ନୂଆଦିଲ୍ଲୀ, ୨।୧: ବିଦେଶୀ ଅନୁଦାନ ପାଇବାକୁ ହେଲେ ଯେକୌଣସି ସଂଗଠନ ଏବଂ ଏନ୍ଜିଓ ପାଇଁ ଏଫ୍ସିଆର୍ଏ ପଞ୍ଜୀକରଣ ବାଧ୍ୟତାମୂଳକ। ତେବେ ନୂଆବର୍ଷରେ ଅକ୍ସଫାମ୍ ଇଣ୍ଡିଆ, କମନ କଜ୍, ଆଇଆଇଟି ଦିଲ୍ଲୀ, ଜାମିଆ ମିଲିଆ ଇସ୍ଲାମିଆ, ଇଣ୍ଡିଆନ ମେଡିକାଲ ଆସୋସିଏଶନ, ନେହେରୁ ମେମୋରିଆଲ ମ୍ୟୁଜିୟମ୍ ଓ ଲାଇବ୍ରେରି ସମେତ ୬,୦୦୦ରୁ ଊର୍ଦ୍ଧ୍ୱ ସଂସ୍ଥା ବିଦେଶୀ ଅନୁଦାନ ପାଇବା ଲାଇସେନ୍ସ ହରାଇଛନ୍ତି। ଶନିବାର ପଞ୍ଜୀକୃତ ଅନୁଷ୍ଠାନ ଓ ସଂସ୍ଥା ସଂଖ୍ୟା ୧୬,୮୨୯କୁ ଖସିଆସିଛି। ଏମାନେ ହୁଏତ ଏଫ୍ସିଆର୍ଏ (ବିଦେଶୀ ଅନୁଦାନ ନିୟନ୍ତ୍ରଣ ଆଇନ) ଲାଇସେନ୍ସ ନବୀକରଣ ଲାଗି ଆବେଦନ କରିନାହାନ୍ତି କିମ୍ବା ଏମାନଙ୍କର ଆବେଦନକୁ ସ୍ବରାଷ୍ଟ୍ର ମନ୍ତ୍ରଣାଳୟ ଖାରଜ କରିଦେଇଛି ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ସ୍ବରାଷ୍ଟ୍ର ମନ୍ତ୍ରଣାଳୟ ଡ୍ୟାସ୍ବୋର୍ଡରେ ଦିଆଯାଇଥିବା ସୂଚନା ଅନୁଯାୟୀ ଜାନୁୟାରୀ ୧ରେ ଦେଶର ୧୬,୮୨୯ ସଂଗଠନ ଏଫ୍ସିଆର୍ଏରେ ପଞ୍ଜୀକୃତ ହୋଇଛନ୍ତି। ଦିନକ ପୂର୍ବରୁ ଏହି ତାଲିକା ୨୨,୮୩୨ ଥିଲା।
ସ୍ବରାଷ୍ଟ୍ର ମନ୍ତ୍ରଣାଳୟ ଡ୍ୟାସ୍ବୋର୍ଡ ସୂଚନା ଅନୁଯାୟୀ ଜାନୁୟାରୀ ୧ରେ ୧୨,୫୮୦ ସଂଗଠନର ଏଫ୍ସିଆର୍ଏ ପଞ୍ଜୀକରଣ ସମୟସୀମା ଶେଷ ହୋଇଛି। ଏହା ଏକ ସଞ୍ଚୟୀ ତାଲିକା ଏବଂ ଉକ୍ତ ସଂଗଠନଗୁଡ଼ିକୁ ଏଫ୍ସିଆର୍ଏ ପଞ୍ଜୀକରଣରେ ସାମିଲ କରାଯିବ। ପୂର୍ବରୁ ଅନେକ ଥର ଅନୁରୂପ ସ୍ଥିତିରେ ସେମାନଙ୍କୁ ସାମିଲ କରାଯାଇଥିଲା ବୋଲି ଜଣେ ଅଧିକାରୀ କହିଛନ୍ତି। ମନ୍ତ୍ରଣାଳୟ ରେକର୍ଡ ଅନୁଯାୟୀ ଯେଉଁମାନେ ଏଫ୍ସିଆର୍ଏ ପଞ୍ଜୀକରଣ ହରାଇଛନ୍ତି, ସେମାନଙ୍କ ମଧ୍ୟରେ କେତେକ ପ୍ରମୁଖ ଅନୁଷ୍ଠାନ ହେଲେ ହମ୍ଦର୍ଦ ଏଜୁକେଶନ ସୋସାଇଟି, ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ହାଉଜ୍ଖାସ୍), ଇନ୍ଦିରା ଗାନ୍ଧୀ ନ୍ୟାଶନାଲ ସେଣ୍ଟର ଫର୍ ଆଟର୍ସ (ଆଇଜିଏନ୍ସିଏ), ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ପବ୍ଲିକ୍ ଆଡ୍ମିନିଷ୍ଟ୍ରେଶନ (ଆଇଆଇପିଏ), ନ୍ୟାଶନାଲ ଫାଉଣ୍ଡେଶନ ଫର୍ କମ୍ୟୁନାଲ ହାର୍ମୋନି (ଏନ୍ଏଫ୍ସିଏଚ୍), ଦିଲ୍ଲୀ କଲେଜ ଅଫ୍ ଇଞ୍ଜିନିୟରିଂ, ଗୋଆ ଫୁଟ୍ବଲ ଆସୋସିଏଶନ, ପ୍ରେସ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ, ଦି ଲେପ୍ରା ଇଣ୍ଡିଆ ଟ୍ରଷ୍ଟ ଏବଂ ଇଣ୍ଡିଆନ ଇନ୍ଷ୍ଟଚ୍ୟୁଟ୍ ଅଫ୍ ମ୍ୟାନେଜମେଣ୍ଟ (କୋଲକାତା), ମେଡିକାଲ କାଉନସିଲ ଅଫ୍ ଇଣ୍ଡିଆ, ଇମାନୁଏଲ୍ ହସ୍ପିଟାଲ ଆସୋସିଏଶନ, ଟ୍ୟୁବରକୁଲୋସିସ୍ ଆସୋସିଏଶନ ଅଫ୍ ଇଣ୍ଡିଆ, ବିଶ୍ୱ ଧର୍ମାୟତନ, ମହର୍ଷି ଆୟୁର୍ବେଦ ପ୍ରତିଷ୍ଠାନ, ନ୍ୟାଶନାଲ ଫେଡେରେଶନ ଅଫ୍ ଫିଶରମେନ୍ସ କୋଅପରେଟିଭ୍ ଲିଃ, ଭାରତୀୟ ସଂସ୍କୃତି ପରିଷଦ, ଡିଏଭି କଲେଜ ଟ୍ରଷ୍ଟ ଏବଂ ମ୍ୟାନେଜମେଣ୍ଟ ସୋସାଇଟି, ଗଡରେଜ୍ ମେମୋରିଆଲ ଟ୍ରଷ୍ଟ।
