ରାଜନଗର, ୩୧ା୩ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ଗହୀରମଥା ସାମୁଦ୍ରିକ ଅଭୟାରଣ୍ୟରେ ଚଳିତବର୍ଷ ଡଲ୍ଫିନ୍ଙ୍କ ସଂଖ୍ୟା ଆଶାତୀତ ବୃଦ୍ଧି ପାଇଥିବା ରିପୋର୍ଟ ବନ ବିଭାଗ ପକ୍ଷରୁ ବୁଧବାର ପ୍ରକାଶ ପାଇଛି। ଚଳିତବର୍ଷ ଗହୀରମଥା ସାମୁଦ୍ରିକ ଅଭୟାରଣ୍ୟ ଏବଂ ଭିତରକନିକା ଜାତୀୟ ଉଦ୍ୟାନରେ ପ୍ରବାହିତ ନଦୀ ନାଳରେ ଡଲଫିନ ଗଣନା କରାଯାଇଥିଲା। ଏହି ଗଣନା ସମୟରେ ୫ ପ୍ରଜାତିର ଡଲଫିନ ଦେଖିବାକୁ ମିଳିଥିଲା। ଇରାୱାର୍ଡି ପ୍ରଜାତିର ଡଲ୍ଫିନ୍ ୪୫ଟି, ବଟଲ ନୋଜ ପ୍ରଜାତିର ୧୩୫ଟି, ହମ୍ପବ୍ୟାକ୍ ଜାତୀୟ ଡଲ୍ଫିନ୍ ୩୩୨ଟି, ଷ୍ଟ୍ରିପେଡ ଜାତୀୟ ଡଲ୍ଫିନ୍ ୧୩ଟି, ସ୍ପାଇନର ଜାତୀୟ ଡଲ୍ଫିନ୍ ୧୫ଟି ମୋଟ ୫୪୦ଟି ଡଲଫିନ ଗଣନା ସମୟରେ ଚିହ୍ନଟ ହୋଇଛନ୍ତି। ଗତବର୍ଷ ଗହୀରମଥା ଓ ଭିତରକନିକା ସାମୁଦ୍ରିକ ଅଭୟାରଣ୍ୟରେ ଗଣନା ସମୟରେ ୩ଟି ପ୍ରଜାତିର ୩୪୨ଟି ଡଲ୍ଫିନ୍ ଚିହ୍ନଟ ହୋଇଥିଲା। ଚଳିତବର୍ଷ ପାଗ ଅନୁକୂଳ ଥିବାରୁ ଗଣନା ସମୟରେ ଏମାନଙ୍କ ସଂଖ୍ୟା ୧୯୮ଟି ଅଧିକ ଚିହ୍ନଟ କରାଯାଇଛି। ଗତବର୍ଷ ଇରାୱାଡି ପ୍ରଜାତିର ଡଲଫିନ ୩୯ଟି ଥିବା ବେଳେ ଚଳିତବର୍ଷ ୬ଟି ବୃଦ୍ଧି ପାଇ ୪୫ଟି, ବଡଲନୋଜ ଗତବର୍ଷ ୨୨ଟି ଚିହ୍ନଟ ହୋଇଥିବା ବେଳେ ଚଳିତ ବର୍ଷ ୧୧୩ଟି ବୃଦ୍ଧି ପାଇ ୧୩୫ଟି, ହମ୍ପବ୍ୟାକ୍ ଜାତୀୟ ଡଲଫିନ ଗତବର୍ଷ ୨୮୧ଟି ଚିହ୍ନଟ ହୋଇଥିବା ବେଳେ ଚଳିତବର୍ଷ ୫୧ଟି ବୃଦ୍ଧି ପାଇ ୩୩୨ରେ ପହଞ୍ଚତ୍ଛି। ଗତବର୍ଷ ଡିସେମ୍ବର ୧୬ ଠାରୁ ଭିତରକନିକା ଜାତୀୟ ଉଦ୍ୟାନର ନଦୀ ଓ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳରେ ଡଲଫିନ୍ ଗଣନା କରାଯାଇଥିଲା। ଏହି ଗଣନା ପ୍ରକ୍ରିୟାରେ ରାଜନଗର ଡିଏଫ୍ଓ ଡ. ଯଜ୍ଞଦତ ପତି, ପଶ୍ଚିମବଙ୍ଗର ଅବସରପ୍ରାପ୍ତ ପିସିସିଏଫ୍ ଏନ.ଭି. ରାଜଶେଖର, ବୈଜ୍ଞାନିକ ଆଣ୍ଟୋନୀ ଜନସନଙ୍କ ନେତୃତ୍ୱରେ ୯ଟି ଟିମ୍ ଏହି ଗଣନାରେ ସାମିଲ ହୋଇଥିଲେ। ଏହି ଗଣନା ଆଉଟର ହୁଲଇର ଦ୍ୱୀପଠାରୁ ଚିଚିଂରି ମୁହାଣ, ବରୁଣେଇ ମୁହାଣରୁ ପାରାଦୀପ, ହଂସିଣା ବ୍ରିଜରୁ ମାଇପୁରା ମାଉଥ୍, ରାଜନଗର ହଂସୁଆ ନଦୀରୁ ଖୋଳା, ଖୋଳାରୁ ଧାମରା ମୁହାଣ ଭାୟା ନଳିତାପାଟିଆ, କାଳିଭଞ୍ଜଡିଆ ଦ୍ୱୀପ, ଜମ୍ବୁ ଦ୍ୱୀପ, ଖରନାସୀରୁ ହୁକିଟୋଲା ଦ୍ୱୀପ, ପାରାଦୀପରୁ ଜଟାଧାର ମୁହାଣ ଏବଂ ଜଟାଧାର ମୁହାଣରୁ ଦେବୀ ମୁହାଣ ଯାଏ ୯ଟି ଟିମ୍ ଗଣନା କରିଥିଲେ। ଓଡିଶାର ୫ଟି ଡିଭିଜନଠାରୁ ସର୍ବାଧିକ ଏବଂ ସର୍ବକାଳୀନ ଗହୀରମଥା ସାମୁଦ୍ରିକ ଅଭୟାରଣ୍ୟରେ ୫୪୦ଟି ଡଲଫିନଙ୍କୁ ଚିହ୍ନଟ ହୋଇଛି।
