ବ୍ରହ୍ମପୁର ଅଫିସ,୨।୧୦: ଗଞ୍ଜାମ ଜିଲାରେ ଏବେ ସାଇବର ଠକେଇ ଦିନକୁ ଦିନ ବଢ଼ିବାରେ ଲାଗିଛି। ଠକ ଗ୍ୟାଙ୍ଗ ବିଭିନ୍ନ ଉପାୟରେ ଲୋକମାନଙ୍କ ଲକ୍ଷ ଲକ୍ଷ ଟଙ୍କା ଠକୁଛନ୍ତି। ଏହି ଧାରାରେ ବ୍ରହ୍ମପୁର ସହରରେ ଥିବା ଜଣେ ବ୍ୟକ୍ତିଙ୍କଠାରୁ ଗ୍ୟାଙ୍ଗ ପ୍ରାୟ ୫. ୬୯ଲକ୍ଷ ଟଙ୍କା ଠକେଇ କରିଛନ୍ତି। ଏନେଇ ହର୍ଷବିହାରର ଅର୍ଜୁନ ସ୍ବାଇଁ ସାଇବର ଥାନାରେ ଅଭିଯୋଗ କରିଛନ୍ତି। ପୋଲିସ ନଂ.୪୨/୨୨ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
ପ୍ରକାଶ ଯେ, ଏକ ଅଜଣା ନମ୍ବରରୁ ଅର୍ଜୁନଙ୍କ ମୋବାଇଲକୁ ଆସିଥିଲା ଜଣେ ମହିଳାଙ୍କ ଫୋନ୍ କଲ୍। ଆପଣଙ୍କ କେଡିଟ୍ କାର୍ଡରେ ଥିବା ପଏଣ୍ଟଗୁଡ଼ିକ ସରିଯିବ, ତାକୁ କୌଣସି ସାମଗ୍ରୀ କିଣାକିଣିରେ ବ୍ୟବହାର କରିପାରିବେ କିମ୍ବା ଉକ୍ତ କାର୍ଡର ଡ୍ୟୁଜ୍ ବାନ୍ଧିବାରେ ବ୍ୟବହାର କରିପାରିବେ। ଏଥିପାଇଁ ଆପଣଙ୍କ କ୍ରେଡିଟ୍ କାର୍ଡର ଶେଷ ୪ଟି ନମ୍ବର କୁହନ୍ତୁ ଏବଂ ନିଜର ମୋବାଇଲ୍ ବ୍ୟାଙ୍କିଙ୍ଗ୍ ଆପ୍ ଖୋଲି ଓଟିପି ଜଣାନ୍ତୁ। ୪୦ମିନିଟ୍ ମଧ୍ୟରେ ଆସିଲା ୪ଟି ଓଟିପି। ସେସବୁ ଓଟିପି ନମ୍ବରଗୁଡିକ ଫୋନ୍ କରିଥିବା ମହିଳାଙ୍କୁ ଜଣାଇ ଦେଲେ ଉକ୍ତ କେଡ୍ରିଟ୍ କାର୍ଡ ଉପଭୋକ୍ତା। ଏହାର କିଛି ସମୟ ପରେ ତାଙ୍କ ଆକାଉଣ୍ଟରୁ ଟଙ୍କା ଉଠାଣ ହୋଇଥିବା ନେଇ ମେସେଜ୍ ଆସିଲା। କ୍ରେଡିଟ୍ କାର୍ଡ ଟୋଲ ଫ୍ରି ନମ୍ବରକୁ ଏ ସମ୍ପର୍କରେ ସେ ତୁରନ୍ତ ଜଣାଇବା ସହ କାର୍ଡ ବ୍ଲକ୍ କରିବାକୁ କହିଥିଲେ। ପରେ କ୍ରେଡିଟ୍ କାର୍ଡର ଷ୍ଟେଟ୍ମେଣ୍ଟରୁ ସେ ଜାଣିବାକୁ ପାଇଲେ ଯେ ତାଙ୍କ ଆକାଉଣ୍ଟରୁ ୫ଲକ୍ଷ ୬୯ହଜାର ଟଙ୍କା ଉତ୍କର୍ଷ ସ୍ମଲ୍ ଫାଇନାନ୍ସ ବ୍ୟାଙ୍କକୁ ପେ ୟୁ ନାମକ ଏକ ପେମେଣ୍ଟ ଗେଟ୍ୱେ ମାଧ୍ୟମରେ ସ୍ଥାନାନ୍ତର ହୋଇଛି। ଏଥିସହ ଆଉ ଏକ ଅନ୍ଲାଇନ୍ ଆପ୍ ମାଧ୍ୟମରେ ୯୯,୮୨୧ ଟଙ୍କା ଭଡ଼ା ବାବଦ ପ୍ରଦାନ କରାଯାଇଛି। ଏଭଳି ଭାବେ ଅର୍ଜୁନଙ୍କ ଆକାଉଣ୍ଟରୁ ମୋଟ ୫ଲକ୍ଷ ୬୯ ହଜାର ୮୨୧ ଟଙ୍କା ସାଇବର ଠକ ନେଇ ଯାଇଥିଲେ।
