ବ୍ରହ୍ମପୁର ଅଫିସ,୨୯।୫: ବ୍ରହ୍ମପୁର ଅବକାରୀ ଗୁଇନ୍ଦା ଡେପୁଟିକମିଶନର ଡ଼ମ୍ବୁରଧର ଖଣ୍ଡାଙ୍କ ନିର୍ଦ୍ଦେଶରେ ଏକ ଟିମ୍ ଫାଷ୍ଟଗେଟ୍ ଛକରେ ଗାଡ଼ି ଚେକିଂ କରିଥିଲା। ଏକ ଗଞ୍ଜେଇ ଭର୍ତ୍ତି କାର ଜବତ ସହ ଚାଲାଣକାରୀଙ୍କୁ କାବୁ କରାଯାଇଛି। ଅଭିଯୁକ୍ତ ଜଣଙ୍କ ପୁରୀ ଅମଲା କ୍ଲବ ନିକଟ କଲେଜ ରୋଡର ସିରିଷ ଚନ୍ଦ୍ର ବେହେରାଙ୍କ ପୁଅ ହିମାଂଶୁ ବେହେରା(୨୮)। ଟିମ ଉକ୍ତ କାର ଭିତରୁ ୫୦ କେଜି ଗଞ୍ଜେଇ ଜବତ କରିଥିଲା। ହିମାଂଶୁ କନ୍ଧମାଳ ଜିଲାରୁ ଗଞ୍ଜେଇ ବେଆଇନ ଭାବେ ଆଣି ବ୍ରହ୍ମପୁର ୃ ପୁରୀ ଚାଲାଣ କରୁଥିଲେ ବୋଲି ଅବକାରୀ ଡେପୁଟି ସୁପେରଟେଣ୍ଡେଣ୍ଟ କୁବେର ସେଠୀ ସୂଚନା ଦେଇଛନ୍ତି। ଜବତ ଗଞ୍ଜେଇ ଓ କାରର ମୂଲ୍ୟ ଆନୁମାନିକ ୧୫ଲକ୍ଷ ଟଙ୍କା ହେବ ବୋଲି ସେ କହିଛନ୍ତି। ଗିରଫ ଅଭିଯୁକ୍ତଙ୍କୁ ମାମଲା ନମ୍ବର ୯୬/୨୩-୨୪ ରେ ସୋମବାର କୋର୍ଟ ଚାଲାଣ କରାଯିବ ବୋଲି ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ବ୍ରହ୍ମପୁର ଦେଇ ଗଞ୍ଜେଇ ଚାଲାଣ ହେଉଥିବା ନେଇ ଅବକାରୀ ବିଭଗକୁ ଖବର ମିଳିଥିଲା। ସୋମବାର ବଢି ଭୋର ଡେପୁଟି ସୁପେରଟେଣ୍ଡେଣ୍ଟ ସେଠୀଙ୍କ ନେତୃତ୍ୱରେ ଏକ ଟିମ ଫାଷ୍ଟଗେଟ ଛକରେ ଯାନବାହନ ଯାଞ୍ଚ କରୁଥିଲା। ସେହି ସମୟରେ ବ୍ରହ୍ମପୁର ଅଭିମୁଖେ ଆସୁଥିବା ଏକ ହୋଣ୍ଡା କାର ନମ୍ବର (ଓ -୦୨ଏଜାଡ଼ – ୮୨୦୧ )କୁ ଅଟକାଇ ଯାଞ୍ଚ କରାଯାଇଥିଲା। କାର ଭିତରେ ୫୦ କେଜି ଗଞ୍ଜେଇ ରହିଥିବା ଦେଖିବାକୁ ମିଳିଥିଲା। ବେଆଇନ ଭାବେ ଗଞ୍ଜେଇ ଚାଲାଣ ଅଭିଯୋଗରେ ଅବକାରୀ ଟିମ ଚାଲାଣକାରୀ ହିମାଂଶୁଙ୍କୁ ଗିରଫ କରିଥିଲା। ଡେପୁଟି ସୁପେରଟେଣ୍ଡେଣ୍ଟ ସେଠୀଙ୍କ ନେତୃତ୍ୱରେ ଏକ ଟିମ ଏହି ଚଢ଼ାଉ କରାଯାଇଥିଲା। ଏଥିରେ ଏସଆଇ ଆଜିତ କୁମାର ନାୟକ, କନେଷ୍ଟେବଳ କପିଳାଶ ଭତ୍ରା, କୁମୁଦ ପ୍ରଧାନ, ବଳରାମ ଜେନା, ସୁବ୍ରତ ବେହେରା, ସନ୍ତୋଷ ନାୟକ ଭଗବାନ ହେମ୍ରମ ପ୍ରମୁଖ ସାମିଲ ଥିଲେ।
