ଗାନ୍ଧୀନଗର,୧୩।୧୧: ଗୁଜରାଟ ବିଧାନସଭାର ୧୮୨ଟି ଆସନ ପାଇଁ ୨ଟି ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହେବ। ଡିସେମ୍ବର ୧ରେ ପ୍ରଥମ ପର୍ଯ୍ୟାୟ ଏବଂ ଡିସେମ୍ବର ୫ରେ ଦ୍ୱିତୀୟ ପର୍ଯ୍ୟାୟ ମତଦାନ ଅନୁଷ୍ଠିତ ହେବ। ଏହି ପରିପ୍ରେକ୍ଷୀରେ ଭାଜପା ୧୬୬ ବିଧାନସଭା ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରିଛି। ପ୍ରାର୍ଥୀ ଘୋଷଣା ପରେ ଜଣେ ବିଧାୟକଙ୍କ ସମେତ ୪ଜଣ ପୂର୍ବତନ ବିଧାୟକ ଟିକେଟ ନ ପାଇ ବିଦ୍ରୋହ ଆରମ୍ଭ କରିଦେଇଛନ୍ତି। ଟିକେଟ ନ ମିଳିବା ପରେ ଭାଜପା ନେତାମାନେ ସ୍ବାଧୀନ ପ୍ରାର୍ଥୀ ଭାବେ ଲଢେଇ କରିବେ ବୋଲି ଖୋଲାଖୋଲି ଭାବେ ଧମକ ଦେଇଛନ୍ତି।
ଏହା ସହ ଟିକେଟ ପାଇ ନ ଥିବା ନେତାଙ୍କ ମଧ୍ୟରୁ କେତେଜଣ ବିଦ୍ରୋହୀ ନେତା କହିଛନ୍ତି, ସମର୍ଥକଙ୍କ ପରାମର୍ଶ ପରେ ପରବର୍ତ୍ତୀ ପଦକ୍ଷେପ ନେବେ । ଭଦୋଦରା ଜିଲାରେ ଜଣେ ବିଧାୟକଙ୍କ ସହ ଦୁଇଜଣ ପୂର୍ବତନ ଭାଜପା ବିଧାୟକଙ୍କୁ ଟିକେଟ ନ ମିଳିବାରୁ ସେମାନେ ଅସନ୍ତୋଷ ଜାରି କରିଛନ୍ତି। ୱାଘୋଡିଆରୁ ୬ଥର ବିଧାୟକ ଥିବା ମଧୁ ଶ୍ରୀବାସ୍ତବଙ୍କୁ ଦଳ ଟିକେଟ ନ ଦେଇ ତାଙ୍କ ସ୍ଥାନରେ ଅଶ୍ୱିନ ପଟେଲଙ୍କୁ ପ୍ରାର୍ଥୀ କରିଛି। ଏଥିରେ ରାଗି ଯାଇ ସେ ଦଳରୁ ଇସ୍ତଫା ଦେଇଛନ୍ତି। ଇସ୍ତଫା ଦେବା ପରେ ମଧୁ କହିଛନ୍ତି, ଯଦି ତାଙ୍କ ସମର୍ଥକ ଚାହିଁବେ ତେବେ ସେ ସ୍ବାଧୀନ ଭାବେ ନିର୍ବାଚନ ଲଢ଼ିବେ।
