ନୂଆଦିଲ୍ଲୀ, ୨୩ା୯: ବିଶ୍ୱର ପ୍ରାୟ ୪୬% ସ୍ବଳ୍ପ ଆୟକାରୀ ଲୋକ ଉପକୂଳ ଅଞ୍ଚଳରେ ରହୁଛନ୍ତି। ଖାସ୍କରି ଆଫ୍ରିକା ଏବଂ ଏସିଆରେ ଅଧିକ ସଂଖ୍ୟାରେ ସ୍ବଳ୍ପ ଆୟକାରୀ ଉପକୂଳରେ ରହୁଥିବା ନେଇ ଚାଇନାର ସିଚୁଆନ ୟୁନିଭର୍ସିଟି, ଅଷ୍ଟ୍ରେଲିଆର ମୋନାଶ ୟୁନିଭର୍ସିଟିର ଗବେଷକମାନେ କରିଥିବା ଏକ ଅଧ୍ୟୟନରେ କୁହାଯାଇଛି। ଅଧ୍ୟୟନ ଅନୁଯାୟୀ, ବିଶ୍ୱବ୍ୟାପୀ ଉପକୂଳବର୍ତ୍ତୀ ଅଞ୍ଚଳର ୫୬% ଜନବସତି ପଛକୁ ହଠିଥିବାବେଳେ ୨୮% ସ୍ଥିର ରହିଛି ଏବଂ ୧୬% ଉପକୂଳର ନିକଟତର ହୋଇଛି। ନେଚର କ୍ଲାଇମେଟ ଚେଞ୍ଜରେ ପ୍ରକାଶିତ ଏହି ଅଧ୍ୟୟନ ଅନୁଯାୟୀ, ଜଳବାୟୁ ବିପଦ ପ୍ରତି ଅଧିକ ସମ୍ବଦନଶୀଳ ଅଞ୍ଚଳଗୁଡ଼ିକ ଅଧିକ ମାତ୍ରାରେ ଉପକୂଳରୁ ଦୂରେଇ ଯିବାରେ ଲାଗିଛି। ପୂର୍ବରୁ ହୋଇଥିବା ବିଭିନ୍ନ ଅଧ୍ୟୟନର ରିପୋର୍ଟ ଅନୁଯାୟୀ, ବିଶ୍ୱର ୪୦%ରୁ ଅଧିକ ଜନସଂଖ୍ୟା ସମୁଦ୍ର କୂଳରୁ ୧୦୦ କି.ମି. ମଧ୍ୟରେ ବାସ କରନ୍ତି। ତେଣୁ ଏଠାକାର ଲୋକେ ଘୂର୍ଣ୍ଣିଝଡ଼, ବନ୍ୟା, ସମୁଦ୍ର ପତ୍ତନ ବୃଦ୍ଧି ପ୍ରତି ସମ୍ବେଦନଶୀଳ ଥିବାବେଳେ ଏହି ପ୍ରାକୃତିକ ବିପର୍ଯ୍ୟୟଗୁଡ଼ିକ ଆଗାମୀ ଦିନରେ ବଢ଼ିବାର ସମ୍ଭାବନା ସହ ସେଠାରେ ରହୁଥିବା ଲୋକଙ୍କ ଆର୍ଥିକ ବିକାଶକୁ ପ୍ରଭାବିତ କରିବ ବୋଲି ଗବେଷକମାନେ ଚିନ୍ତା ପ୍ରକଟ କରିଛନ୍ତି। ଏହି ଅଧ୍ୟୟନରେ ଭାରତର ଆନ୍ଧ୍ରପ୍ରଦେଶ, ଗୁଜରାଟ ଏବଂ ପୁଡୁଚେରୀ ଉପକୂଳରେ ରହୁଥିବା ଲୋକଙ୍କୁ ନେଇ ବିଶ୍ଳେଷଣ କରାଯାଇଥିଲା।
