ନୂଆଦିଲ୍ଲୀ, ୧।୫ : ଦେଶରେ ତାତି ବଢ଼ିବା ସହିତ କୋଇଲା ଅଭାବ ଯୋଗୁଁ ବିଦ୍ୟୁତ ସଙ୍କଟ ବୃଦ୍ଧି ପାଇବାରେ ଲାଗିଛି। ପାୱାର ସିଷ୍ଟମ ଅପରେଶନ କର୍ପୋରେଶନର ରିପୋର୍ଟ ଅନୁଯାୟୀ, ଗତ ୬ ବର୍ଷ ମଧ୍ୟରେ ପ୍ରଥମ ଥର ପାଇଁ ଦେଶରେ ଏଭଳି ପ୍ରକାର ବିଦ୍ୟୁତ ସଙ୍କଟ ଦେଖାଦେଇଛି।
ରିପୋର୍ଟ ଅନୁଯାୟୀ, ଏପ୍ରିଲ -୨୦୨୨ ର ପ୍ରଥମ ୨୭ ଦିନରେ ଚାହିଦା ତୁଳନାରେ ୧.୮୮ ବିଲିୟନ ୟୁନିଟ ବିଦ୍ୟୁତର ଅଭାବ ରହିଛି। କେନ୍ଦ୍ର ଶକ୍ତି ମନ୍ତ୍ରଣାଳୟ ଅନୁଯାୟୀ ଦେଶରେ ୨,୦୭,୧୧ ମେଗାୱାଟ ବିଦ୍ୟୁତର ଚାହିଦା ରହିଛି । ୨୬ ଏପ୍ରିଲରେ, ଚାହିଦା ଅନୁସାରେ ଯୋଗାଣ କମ୍ ରହିଥିଲା। ଏହାର ଅଭାବ ପରମାଣ ୮.୨୨ ଗିଗାଓ୍ବାଟ ବିଦ୍ୟୁତ୍ ସଙ୍କଟ ସୃଷ୍ଟି କରିଛି। ଶକ୍ତି ମନ୍ତ୍ରଣାଳୟ ଅନୁଯାୟୀ, ଚଳିତ ବର୍ଷ ମାର୍ଚ୍ଚରେ ଚାହିଦାରେ ୮.୯ ପ୍ରତିଶତ ବୃଦ୍ଧି ହୋଇଛି।
ମନ୍ତ୍ରଣାଳୟ କହିଛି ଯେ ଯଦି ଚାହିଦା ଏହିପରି ଜାରି ରୁହେ, ତେବେ ମେ-ଜୁନ ମାସରେ ଏହି ଅଭାବ ପରିମାଣ ୨୧୫ ରୁ ୨୨୦ ଗିଗାଓ୍ବାଟ ହେବାର ଆଶଙ୍କା ରହିଛି। କୋଇଲା ସଙ୍କଟ ଯୋଗୁ ଦେଶର ସମସ୍ତ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରେ ବିଦ୍ୟୁତ୍ ଯୋଗାଣ ପ୍ରଭାବିତ ହୋଇଛି। ତେବେ ହରିୟାଣା, ରାଜସ୍ଥାନ, ଗୁଜୁରାଟ, ଆନ୍ଧ୍ରପ୍ରଦେଶ, ତାମିଲନାଡୁ ଏବଂ ଜମ୍ମୁ-କଶ୍ମୀର ଅଧିକ ପ୍ରଭାବିତ ହେଉଛନ୍ତି।
