ଢେଙ୍କାନାଳ ଅଫିସ,୨।୧: କଟକ ଜିଲା ଆଠଗଡ଼ ଷ୍ଟେଟ ବ୍ୟାଙ୍କ ଇଣ୍ଡିଆର କ୍ୟାଶ ଭ୍ୟାନ୍ରୁ ୨୦୨୧ ଅକ୍ଟୋବର ୧୧ରେ ୧ କୋଟି ୬ଲକ୍ଷ ଟଙ୍କା ଲୁଟ୍ ହୋଇଥିଲା। ଘଟଣାର ୪୫ ମିନିଟ୍ ମଧ୍ୟରେ ଢେଙ୍କାନାଳ ସଦର ଥାନା ଭୋଜଦେଇପୁର ଗ୍ରାମରୁ ଉକ୍ତ ଲୁଟ୍ ଟଙ୍କାକୁ ଜବତ କରିଥିଲା ଢେଙ୍କାନାଳ ସଦର ଥାନା ପୋଲିସ। ଅଭିଯୁକ୍ତଙ୍କୁ ଗିରଫ କରିବା ସହିତ ଲୁଟ୍ରେ ସମ୍ପୃକ୍ତ କାର୍ ମଧ୍ୟ ଜବତ କରାଯାଇଥିଲା। ସଦର ଥାନାଧିକାରୀ ଅଭିନବ ଡାଳୁଆଙ୍କ ସମେତ ୬ କର୍ମଚାରୀଙ୍କ ଉପସ୍ଥିତ ବୁଦ୍ଧି ଯୋଗୁ ଟଙ୍କା ଉଦ୍ଧାର କରାଯାଇପାରିଥିଲା। ଶୁକ୍ରବାର ପୂର୍ବାହ୍ନରେ କଟକଠାରେ ଦାୟିତ୍ୱ ହସ୍ତାନ୍ତର ପୂର୍ବରୁ ପୋଲିସ ଜିଡି ଅଭୟ ସମ୍ପୃକ୍ତ ୬ଜଣଙ୍କୁ ସମ୍ବର୍ଦ୍ଧିତ କରିଛନ୍ତି। ସେମାନେ ହେଲେ ଥାନାଧିକାରୀ ଅଭିନବ ଡାଳୁଆ, ଏସ୍ଆଇ ପ୍ରଦୀପ ରଞ୍ଜନ ପାତ୍ର, କର୍ମଚାରୀ ଗଗନ ସିଂ, ସୁବାସ ଚନ୍ଦ୍ର ଭୋଇ, ବିଷ୍ଣୁ ଦେହୁରୀ ଏବଂ ସନ୍ତୋଷ ସାହୁ। ଘଟଣା ଦିନ ଆଠଗଡ଼ ପୋଲିସଠାରୁ ସୂଚନା ପାଇବା ପରେ ସଦର ଥାନା ପକ୍ଷରୁ ୫୫ନଂ. ଜାତୀୟ ରାଜପଥରେ ନାକାବନ୍ଦୀ କରାଯାଇଥିଲା। ଲୁଟେରାମାନେ ଫେରାର୍ ହୋଇଯିବାକୁ ଉଦ୍ୟମ କରୁଥିବାବେଳେ ପୋଲିସ କର୍ମଚାରୀମାନେ ସେମାନଙ୍କୁ ପିଛା କରି ଧରିଥିଲେ। କାର ମଧ୍ୟରୁ ୧କୋଟି ୬ଲକ୍ଷ ଟଙ୍କା ଉଦ୍ଧାର ହୋଇଥିଲା।
