ଶ୍ରୀନଗର,୧୦।୧୧: ଜମ୍ମୁ-କଶ୍ମୀରରେ ଟାର୍ଗେଟ କିଲିଂ ଘଟଣାର ବୃଦ୍ଧି ପରେ କେନ୍ଦ୍ର ସରକାର ଏକ ବଡ ନିଷ୍ପତ୍ତି ନେଇଛନ୍ତି। ଆତଙ୍କବାଦୀଙ୍କୁ କଡ଼ା ଜବାବ ଦେବାକୁ ସଶସ୍ତ୍ର ପୋଲିସ ବାହିନୀ (ସିଏପିଏଫ୍) ର ୫୫ କମ୍ପାନୀ ଅର୍ଥାତ୍ ୫,୫୦୦ରୁ ଅଧିକ ଅତିରିକ୍ତ କର୍ମଚାରୀଙ୍କୁ ଜମ୍ମୁ-କଶ୍ମୀରକୁ ପଠାଯାଇଛି। ଗତ କିଛି ମାସ ହେବ ଆତଙ୍କବାଦୀମାନେ ଅଣ-କଶ୍ମୀରୀ ବାସିନ୍ଦାଙ୍କୁ ଟାର୍ଗେଟ କରୁଛନ୍ତି। ଏଭଳି ଲୋକଙ୍କ ହତ୍ୟା ପରେ ସରକାର ସୁରକ୍ଷା ବାହିନୀଙ୍କ ସଂଖ୍ୟା ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି।
ଜଣେ ସ୍ଥାନୀୟ ଅଧିକାରୀଙ୍କ ଅନୁସାରେ ସାଧାରଣ ନାଗରିକଙ୍କ ଟାର୍ଗେଟ କିଲିଂକୁ ଦୃଷ୍ଟିରେ ରଖି ଜମ୍ମୁ-କଶ୍ମୀରରେ ପ୍ରାୟ ୫୫ ନୂଆ କମ୍ପାନୀ ସୁରକ୍ଷା କାର୍ଯ୍ୟରେ ମୁତୟନ କରାଯିବା ନେଇ ସ୍ବରାଷ୍ଟ୍ର ମନ୍ତ୍ରଣାଳୟ ନିର୍ଦ୍ଦେଶ ଦେଇଛି। ଆସନ୍ତା ସପ୍ତାହ ସୁଦ୍ଧା ଶେଷ ପାଞ୍ଚଟି କମ୍ପାନୀ ଜମ୍ମୁ-କଶ୍ମୀରରେ ମୁତୟନ ହେବେ ବୋଲି ସେ କହିଛନ୍ତି। କେନ୍ଦ୍ରୀୟ ସରକାର ରିଜର୍ଭ ପୋଲିସ ଫୋର୍ସ (ସିଆର୍ପିଏଫ୍)ର ୨୫ କମ୍ପାନୀ ଏବଂ ସୀମା ସୁରକ୍ଷା ବଳ (ବିଏସଏଫ) ଟିମ୍ଙ୍କୁ ଜମ୍ମୁ-କଶ୍ମୀରକୁ ପଠାଯାଇଛି।
ସୋମବାର ଆତଙ୍କବାଦୀମାନେ ପୁରୁଣା ଶ୍ରୀନଗରର ବୋହରୀ କାଦଲ ଅଞ୍ଚଳରେ ଜଣେ କଶ୍ମୀରୀ ପଣ୍ଡିତଙ୍କ ଦୋକାନର ଜଣେ ବିକ୍ରେତାଙ୍କୁ ଗୁଳି କରି ହତ୍ୟା କରିଥିଲେ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି। ଏହି ଘଟଣାର ଗୋଟିଏ ଦିନ ପୂର୍ବରୁ ଶ୍ରୀନଗରର ବାଟମାଲୁ ଅଞ୍ଚଳରେ ଆତଙ୍କବାଦୀମାନେ ଜଣେ ପୋଲିସ କର୍ମଚାରୀଙ୍କୁ ହତ୍ୟା କରିଥିଲେ।
ଏ ସମ୍ପର୍କରେ ସିଆର୍ପିଏଫ୍ ପକ୍ଷରୁ କୁହାଯାଇଛି ଯେ, ଜମ୍ମୁ-କଶ୍ମୀରରେ ସାଧାରଣ ନାଗରିକଙ୍କ ହତ୍ୟାକୁ ଦୃଷ୍ଟିରେ ରଖି ଏହି ଅତିରିକ୍ତ କମ୍ପାନୀ ପଠାଯାଇଛି।
ଚଳିତ ବର୍ଷ ଅପରେଶନ୍ ଅଲ୍ ଆଉଟ୍ ସମୟରେ ଏନ୍କାଉଣ୍ଟରରେ ୧୧୨ ଜଣ ଆତଙ୍କବାଦୀ ନିହତ ହୋଇଛନ୍ତି ଏବଂ ୧୩୫ ଜଣଙ୍କୁ ଗିରଫ କରାଯାଇଥିବା ସିଆର୍ପିଏଫ୍ ପକ୍ଷରୁ ସୂଚନା ପ୍ରଦାନ କରାଯାଇଛି।
