ମୁମ୍ବାଇ, ୨୨।୫: ଏମିରେଟ୍ସ ଏୟାରଲାଇନ୍ସର ଏକ ବିମାନ ସହ ଧକ୍କା ହୋଇ ୪୦ରୁ ଅଧିକ ବିଦେଶୀ ପକ୍ଷୀଙ୍କ ମୃତ୍ୟୁ ହୋଇଯାଇଛି। ସୋମବାର ବିଳମ୍ବିତ ରାତିରେ ମୁମ୍ବାଇର ଘାଟ୍କୋପର ସ୍ଥିତ ଲକ୍ଷ୍ମୀନଗରର ସ୍ଥାନୀୟ ବାସିନ୍ଦା ୪୦ରୁ ଅଧିକ ବିଦେଶୀ ପକ୍ଷୀଙ୍କ ଶବ ପଡ଼ିଥିବା ଦେଖିବାକୁ ପାଇଥିଲେ। ମୁମ୍ବାଇରୁ ଦୁବାଇ ଯାଉଥିବା ଏମିରେଟ୍ସ ଏୟାରଲାଇନ୍ସର ‘ଇକେ ୫୦୯’ ବିମାନ ସହ କିଛି ପକ୍ଷୀ ମାଡ଼ ହେବା ନେଇ ଏହାର ପାଇଲଟ ଏୟାର ଟ୍ରାଫିକ କଣ୍ଟ୍ରୋଲକୁ ସୂଚନା ଦେଇଥିଲେ। ପକ୍ଷୀଙ୍କ ସହ ମାଡ଼ ହେବା ପରେ ଏହି ଫ୍ଲାଇଟ୍କୁ ମୁମ୍ବାଇ ବିମାନ ବନ୍ଦରରେ ଜରୁରିକାଳୀନ ଅବତରଣ କରାଯିବା ସହ ଏଥିରେ ଯାତ୍ରାକୁ ବାତିଲ କରାଯାଇଥିଲା। ଏହାପରେ ଉକ୍ତ ବିମାନକୁ ଯାଞ୍ଚ ମଧ୍ୟ କରାଯାଇଥିଲା।
ଅନ୍ୟପକ୍ଷରେ ଏହି ଘଟଣାକୁ ଗୁରୁତର ସହ ନେଇଛି ମହାରାଷ୍ଟ୍ରର ଜଙ୍ଗଲ ଓ ପରିବେଶ ବିଭାଗ। ବିଭାଗ ପକ୍ଷରୁ ପୂରା ଘଟଣାର ତଦନ୍ତ ପ୍ରକ୍ରିୟା ଆରମ୍ଭ ହୋଇଥିବାବେଳେ ଅଧିକାରୀମାନେ ଲକ୍ଷ୍ମୀନଗରରେ ପହଞ୍ଚି ସ୍ଥାନୀୟ ଅଧିବାସୀଙ୍କୁ ପଚରାଉଚରା କରିଥିବା ମହାରାଷ୍ଟ୍ର ସରକାରଙ୍କ ଅତିରିକ୍ତ ମୁଖ୍ୟ ଜଙ୍ଗଲ ସଂରକ୍ଷଣକାରୀ ଏସ୍. ଭି. ରାମାରାଓ ସୂଚନା ଦେଇଛନ୍ତି। ଖୁବ୍ଶୀଘ୍ର ରାଜ୍ୟ ଜଙ୍ଗଲ ଓ ପରିବେଶ ବିଭାଗର ଏକ ଟିମ୍ ବିମାନର ପାଇଲଟଙ୍କ ବୟାନ ରେକର୍ଡ କରିବ ବୋଲି ସେ କହିଛନ୍ତି। ତେବେ ଏହି ଘଟଣାକୁ ନେଇ ଅନେକ ପରିବେଶବିତ ଏବଂ ବନ୍ୟଜନ୍ତୁ କଲ୍ୟାଣ ସଂଗଠନ ପକ୍ଷରୁ ପ୍ରଶ୍ନ ଉଠାଯାଇଛି। ବିଦେଶୀ ପକ୍ଷୀ ସମୂହ ସାଧାରଣତଃ ମୁମ୍ବାଇ ଦେଇ ଠାଣେସ୍ଥିତ ପକ୍ଷୀ ଅଭୟାରଣ୍ୟକୁ ଯାଇଥାନ୍ତି। ତେବେ ନଭି ମୁମ୍ବାଇରେ ଚାଲିଥିବା ବିଭିନ୍ନ ଅବୈଧ ନିର୍ମାଣ କାର୍ଯ୍ୟ ଓ ପ୍ରଦୂଷଣ ଆଦି କାରଣରୁ ପକ୍ଷୀମାନେ ନିଜ ଗତିପଥ ବଦଳାଇବାକୁ ବାଧ୍ୟ ହେଉଥିବା, କିଛି ପରିବେଶବିତ ଅଭିଯୋଗ ଆଣିଛନ୍ତି।
