ନୂଆଦିଲ୍ଲୀ,୩ ।୧୧: କରୋନା ଭାଇରସ ସଂକ୍ରମଣ କାରଣରୁ ବିଶ୍ୱ ଏକ ପ୍ରକାର ସଂଘର୍ଷ କରି ଚାଲିଛି । ଅନେକ ଲୋକ ଏକ ପ୍ରକାର ଏହି ସମୟରେ ରୋଜଗାର ହରାଇ ବସିଛନ୍ତି । ପରିବାର ପୋଷଣ ପାଇଁ ଏବେ ୪୬ ପ୍ରତିଶତ ଭାରତୀୟ ପରିବାର ଉଧାର କରି ଚଳୁଥିବା ଏକ ରିପୋର୍ଟରୁ ଜଣାପଡିଛି । ହୋମ କ୍ରେଡିଟ ଇଣ୍ଡିଆ ରିସର୍ଚ୍ଚ ପକ୍ଷରୁ ଜାରି କରାଯାଇଥିବା ଏକ ରିପୋର୍ଟରୁ ଏହି ସୂଚନା ମିଳିଛି । ଏହି ରିପୋର୍ଟ କହିଛି ପ୍ରତ୍ୟେକ ୪ ଜଣରେ ଜଣେ ନିଜର ପ୍ରିୟ ପରିଜନ ଅଥବା ସମ୍ପର୍କିୟଙ୍କ ନିକଟରୁ ଉଧାର ନେଇ ପରିବାରର ନିତିଦିନିଆ ଆବଶ୍ୟକତାକୁ ପୂରଣ କରୁଛନ୍ତି । ୨୦୨୦ରେ ୧୪ ପ୍ରତିଶତ ଲୋକ ରୋଜଗାର ହରାଇଛନ୍ତି । ୪୬ ପ୍ରତିଶତ ଲୋକ ନିଜର ଆବଶ୍ୟକତା ପୂରଣ କରିବାକୁ ଉଧାର ନେଇଛନ୍ତି ଓ ୨୭ ପ୍ରତିଶତ ଲୋକ ନିଜର ଋଣ ସୁଝୁଛନ୍ତି । ମୁମ୍ବାଇ ଓ ଭୋପାଳରେ ସବୁଠାରୁ ଅଧିକ ୨୭ ପ୍ରତିଶତ ଲୋକ ଉଧାର ନେଇଥିବା ବେଳେ ଏହା ପଛକୁ ରହିଛି ଦିଲ୍ଲୀ । ଏଠାରେ ୨୬ ପ୍ରତିଶତ ଲୋକ ଉଧାରରେ ପରିବାର ଚଳାଉଛନ୍ତି । ଆଉ ବିହାରର ପାଟନାରେ ୨୫ ପ୍ରତିଶତ ପରିବାର ଏହିପରି ଚଳୁଛି । ୨୦୧୯ରେ ବି ୪୬ ପ୍ରତିଶତ ଲୋକ ଉଧାର ନେଇଥିବା ବେଳେ ୩୩ ପ୍ରତିଶତ ଲୋକ ନିଜ ଜୀବନଶୈଳିକୁ ଅପଗ୍ରେଡ କରିବାକୁ ଉଧାର ନେଇଥିବା ଉକ୍ତ ରିପୋର୍ଟ କହିଛି । କରୋନା ମହାମାରୀ କାରଣରୁ ଦରମା କମ୍ ମିଳିବା ବା ରୋଜଗାର ହରାଇବା ଫଳରେ ଅର୍ଥନିତି ମଧ୍ୟ ଖରାପ ସ୍ଥିତିରେ ପହଞ୍ଚିଛି । ଆଉ ଏହାର ଅଧିକ ପ୍ରଭାବ ମଧ୍ୟବିତ୍ତ ପରିବାର ଉପରେ ପଡିଛି ।
