଙ୍କ ମନରେ କିଛିଟା ବିରୋଧାଭାସ ସୃଷ୍ଟି ହେଉଥିବ। କାରଣ ୨୭ ଅଗଷ୍ଟରୁ ଭାରତୀୟ ସାମଗ୍ରୀ ଉପରେ ଲଦାଯାଇଥିବା ଅଭୂତପୂର୍ବ ଆମେରିକୀୟ ଟାରିଫ୍ ଓ ଡଲାର ତୁଳନାରେ ଭାରତୀୟ ମୁଦ୍ରାର ମୂଲ୍ୟ ହ୍ରାସ ବିଷୟ ସମସ୍ତେ ଜାଣିଛନ୍ତି। ଯେତେବେଳେ ଭାରତୀୟ ସାମଗ୍ରୀ ଉପରେ ଅତ୍ୟଧିକ ଟାରିଫ୍ ପଡ଼ିବ ସେତେବେଳେ ଭାରତକୁ ଅଧିକ ଡଲାର ଆସିବାର ସ୍ରୋତ ବନ୍ଦ ହେବା ସ୍ବାଭାବିକ। ଅର୍ଥନୀତିର ନିୟମ ଅନୁଯାୟୀ ଚାହିଦା ଓ ଯୋଗାଣ ବାଧାପ୍ରାପ୍ତ ହେବ। ଭାରତ ଅଧିକ ଡଲାର ଚାହୁଁଥିଲେ ମଧ୍ୟ ତାହା ମିଳିବାର ସମ୍ଭାବନା କ୍ଷୀଣ ହେଉଥିବାରୁ ତାହାର ପ୍ରଭାବ ଅର୍ଥନୀତି ଉପରେ ପଡ଼ିବା ଥୟ। ବର୍ତ୍ତମାନ ଡଲାର ତୁଳନାରେ ଭାରତୀୟ ମୁଦ୍ରା ୯୦ ପାଖାପାଖି ଛୁଇଁଲାଣି। ଅର୍ଥାତ୍ ଆମେରିକାର ଏକ ଡଲାର ପାଇବା ଲାଗି ଆମକୁ ୯୦ ଟଙ୍କା ଦେବାକୁ ପଡ଼ିବ। ୨୦୨୬ ମସିହା ପ୍ରଥମ ତ୍ରୈମାସରେ ଆମେରିକୀୟ ଡଲାର ତୁଳନାରେ ଭାରତୀୟ ମୁଦ୍ରା ୧୦୦ ଛୁଇଁବାର ଲକ୍ଷଣ ଦେଖାଦେଲାଣି। ଏହି ପ୍ରଚ୍ଛଦପଟରେ ଅନ୍ୟ ଏକ ବିଷୟକୁ ଚିନ୍ତା କରାଯାଇପାରେ। ଆମେରିକା ଚାପରେ ଭାରତ ତା’ଠାରୁ ତେଲ ଓ ପ୍ରାକୃତିକ ଗ୍ୟାସ କିଣିବ ବୋଲି ଅନେକ ଆଡ଼ମ୍ବରରେ କେନ୍ଦ୍ର ତୈଳ ଓ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂ ପୁରୀ ଘୋଷଣା କରିଛନ୍ତି । ଏକ ବୃହତ୍ ଅର୍ଥନୈତିକ ଶକ୍ତି ଏତେ ସହଜରେ ମୁଣ୍ଡ ନୁଅଁାଇବାର କାରଣ ନାହିଁ।
ଭାରତରେ ୨୮ ନଭେମ୍ବରରେ ସରକାରୀ ଭାବେ ଚଳିତ ଆର୍ଥିକ ବର୍ଷର ଦ୍ୱିତୀୟ ତ୍ରୈମାସିକ ଜାତୀୟ ଆକାଉଣ୍ଟ ତଥ୍ୟ ପ୍ରକାଶ ପାଇଥିଲା। ଏହାର ଦିନକ ପୂର୍ବରୁ ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍) ତା’ର ବାର୍ଷିକ ସମୀକ୍ଷାରେ ଭାରତର ଜିଡିପି ସମେତ ଜାତୀୟ ଆକାଉଣ୍ଟ ପରିସଂଖ୍ୟାନକୁ ‘ସି’ ଗ୍ରେଡ୍ ପ୍ରଦାନ କରିଥିଲା। ଆଇଏମ୍ଏଫ୍ ଭାଷାରେ ଏହା ଦ୍ୱିତୀୟ ସର୍ବନିମ୍ନ ଗ୍ରେଡ୍ । ଏଥିରୁ ବୁଝିବାକୁ ହେବ ଯେ, ଭାରତରେ ବଢ଼ାଇକରି ଦିଆଯାଉଥିବା ତଥ୍ୟ କେବଳ ବାସ୍ତବରେ ଅନୁଭୂତ ଅର୍ଥନୈତିକ ଅସ୍ବାଭାବିକତାରୁ ଲୋକଙ୍କୁ ଦୂରେଇ ରଖିବା ଲାଗି ସଘନ ପ୍ରୟାସ କରାଯାଉଛି।
Dharitri – The Largest & Most Trusted Odia Daily
