ରାଞ୍ଚି,୨।୭: ଏକ ଦୁର୍ଘଟଣାକୁ କେନ୍ଦ୍ର କରି ଝାଡ଼ଖଣ୍ଡର ରାଞ୍ଚିରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିଛି। ଏହି ଘଟଣାରେ ୫ଜଣ ଗୁରୁତର ଆହତ ହୋଇଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ଏକ ଷ୍ଟୁଡିଓ ନିକଟରେ ଆଶିଷ ନାମକ ଜଣେ ଯୁବକ ବାଇକ୍ ରଖି ଛିଡାହୋଇଥିଲେ। ସେତିକିବେଳେ ଏକ ସ୍କୁଟି ଆଶିଷଙ୍କ ବାଇକ୍କୁ ଧକ୍କା ଦେଇଥିଲା। ଏନେଇ ଆଶିଷ ବାଇକ୍ ମରାମତି କରିବା ସହ କ୍ଷତିପୂରଣ ଦେବାକୁ ସେ ସ୍କୁଟି ଚାଳକଙ୍କୁ କହିଥିଲେ। ହେଲେ ସ୍କୁଟି ଚାଳକ କ୍ଷତିପୂରଣ ଦେବାକୁ ମନା କରିଦେଇଥିଲେ। ଏପରିକି ପରିବାର ଲୋକଙ୍କୁ ଘଟଣା ସମ୍ପର୍କରେ ଜଣାଇଥିଲେ। ପରବର୍ତ୍ତୀ ସମୟରେ ୧୫ରୁ ୨୦ଜଣ ବ୍ୟକ୍ତି ଠେଙ୍ଗା, ଲୁହା ରଡ ଏବଂ ଅସ୍ତ୍ରଶସ୍ତ୍ର ଧରି ଘଟଣାସ୍ଥଳରେ ପହଞ୍ଚି ଥିଲେ। ସେମାନେ କିଛି ବୁଝିବା ଆଗରୁ ଆଶିଷଙ୍କୁ ଆକ୍ରମଣ କରିଥିଲେ। ଏହାକୁ କେନ୍ଦ୍ର କରି ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିବା ସହ ଘଟଣାସ୍ଥଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଅନ୍ୟପକ୍ଷେ ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରି ସ୍ଥାନୀୟ ଲୋକେ ଥାନା ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ। ଉତ୍ତେଜନା ପାଇଁ ଦାୟୀ ବ୍ୟକ୍ତିବିଶେଷଙ୍କୁ ତୁରନ୍ତ ଗିରଫ କରି ଶାନ୍ତି ଫେରାଇ ଆଣିବାକୁ ଭାଜପା ମୁଖପାତ୍ର ପ୍ରତୁଲ ଶାହାଦେବ ଦାବି କରିଛନ୍ତି।