ଗତ ବର୍ଷ ଅକ୍ଟୋବରରେ ମଧ୍ୟ ସମାନ ସଙ୍କଟ ସୃଷ୍ଟି ହୋଇଥିଲା। ତେବେ ଦେଶର ଅଧିକାଂଶ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ସଙ୍କଟ ଯୋଗୁଁ ବିଦ୍ୟୁତ୍ କାଟ୍ କଟାଯାଉଛି। ୮୦୦ ମେଗାୱାଟ ବିଦ୍ୟୁତ୍ ଉତ୍ପାଦନ କରୁଥିବା ଏକ ଏନଟିପିସି କାରଖାନା କୋଇଲା ଅଭାବରୁ ବନ୍ଦ ରହିଛି। ଏନେଇ କଂଗ୍ରେସ ମୁଖପାତ୍ର ଗୌରବ ବଲ୍ଲଭ କହିଛନ୍ତି ଯେ ଦେଶର ୧୭୩ ଟି ବିଦ୍ୟୁତ୍ ଉତ୍ପାଦନ ପ୍ଲାଣ୍ଟ୍ ମଧ୍ୟରୁ ୧୦୬ଟିରେ ଗଚ୍ଛିତ କୋଇଲା ଭଣ୍ଡାର ୨୫ ପ୍ରତିଶତରୁ କମ ରହିଛି।
ଦେଶକୁ ଦୈନିକ ୨୨ ଲକ୍ଷ ଟନ କୋଇଲା ଦରକାର ଏବଂ ଯୋଗାଣ ମାତ୍ର ୧୬ ଲକ୍ଷ ଟନ ହେଉଛି। ଫଳସ୍ବରୂପ, ଦୈନିକ ଚାହିଦା, ହାରାହାରି ୧୬,୦୩୫ ମେଗାୱାଟ ଥିବାବେଳେ ଯୋଗାଣ ମାତ୍ର ୨୩୦୪ ମେଗାୱାଟ ହେଉଛି। ଚାହିଦା ତୁଳନାରେ ଉତ୍ତରପ୍ରଦେଶରେ ୯, ହରିୟାଣାରେ ୭.୭ ଏବଂ ଉତ୍ତରାଖଣ୍ଡରେ ୭.୬ ପ୍ରତିଶତ ବିଦ୍ୟୁତ ସଙ୍କଟ ସୃଷ୍ଟି ହୋଇଛି।
କୋଇଲା ମନ୍ତ୍ରୀ ପ୍ରହଲାଦ ଯୋଶୀ କହିଛନ୍ତି ଯେ କୋଇଲା କମ୍ପାନୀଗୁଡିକରେ ୭୩ ଲକ୍ଷ ଟନ କୋଇଲା ଷ୍ଟକ ଅଛି। ସେହିପରି ପାୱାର ପ୍ଲାଣ୍ଟରେ ୨୧.୫ ଲକ୍ଷ ଟନ କୋଇଲା ଗଚ୍ଛିତ ଅଛି । ତେଣୁ ଭୟଭୀତ ହେବାର କୌଣସି ଆବଶ୍ୟକତା ନାହିଁ। ପରିସ୍ଥିତି ଉପରେ କେନ୍ଦ୍ର ସରକାର ନଜର ରଖିଛନ୍ତି।
ଏଥି ସହିତ ଆସନ୍ତା ତିନି ବର୍ଷ ମଧ୍ୟରେ ବିଦ୍ୟୁତ୍ ଯୋଗାଣକୁ ସନ୍ତୁଳିତ ରଖିବା ପାଇଁ କୋଇଲା ଆମଦାନୀ କରିବାକୁ କେନ୍ଦ୍ର ସରକାର ରାଜ୍ୟମାନଙ୍କୁ ନିବେଦନ କରିଛନ୍ତି। କେନ୍ଦ୍ର ସରକାର ପରାମର୍ଶ ଦେଇଛନ୍ତି ଯେ ଯଦି ରାଜ୍ୟମାନେ ସେମାନଙ୍କ ସ୍ତରରୁ ବ୍ୟବସ୍ଥା କରନ୍ତି, ତେବେ ଭବିଷ୍ୟତରେ ବିଦ୍ୟୁତ ସଙ୍କଟ ପରିସ୍ଥିତିକୁ ଏଡାଇ ଦିଆଯାଇପାରିବ ବୋଲି ସେ କହିଛନ୍ତି।
