ଭୁବନେଶ୍ୱର,୩।୯(ସୂର୍ଯ୍ୟକାନ୍ତ ବେହେରା)ରାଜ୍ୟ ତଥା ବାହାରେ ଥିବା ବଡ଼ ବଡ଼ କଲେଜ ଓ ଶିକ୍ଷାନୁଷ୍ଠାନରେ ଆଡ୍ମିଶନ କରାଇ ଦେବାକୁ କହି ଠକେଇ କରୁଥିବା ଏକ ବଡ଼ ର଼୍ୟାକେଟ ଧରାପଡିଛି। କମିଶନରେଟ ପୋଲିସର ସ୍ପେଶାଲ କ୍ରାଇମ୍ ୟୁନିଟ୍ ସମ୍ପୃକ୍ତ ୨ଉଚ୍ଚ ଶିକ୍ଷିତ ଯୁବକଙ୍କୁ ଗିରଫ କରିବା ସହ ରାକେଟର ପର୍ଦ୍ଦାଫାଶ କରିଛି। ଅଭିଯୁକ୍ତଦ୍ୱୟ ହେଲେ ମୟୂରଭଞ୍ଜ ଗଦାସାହି ଥାନା ଅଞ୍ଚଳର ଅଭିନନ୍ଦନ ବାରିକ ଓ ଜଗତ୍ସିଂହପୁରର ରାଜେଶ ରୋଶନ ସାହୁ। ସେମାନଙ୍କଠାରୁ ୨ଟି ଦାମୀ କାର, ୨ଟି ଲାପ୍ଟପ୍, ୩ଟି ଟଙ୍କା ଗଣା ମେଶିନ, ୫ ଲକ୍ଷ ୪୭ ହଜାର ଟଙ୍କା, ପ୍ରିଣ୍ଟର, ବ୍ରୋଚର, ହ୍ବାଟ୍ସଆପ୍ ଚାର୍ଟ ଓ ୭ ମୋବାଇଲ ଫୋନ୍ ଆଦି ଜବତ ହୋଇଛି। ରାଜେଶ ଇଲେକ୍ଟ୍ରୋନିକ୍ସ ଆଣ୍ଡ୍ ଇଲେକ୍ଟ୍ରିକାଲ୍ସରେ ବି.ଟେକ ଏବଂ ଅଭନନ୍ଦନ ଡିପ୍ଲୋମା ଇନ୍ ଇଲେକ୍ଟ୍ରିକାଲ ପାଠ ପଢ଼ିଛନ୍ତି। ଅଭିଯୁକ୍ତ ଦ୍ୱୟ ଏନ୍ଆର୍ଆଇ କୋଟାରେ ଇଞ୍ଜିନିୟରଂ, ମେଡିକାଲ, ଏଗ୍ରିକଲଚର, ନର୍ସିଂରେ ନାମ ଲେଖାଇ ଦେବାକୁ କହି ୫ହଜାରରୁ ଅଧିକ ପିଲା ଓ ସେମାନଙ୍କ ଅଭିଭାବକଙ୍କଠାରୁ ଲକ୍ଷ ଲକ୍ଷ ଠକି ନେଇଥିବାବେଳେ ଏହି ଠକେଇ ଟଙ୍କା କୋଟିଏରୁ ଊର୍ଦ୍ଧ୍ୱ ହେବ ବୋଲି ଅନୁମାନ କରାଯାଉଛି। ଏପରିକି ଠକେଇ ଟଙ୍କାରେ ସେମାନେ ଅତ୍ୟନ୍ତ ବିଳାସପୂର୍ଣ୍ଣ ଜୀବନ ବିତାଉଥିବା ଥିବା ତଦନ୍ତବେଳେ ଜଣାପଡିଛି। ସେମାନଙ୍କୁ ରିମାଣ୍ଡରେ ଆଣି ଆଡମିଶନ ନାଁରେ ଚାଲିଥିବା ସ୍କାମ ସିଣ୍ଡିକେଟ୍ର ଗୁମର ଖୋଲିବାକୁ ସ୍ପେଶାଲ କ୍ରାଇମ୍ ୟୁନିଟ୍ ଆଶା ରଖିଛି।
ଠକେଇର ଶିକାର ହୋଇଥିବା ଝାରସୁଗୁଡାର ଜଣେ ବ୍ୟବସାୟୀ ଏନେଇ ନୟାପଲ୍ଲୀ ଥାନାରେ ଅଭିଯୋଗ କରିଥିଲେ। ଏହି ଠକେଇ ର଼୍ୟାକେଟ ସାରା ରାଜ୍ୟକୁ ବ୍ୟାପିଥିବା ଜଣାପଡିବା ପରେ ସ୍ପେଶାଲ କ୍ରାଇମ୍ ୟୁନିଟ୍ ତଦନ୍ତ ଦାୟିତ୍ୱ ନେଇଥିଲା। ଅଭିଯୋଗ ଅନୁସାରେ, ବ୍ୟବସାୟୀଙ୍କ ଝିଅର ଏକ ପ୍ରମୁଖ ବିଶ୍ବବିଦ୍ୟାଳୟରେ ମେଡିକାଲ ସିଟ୍ରେ ଆଡ୍ମିଶନ କରାଇ ଦେବାକୁ କହି ଅଭିଯୁକ୍ତମାନେ ତାଙ୍କଠାରୁ ୩ଲକ୍ଷ ଟଙ୍କା ନେଇଥିଲେ। ମ୍ୟାନେଜମେଣ୍ଟ କୋଟାରେ ଆଡ୍ମିଶନ ପରେ ଜାତୀୟ ସ୍ବାସ୍ଥ୍ୟ ଶିକ୍ଷା ଅନୁଷ୍ଠାନ ପକ୍ଷରୁ ୨ ଟଙ୍କା ଫେରସ୍ତ କରାଯିବ ବୋଲି କହିଥିଲେ। ହେଲେ ସିକ୍ୟୁରିଟି ଟଙ୍କା ନ ମିଳିବାରୁ ସେ ଅଭିଯୁକ୍ତଙ୍କୁ ଟଙ୍କା ମାଗିଥିଲେ। ହେଲେ ସେମାନେ ଧମକ ଦେବାରୁ ବ୍ୟବସାୟୀ ଥାନାର ଦ୍ୱାରସ୍ଥ ହୋଇଥିଲେ।
ଯଦି କୌଣସି ବ୍ୟକ୍ତି ଏହି ଠକ କିମ୍ବା ଡିଏମ୍ଏଫ୍ ଏକାଡେମୀ ଦ୍ୱାରା ଠକେଇର ଶିକାର ହୋଇଛନ୍ତି, ସେମାନେ ତୁରନ୍ତ ଅଭିଯୋଗ କରିବାକୁ କମିଶନରେଟ ପକ୍ଷରୁ ଅନୁରୋଧ କରାଯାଇଛି।
