ନୂଆପଡ଼ା/କୋମନା,୨୬ା୧୨(ମକାରୁ ବେମାଲ/ମହେଶ ବାଗ): ନୂଆପଡ଼ା ଜିଲା କୋମନା ଅଞ୍ଚଳରେ ଦାଦନ ଦଲାଲ ସକ୍ରିୟ ରହିଛନ୍ତି। ପ୍ରତିଦିନ ଜିଲାରୁ ଶତାଧିକ ଶ୍ରମିକ ଚାଲାଣ ହେଉଥିବା ଅଭିଯୋଗ ହୋଇଆସୁଛି। ଏପରିସ୍ଥଳେ ଶୁକ୍ରବାର କୋମନା ବସ୍ଷ୍ଟାଣ୍ଡରୁ ବାହାର ରାଜ୍ୟକୁ ଚାଲାଣ ବେଳେ କୋମନା ପୋଲିସ ୬ ଜଣ ଦାଦନ ଶ୍ରମିକଙ୍କୁ ଉଦ୍ଧାର କରିଛି। ସେମାନେ ହେଲେ କୋମନା ଥାନା ନୂଆଗାଁର ପୀତାମ୍ବର ତାଣ୍ଡି (୩୦), ନକୁଳ ତାଣ୍ଡି (୩୫), ରଘୁ ତାଣ୍ଡି (୬୦), ନରେଶ ରଣା(୨୯), ସବ୍ୟା ତାଣ୍ଡି (୩୦) ଓ କମଳା ତାଣ୍ଡି (୫୫)। ସୂଚନା ଅନୁଯାୟୀ ଶୁକ୍ରବାର ସକାଳେ କୋମନା ପୋଲିସ ବସ୍ଷ୍ଟାଣ୍ଡ ପରିସରରେ ପାଟ୍ରୋଲିଂ କରୁଥିବା ସମୟରେ କୌଣସି ସୂତ୍ରରୁ ଖବର ପାଇ ସେଠାରେ ଚଢ଼ାଉ କରିଥିଲା। ଶ୍ରମିକମାନେ ବାହାର ରାଜ୍ୟକୁ ଯିବା ପାଇଁ ବସ୍ ଅପେକ୍ଷାରେ ଥିବାବେଳେ ପୋଲିସ ସେମାନଙ୍କୁ ଅଟକ ରଖି ପଚରାଉଚରା କରିଥିଲା। ଶ୍ରମିକମାନେ ଏହାକୁ ସ୍ବୀକାର କରି ଆମେ ଇଟା ତିଆରି କରିବା ପାଇଁ ବାହାରକୁ ଯିବାକୁ ବାହାରିଥିଲୁ ବୋଲି କହିଥିଲେ। ସେମାନଙ୍କଠାରେ ବୈଧ କାଗଜପତ୍ର ନ ଥିବାରୁ ଏହା ଏକ ଦାଦନ ଚାଲାଣ ବୋଲି ପୋଲିସ ସ୍ପଷ୍ଟ କରିଛି। ପୋଲିସ ୬ ଜଣଙ୍କୁ ଉଦ୍ଧାର କରି ନିଜ ଗ୍ରାମକୁ ଫେରିଯିବା ବ୍ୟବସ୍ଥା କରିଛି। ଏହି ଘଟଣାରେ ସମ୍ପୃକ୍ତ ଥିବା ଦଲାଲ ଫେରାର ରହିଥିବା ପୋଲିସ ପ୍ରକାଶ କରିଛି। ସମ୍ପୃକ୍ତ ଦଲାଲଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।
