ନୂଆଦିଲ୍ଲୀ,୧୯।୧୨ : ଦେଶର ୭.୨୦ ପ୍ରତିଶତ ନାଗରିକଙ୍କ ପାଖରେ ପାସପୋର୍ଟ ଅଛି। ଡିସେମ୍ବର ମଧ୍ୟଭାଗ ସୁଦ୍ଧା ୯.୬ କୋଟି ଲୋକଙ୍କ ପାସପୋର୍ଟ ତିଆରି ହୋଇସାରିଛି। ଏହି ପାସପୋର୍ଟଗୁଡ଼ିକ ମଧ୍ୟରୁ ଅଧିକାଂଶ ଗତ ଦଶନ୍ଧିରେ ତିଆରି କରାଯାଇଛି। ଆସନ୍ତା କିଛି ମାସ ମଧ୍ୟରେ ଏହି ସଂଖ୍ୟା ୧୦ କୋଟିରେ ପହଞ୍ଚିବାକୁ ଯାଉଛି।
ବୈଦେଶିକ ବ୍ୟାପାର ମନ୍ତ୍ରଣାଳୟର ତଥ୍ୟ ଅନୁଯାୟୀ କେରଳ ଏବଂ ମହାରାଷ୍ଟ୍ରରେ ୨.୨ କୋଟିରୁ ଅଧିକ ବା ପ୍ରାୟ ଏକ ଚତୁର୍ଥାଂଶ ଅର୍ଥାତ୍ ୨୩ ପ୍ରତିଶତ ପାସପୋର୍ଟ ପ୍ରଦାନ କରାଯାଇଛି। ଅଧିକ ସଂଖ୍ୟାରେ ପାସପୋର୍ଟ ତାମିଲନାଡୁ, ଉତ୍ତରପ୍ରଦେଶ, ପଞ୍ଜାବ, ଗୁଜରାଟ ଏବଂ କର୍ନାଟକ ରାଜ୍ୟର ଲୋକଙ୍ ପାଖରେ ରହିଛି।
ତଥାପି, ସ୍ବାଧୀନତାର ୭୫ ବର୍ଷ ତୁଳନାରେ ଏହି ମୋଟ ପାସପୋର୍ଟ ସଂଖ୍ୟା କମ ଅଟେ। ଏହାର କାରଣ ହେଉଛି ଯେ ବର୍ତ୍ତମାନ ପର୍ଯ୍ୟନ୍ତ ପାସପୋର୍ଟ ପ୍ରଦାନ ନୀତି ଅତ୍ୟନ୍ତ କଠୋର ଥିଲା। ସମ୍ପ୍ରତି ବିଦେଶ ଯିବା ଲୋକଙ୍କ ସଂଖ୍ୟା ବୃଦ୍ଧି ପାଇଛି। ତେଣୁ ପାସପୋର୍ଟ ପାଇଥିବା ଲୋକଙ୍କ ସଂଖ୍ୟା ମଧ୍ୟ ବଢ଼ିବାରେ ଲାଗିଛି। ସେଥିପାଇଁ କେନ୍ଦ୍ର ସରକାର ପାସପୋର୍ଟ ସେବା କେନ୍ଦ୍ର ସଂଖ୍ୟା ବୃଦ୍ଧି କରୁଛନ୍ତି।
ସରକାରଙ୍କ ଉଦାରବାଦୀ ତଥା ସହଜ ପାସପୋର୍ଟ ନୀତି ଯୋଗୁ ବର୍ତ୍ତମାନ ହାରାହାରି ୬ ଦିନରେ ପାସପୋର୍ଟ ତିଆରି ହେଇଥିବାବେଳେ ୨୦୧୫ରେ ଏଥି ପାଇଁ ୨୧ ଦିନ ଲାଗୁଥିଲା। ୨୦୧୫ ରୁ ୨୦୨୨ମଧ୍ୟରେ ୩୬୮ ନୂତନ ପାସପୋର୍ଟ ସେବା କେନ୍ଦ୍ର ସ୍ଥାପନ ହୋଇଛି। ୨୦୧୪ରେ ଏହା ୧୫୩ ଥିଲା। ତେବେ ୨୦୨୨ରେ ଏହି ସଂଖ୍ୟାରେ ୩୪୦ ପ୍ରତିଶତ ବୃଦ୍ଧି ଘଟିଛି। ବିଦେଶରେ ୧୪୦ରୁ ଅଧିକ ଭାରତୀୟ ମିଶନରେ ମଧ୍ୟ ପାସପୋର୍ଟ ପ୍ରଦାନ କରାଯାଇଥାଏ।
