ଗାଜା, ୩।୪: ଗାଜାରେ ମଙ୍ଗଳବାର ଇସ୍ରାଏଲ ଏୟାର ଷ୍ଟ୍ରାଇକ କରିଛି। ଏଥିରେ ଓ୍ବାର୍ଲଡ୍ ସେଣ୍ଟ୍ରାଲ କିଚେନ୍ (ଡବ୍ଲ୍ୟୁସିକେ) ଏନଜିଓର ୭ ଜଣ କର୍ମଚାରୀ ନିହତ ହୋଇଛନ୍ତି। ମୃତକଙ୍କ ମଧ୍ୟରେ ଅଷ୍ଟ୍ରେଲିଆ, ବ୍ରିଟେନ ଓ ପୋଲାଣ୍ଡର ନାଗରିକ ରହିଥିବା ଏଜେନ୍ସି ପକ୍ଷରୁ ସୂଚନା ଦିଆଯାଇଛି। ଏହା ସହ ସେଲିବ୍ରିଟି ସେଫ୍ ଜୋସ୍ ଆଣ୍ଡ୍ରେସଙ୍କର ମୃତ୍ୟୁ ଘଟିଛି। ଦ୍ୱୈତ ନାଗରିକତା ରଖିଥିବା ଫିଲିଷ୍ଟାଇନ, ଯୁକ୍ତରାଷ୍ଟ୍ର ଆମେରିକା ଓ କାନାଡାର କର୍ମଚାରୀ ମଧ୍ୟ ଆକ୍ରମଣରେ ନିହତ ହୋଇଛନ୍ତି। ଇସ୍ରାଏଲ ପ୍ରତିରକ୍ଷା ବାହିନୀ ସହ ସମନ୍ବିତ କାର୍ଯ୍ୟକଳାପ ସତ୍ତ୍ୱେ ମଧ୍ୟ ଏପରି ଆକ୍ରମଣ ହୋଇଥିବା ଡବ୍ଲ୍ୟୁସିକେ ପକ୍ଷରୁ କୁହାଯାଇଛି। ସମୁଦ୍ର ମାଧ୍ୟମରେ ଆସିଥିବା ୧୦୦ ଟନ୍ ମାନବୀୟ ଖାଦ୍ୟ ସହାୟତା ସାମଗ୍ରୀକୁ ସୁରକ୍ଷିତ ଭାବେ ଗାଜାରେ ପହଞ୍ଚାଇବା ପରେ ଡବ୍ଲ୍ୟୁସିକେର କର୍ମଚାରୀମାନେ ଡେର୍ ଅଲ୍ ବଲାହ ଗୋଦାମକୁ ଯାଉଥିବାବେଳେ ଏହି ଆକ୍ରମଣ ଘଟଛି। ଇସ୍ରାଏଲ ପକ୍ଷରୁ ହୋଇଥିବା ଏହି ଏୟାର ଷ୍ଟ୍ରାଇକକୁ ମାନବିକତା ଉପରେ ଆକ୍ରମଣ ଭାବେ ଦର୍ଶାଇଛନ୍ତି ଡବ୍ଲ୍ୟୁସିକେର ମୁଖ୍ୟ କାର୍ଯ୍ୟକାରୀ ଅଧିକାରୀ ଏରିନ୍ ଗୋର।
