ବମ୍ବେ: ବଲିଉଡ୍ରେ ବିଟ୍ଟୁ ଏବଂ ରେମ୍ବୋ ନାମରେ ଖ୍ୟାତ ରଣବୀର ସିଂହଙ୍କ ଆଜି ହେଉଛି ‘ହାପି ବର୍ଥ ଡେ’। ନିଜର ଫ୍ୟାଶନ ସେନ୍ସକୁ ନେଇ ସର୍ବଦା ସମାଲୋଚିତ ହୋଇଥାନ୍ତି ସେ। ହେଲେ ନିଜର ଅଭିନୟରେ ଦର୍ଶକଙ୍କୁ ବାନ୍ଧି ରଖିବାର କ୍ଷମତା ଅଛି ତାଙ୍କ ନିକଟରେ। ପ୍ରଥମ ଫିଲ୍ମରୁ ସେ କ୍ୟାମେରା ସାମ୍ନାକୁ ଆସି ପ୍ରଶଂସିତ ହୋଇଥିଲେ। କହିବାକୁ ଗଲେ ସେ ଜଣେ ସଫଳ ଅଭିନେତା ସାଙ୍ଗକୁ ଭଲ ସ୍ବାମୀ ମଧ୍ୟ। ଅଭିନେତ୍ରୀ ଦୀପିକା ପାଦ୍ୟୁକୋନଙ୍କୁ ବିବାହ କରି ବେଶ ଖୁସିରେ ଦାମ୍ପତ୍ୟ ଜୀବନ ଅତିବାହିତ କରୁଛନ୍ତି ସେ।
ବର୍ତ୍ତମାନ ସମୟରେ ଆଗଧାଡ଼ିର ନାୟକ ହୋଇଥିବାରୁ ମୋଟା ଅଙ୍କର ପାଉଣା ନେଇଥାନ୍ତି ରଣବୀର। ବିଶେଷକରି ତାଙ୍କ ସଉକ ଅନ୍ୟ ମାନଙ୍କଠାରୁ ଭିନ୍ନ ଏବଂ ସମ୍ଭ୍ରାନ୍ତ ମଧ୍ୟ। ଏବେ ସେ ବାର୍ଷିକ ୩୦ ମିଲିୟନ ଡଲାରରୁ ଅଧିକ ଟଙ୍କା ରୋଜଗାର କରୁଛନ୍ତି। ଫିଲ୍ମ ବ୍ୟତିତ ବିଜ୍ଞାପନରୁ ମଧ୍ୟ ସେ ରୋଜଗାର କରୁଛନ୍ତି। ଏହାଛଡ଼ା ଫିଲ୍ମ ପିଛା ସେ ୧୩ କୋଟି ଓ ବିଜ୍ଞାପନ ପିଛା ୪ କୋଟି ଟଙ୍କା ଚାର୍ଜ କରୁଛନ୍ତି।
କାର୍ର ସଉକ ଥିବାରୁ ଅଭିନେତାଙ୍କ ପାଖରେ ରହିଛି ଅନେକ ଦାମୀ ଗାଡ଼ି। ମର୍ସଡିଜ୍ଠାରୁ ଆରମ୍ଭ କରି ଜାଗୁଆର, ରେଞ୍ଜ ରୋଭର ଆଦି ୯ କୋଟି ମୂଲ୍ୟର ଗାଡ଼ି ତାଙ୍କ ପାଖରେ ରହିଛି। ସେହିଭଳି ଜୋତାକୁ ପସନ୍ଦ କରୁଥିବାରୁ ହଜାରରୁ ଅଧିକ ଜୋତା ଅଛି ତାଙ୍କ ନିକଟରେ। ଏହାର ମୂଲ୍ୟ ୬୮ ଲକ୍ଷ ଟଙ୍କା ହେବ ବୋଲି କୁହାଯାଉଛି।
ସମ୍ପତ୍ତି ବିଷୟରେ କଥା ହେଲେ ଅଭିନେତା ୩୦୦ କୋଟି ସମ୍ପତ୍ତିର ମାଲିକ। ୨୦୧୫ରେ ସେ ଦକ୍ଷିଣ ମୁମ୍ବାଇରେ ୮ କୋଟି ଟଙ୍କା ବିନିମୟରେ ଆପାର୍ଟମେଣ୍ଟ କିଣିଥିଲେ। ମୁମ୍ବାଇରେ ଏକ ସି-ଫେସିଙ୍ଗ ଫ୍ଲାଟ୍ ମଧ୍ୟ ତାଙ୍କର ରହିଛି। ଏହାକୁ ସେ ୧୫ କୋଟି ଟଙ୍କା ଦେଇ କିଣିଛନ୍ତି। ତା ଛଡ଼ା ଗୋଆରେ ମଧ୍ୟ ୯ କୋଟି ମୂଲ୍ୟର ଏକ ବଙ୍ଗଳା ରହିଛି।
