କୋଣାର୍କ,୨୧ା୫(ଡି.ଏନ୍.ଏ.): କୋଣାର୍କସ୍ଥିତ ଭଗବତୀ ମହାବିଦ୍ୟାଳୟରେ ୨୦୧୭ଠାରୁ ୨୦୨୨ ମସିହା ପର୍ଯ୍ୟନ୍ତ ତତ୍କାଳୀନ କିରାଣିଙ୍କ ଦ୍ବାରା ନକଲି ରସିଦ ବଳରେ ୬ ଲକ୍ଷ ଟଙ୍କା ହଡ଼ପ କରାଯାଇଥିବା ନେଇ ମହାବିଦ୍ୟାଳୟର ପୁରାତନ ଛାତ୍ର ସଂଗଠନ ପକ୍ଷରୁ ଗୁରୁବାର ଅଭିଯୋଗ କରାଯାଇଛି। ଏଥିସହ ଉଚ୍ଚଶିକ୍ଷା ବିଭାଗ ପକ୍ଷରୁ ଏହାର ଉଚ୍ଚସ୍ତରୀୟ ତଦନ୍ତ କରିବା ପାଇଁ ସଂଗଠନ ପକ୍ଷରୁ ଚିଠି ଜରିଆରେ ଦାବି ଜଣାଇଛନ୍ତି। ପ୍ରକାଶ ଯେ, ଗତ କିଛିମାସ ତଳେ ଭଗବତୀ ମହାବିଦ୍ୟାଳୟରେ ବର୍ତ୍ତମାନ କାର୍ଯ୍ୟରତ ଥିବା କିରାଣି କଲେଜର ରସିଦ ବହି, ଅନ୍ୟାନ୍ୟ ଜରୁରୀ କାଗଜପତ୍ର ତଦାରଖ କରୁଥିବା ବେଳେ ପୂର୍ବ ବର୍ଷଗୁଡ଼ିକର ରସିଦ ବହିର ଟଙ୍କା ସହ ଏବେକାର ରସିଦ ବହିର ଟଙ୍କା ମେଳ ହେଉ ନ ଥିବା ଦେଖିବାକୁ ପାଇଥିଲେ। ଗତ ୫ବର୍ଷ ମଧ୍ୟରେ ପ୍ରାୟ ୬ ଲକ୍ଷ ଟଙ୍କାର ଅର୍ଥ ହେରଫେର ହୋଇଥିବା ଜଣାପଡ଼ିବା ପରେ କଲେଜ କର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲା। ତେବେ ପୂର୍ବରୁ ଥିବା କିରାଣି ଜଣକ କଲେଜର ନକଲି ରସିଦ ବହି ଛାପିବା ସହ ଏହା ସାହାଯ୍ୟରେ ଛାତ୍ରୀଛାତ୍ରଙ୍କଠାରୁ ଚଞ୍ଚକତା କରି ଟଙ୍କା ଆଦାୟ କରୁଥିଲେ। ଯେପରି କଲେଜର ଛାତ୍ରୀଛାତ୍ରଙ୍କ ସେକ୍ସନ ଚାର୍ଜ ପାଇଁ ରସିଦ ବହିରେ ୨୫୬ ଥିବାବେଳେ ଉକ୍ତ କିରାଣି ଜଣକ ନକଲି ରସିଦ ବହି ଦ୍ୱାରା ୨୦୫୬ ଟଙ୍କା ଆଦାୟ କରୁଥିଲେ। ଏପରି ବିଭିନ୍ନ ଉପାୟରେ ୫ ବର୍ଷ ମଧ୍ୟରେ ପ୍ରାୟ ୬ଲକ୍ଷ ଟଙ୍କା ଆତ୍ମସାତ କରିଥିଲେ। ଏହି ଘଟଣା ବିଷୟରେ ମହାବିଦ୍ୟାଳୟର ପୁରାତନ ଛାତ୍ର ସଂଗଠନ ଜାଣିବା ପରେ ଉଚ୍ଚ ଶିକ୍ଷା ବିଭାଗଙ୍କ ନିକଟରେ ଅଭିଯୋଗ କରିଛି। ଉକ୍ତ କିରାଣି ଜଣକ ଗତ ଜାନୁୟାରୀରେ କାକଟପୁରର ଏକ କଲେଜକୁ ବଦଳି ହୋଇଥିବା ଜଣାପଡିଛି। ଅପରପକ୍ଷେ ଏହି ଘଟଣା ସମ୍ପର୍କରେ ମହାବିଦ୍ୟାଳୟ ଅଧ୍ୟକ୍ଷ ଅବଗତ ଥିବାବେଳେ କ’ଣ ପାଇଁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ସମ୍ପୃକ୍ତ କିରାଣି ଜଣଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିନାହାନ୍ତି ବୋଲି ପୁରାତନ ଛାତ୍ର ସଂଘ, ବୁଦ୍ଧିଜୀବୀ ଓ କୋଣାର୍କ ଅଞ୍ଚଳବାସୀ ପ୍ରଶ୍ନ କରିଛନ୍ତି। ଏଥିସହ ଏହି ଘଟଣାରେ ସମ୍ପୃକ୍ତ ପୂର୍ବତନ କିରାଣିଙ୍କ ସହ ମହାବିଦ୍ୟାଳୟର ଅନ୍ୟ କେଉଁ କର୍ମଚାରୀଙ୍କ ସମ୍ପୃକ୍ତି ରହିଛି ନା ନାହିଁ ସେନେଇ ଉଚ୍ଚସ୍ତରୀୟ ତଦନ୍ତ କରିବା ପାଇଁ ସାମାଜିକ କର୍ମୀ, ବୁଦ୍ଧିଜୀବୀ ଓ ପୁରାତନ ଛାତ୍ର ସଂଘ ପକ୍ଷରୁ ଅଭିଯୋଗ ହେଉଛି। ଏ ନେଇ ମହାବିଦ୍ୟାଳୟ ଅଧ୍ୟକ୍ଷ ଅବତାର ମିଶ୍ର କୁହନ୍ତି, ଘଟଣା ବିଷୟରେ ଜାଣିବା ପରେ ସମ୍ପୃକ୍ତ କିରାଣିଙ୍କୁ ଅବଗତ କରାଯାଇଛି। ଏହି ଘଟଣାକୁ ତଦାରଖ କରିବା ପାଇଁ ଏକ କମିଟି ଗଠନ କରାଯାଇ ତାଙ୍କଠାରୁ ସମ୍ପୂର୍ଣ୍ଣ ଟଙ୍କା ଆଦାୟ କରାଯିବା ସହ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି।
