ବର୍ମିଂହାମ୍, ୬ା୮: ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତୀୟ ରେସ୍ଲରମାନେ ସେମାନଙ୍କ ପ୍ରଭାବୀ ପ୍ରଦର୍ଶନ ଜାରି ରଖିଛନ୍ତି। ଶୁକ୍ରବାର ବଜରଙ୍ଗ ପୁନିଆ (ପୁରୁଷ ୬୫କେଜି), ସାକ୍ଷୀ ମଲିକ (ମହିଳା ୬୨କେଜି), ଅଂଶୁ ମଲିକ (ମହିଳା ୫୭କେଜି), ଦୀପକ ପୁନିଆ (ପୁରୁଷ ୮୬କେଜି) ସେମାନଙ୍କ ବିଭାଗରେ ଫାଇନାଲକୁ ଉନ୍ନୀତ ହୋଇ ଅତି କମ୍ରେ ଗୋଟିଏ ଲେଖାଏ ରୌପ୍ୟ ପଦକ ପକ୍କା କରିଛନ୍ତି। ବଜରଙ୍ଗ ୬୫କେଜି ଫ୍ରିଷ୍ଟାଇଲ ସେମିଫାଇନାଲରେ ଇଂଲଣ୍ଡର ଜର୍ଜ ରାମ୍ଙ୍କୁ ହରାଇ ଦେଇଛନ୍ତି। ସେହିପରି ସାକ୍ଷୀ ମଲିକ ମହିଳା ୬୨କେଜି ଫ୍ରିଷ୍ଟାଇଲରେ କାମେରୁନ୍ର ବର୍ଥ ଏମିଲିନ୍ ଇଟେନ୍ ଏନ୍ଗୋଲୋଙ୍କୁ ପରାସ୍ତ କରିଛନ୍ତି। ଅଂଶୁ ମଲିକ ମହିଳା ଫ୍ରିଷ୍ଟାଇଲ ୫୭କେଜି ଶ୍ରେଣୀରେ ଶ୍ରୀଲଙ୍କାର ନେଥମି ପୁରୁଥୋଟାଗେଙ୍କୁ ହରାଇ ଦେଇଛନ୍ତି। ଦୀପକ ପୁନିଆ ପୁରୁଷ ୮୬କେଜି ଫ୍ରିଷ୍ଟାଇଲରେ କାନାଡାର ଆଲେକ୍ଜାଣ୍ଡର ମୁରେଙ୍କ ବିପକ୍ଷରେ ବିଜୟ ହାସଲ କରିଛନ୍ତି। ଅନ୍ୟପକ୍ଷରେ ମହିଳା ଫ୍ରିଷ୍ଟାଇଲ ୬୮କେଜି ରିପିଚେଜ୍ ରାଉଣ୍ଡରେ ଦିବ୍ୟା କାକରନ ରିପିଚେଜ୍ ରାଉଣ୍ଡ-୨ରେ କାମେରୁନ୍ର ବ୍ଲାଣ୍ଡିନ ନିଏଏନ୍ଗିରିଙ୍କୁ ପରାସ୍ତ କରି ବ୍ରୋଞ୍ଜ ପଦକ ଦୌଡ଼ରେ ରହିଛନ୍ତି।
ସିନ୍ଧୁ, ଶ୍ରୀକାନ୍ତ କ୍ୱାର୍ଟରଫାଇନାଲରେ
ଭାରତର ଷ୍ଟାର ବ୍ୟାଡ୍ମିଣ୍ଟନ ଖେଳାଳି ପି.ଭି. ସିନ୍ଧୁ ଓ କିଡାମ୍ବି ଶ୍ରୀକାନ୍ତ ଯଥାକ୍ରମେ ରାଜ୍ୟଗୋଷ୍ଠୀ କ୍ରୀଡ଼ା ମହିଳା ଓ ପୁରୁଷ ସିଙ୍ଗଲ୍ସ କ୍ୱାର୍ଟରଫାଇନାଲରେ ପ୍ରବେଶ କରିଛନ୍ତି। ୨୦୧୮ ସଂସ୍କରଣ ରୌପ୍ୟ ବିଜୟିନୀ ସିନ୍ଧୁ ପ୍ରି-କ୍ୱାର୍ଟରରେ ଉଗାଣ୍ଡାର ହୁସିନା କୋବୁଗାବେଙ୍କ ବିପକ୍ଷରେ ୨୧-୧୦, ୨୧-୯ରେ ସହଜ ବିଜୟ ହାସଲ କରିଥିଲେ। ଗୋଲ୍ଡକୋଷ୍ଟଠାରେ ଦ୍ୱିତୀୟ ସ୍ଥାନ ଅଧିକାର କରିଥିବା ଶ୍ରୀକାନ୍ତଙ୍କୁ ମଧ୍ୟ ଅଧିକ ପରିଶ୍ରମ କରିବାକୁ ପଡ଼ି ନାହିଁ। ସେ ତାଙ୍କ ପୁରୁଷ ପ୍ରି-କ୍ୱାର୍ଟରଫାଇନାଲ ମ୍ୟାଚରେ ଶ୍ରୀଲଙ୍କାର ଡୁମିଣ୍ଡୁ ଆବେବିକ୍ରମାଙ୍କୁ ୨୧-୯, ୨୧-୧୨ରେ ପରାସ୍ତ କରିଛନ୍ତି। ପୂର୍ବରୁ ଭାରତୀୟ ମହିଳା ଯୋଡ଼ି ଗାୟତ୍ରୀ ଗୋପୀଚାନ୍ଦ ଓ ତ୍ରିସା ଜୋଲି ମରିସସ୍ର ଜେମିମା ଲିଅଙ୍ଗ୍ ଫର ସାଙ୍ଗ୍ ଏବଂ ଗଣେଶ ମୁଙ୍ଗ୍ରାଙ୍କୁ ୨୧-୨, ୨୧-୪ରେ ହରାଇ କ୍ୱାର୍ଟରଫାଇନାଲରେ ପ୍ରବେଶ କରିସାରିଛନ୍ତି। ଡବଲ ଅଲିମ୍ପିକ ପଦକ ବିଜୟିନୀ ସିନ୍ଧୁ ପରବର୍ତ୍ତୀ ରାଉଣ୍ଡରେ ମାଲେସିଆର ଜୋ ଜିନ୍ ଓ୍ବିଙ୍କୁ ଭେଟିବେ।
ମନିକା ବାତ୍ରା, ଶ୍ରୀଜା ଆକୁଲା କ୍ୱାର୍ଟରଫାଇନାଲରେ
ଭାରତର ମନିକା ବାତ୍ରା ଓ ଶ୍ରୀଜା ଆକୁଲା ରାଜ୍ୟଗୋଷ୍ଠୀ କ୍ରୀଡ଼ା ଟେବୁଲ ଟେନିସ ମହିଳା ସିଙ୍ଗଲ୍ସ କ୍ୱାର୍ଟରଫାଇନାଲରେ ପ୍ରବେଶ କରିଛନ୍ତି। ବାତ୍ରା ଅଷ୍ଟ୍ରେଲିଆର ଜି ମିନ୍ୟୁଙ୍ଗ୍ଙ୍କୁ ୧୧-୪, ୧୧-୮, ୧୧-୬, ୧୨-୧୦ରେ ପରାସ୍ତ କରିଥିଲେ। ୨୭ ବର୍ଷୀୟା ଷ୍ଟାର ଖେଳାଳି ବର୍ତ୍ତମାନ ସିଙ୍ଗାପୁରର ଜିଆନ୍ ଜେଙ୍ଗ୍ଙ୍କୁ ଭେଟିବେ। ଅନ୍ୟପକ୍ଷରେ ଶ୍ରୀଜା ଓ୍ବେଲ୍ସର ଚାର୍ଲୋଟ କାର୍ଲେଙ୍କ ବିପକ୍ଷରେ ସଂଘର୍ଷପୂର୍ଣ୍ଣ ବିଜୟ ହାସଲ କରିଛନ୍ତି। ସେ ୮-୧୧, ୧୧-୭, ୧୨-୧୪, ୯-୧୧, ୧୧-୪, ୧୫-୧୩, ୧୨-୧୦ରେ ମ୍ୟାଚ ଜିତିଛନ୍ତି। ଶ୍ରୀଜା କ୍ୱାର୍ଟରଫାଇନାଲରେ କାନାଡାର ମୋ ଝାଙ୍ଗ୍ଙ୍କ ସହ ମୁକାବିଲା କରିବେ। ପୂର୍ବରୁ ଉଭୟ ମନିକା ଓ ଶ୍ରୀଜା ସେମାନଙ୍କ ପାର୍ଟନର ସହ ମିକ୍ସଡ ଡବଲ୍ସ ଇଭେଣ୍ଟରେ କ୍ୱାର୍ଟରଫାଇନାଲରେ ପ୍ରବେଶ କରିସାରିଛନ୍ତି। ଅନ୍ୟପକ୍ଷରେ ଶରଥ କମଲ ଓ ସାଥିୟଁା ଜ୍ଞାନସେଖରନ ପୁରୁଷ ଡବଲ୍ସ କ୍ୱାର୍ଟରଫାଇନାଲରେ ପ୍ରବେଶ କରିଛନ୍ତି। ସେମାନେ ୧୧-୬, ୧୧-୧, ୧୧-୪ରେ ବାଂଲାଦେଶର ବାମ୍ ରାମହିମ୍ଲିଆନ ଓ ରିଦୟ ମୋହୁତାସିନ୍ ଅହମଦଙ୍କୁ ହରାଇ ଦେଇଛନ୍ତି।
ପାରା ଲିଫ୍ଟିଂରେ ସୁଧୀରଙ୍କୁ ସ୍ବର୍ଣ୍ଣ, ପଦକ ପକ୍କା କଲେ ଭବିନା
ରାଜ୍ୟଗୋଷ୍ଠୀ କ୍ରୀଡା ୨୦୨୨ରେ ପାରା ଆଥଲେଟମାନଙ୍କ ବିଭିନ୍ନ କ୍ରୀଡା ବର୍ଗ ଗୁରୁବାରଠାରୁ ଆରମ୍ଭ ହୋଇଛି। ଗୁରୁବାର ବିଳମ୍ବିତ ରାତିରେ ହେଭି ଓ୍ବେଟ୍ ଲିଫ୍ଟିଂ ବର୍ଗରେ ସୁଧୀର କୁମାର ଭାରତ ପାଇଁ ପ୍ରଥମ ସ୍ବର୍ଣ୍ଣ ପଦକ ଜିତିଥିଲେ। ସୁଧୀର ନିଜର ଦୁଇ ପ୍ରୟାସରେ ୨୦୮ ଓ ୨୧୨ କିଗ୍ରା ଓଜନ ଉଠାଇବା ସହିତ ୧୩୪.୫ ପଏଣ୍ଟ ସହିତ ରାଜ୍ୟଗୋଷ୍ଠୀ ରେକର୍ଡ କରିଥିଲେ। ସୁଧୀରଙ୍କ ଏହି ସଫଳତା ପରେ ପ୍ରଧାନମନ୍ତ୍ରୀ ମୋଦି ଟୁଇଟ୍ କରି ପ୍ରଶଂସା କରିଥିଲେ। ଶୁକ୍ରବାର କ୍ଲାସ୍ ୩-୫ ପାରା ଟେବଲ ଟେନିସର ଫାଇନାଲରେ ପହଞ୍ଚିବା ସହିତ ଭାରତ ପାଇଁ ପଦକ ପକ୍କା କରିଛନ୍ତି ଭବିନା ବେନ୍ ପଟେଲ। ପାରାଲିମ୍ପିକ୍ସ ରୌପ୍ୟ ପଦକ ବିଜୟିନୀ ୩୫ ବର୍ଷୀୟ ଭବିନା ଇଂଲଣ୍ଡର ସୁ ବେଲିଙ୍କୁ ୧୧-୬, ୧୧-୬ ଓ ୧୧-୬ ସେଟରେ ପରାସ୍ତ କରିଛନ୍ତି। ଶନିବାର ନାଇଜେରିଆର କ୍ରିଷ୍ଟିଆନା ଇକପୋଇଙ୍କୁ ସେ ଭେଟିବେ।
ଅନ୍ୟତମ ପାରାଲିମ୍ପିକ୍ସ ପଦକ ବିଜୟିନୀ ସୋନାଲ ବେନ୍ ପଟେଲ କିନ୍ତୁ ନିଜ ମୁକାବିଲାରେ ୧୧-୮, ୬-୧୧, ୪-୧୧ ଓ ୭-୧୧ରେ ପରାଜିତ ହୋଇଛନ୍ତି। ବ୍ରୋଞ୍ଜ ପଦକ ମୁକାବିଲାରେ ସେ ଇଂଲଣ୍ଡର ସୁ ବେଲିଙ୍କୁ ଭେଟିବେ। କ୍ଲାସ୍ ୩-୫ ପାରା ଟେବଲ ଟେନିସ ପୁରୁଷ ବର୍ଗ ସେମିରେ ପରାସ୍ତ ହୋଇଛନ୍ତି ରାଜ ଅରବିନ୍ଦନ ଅଲଗାର। ସେ ୧୧-୭, ୮-୧୧, ୪-୧୧ ଓ ୭-୧୧ ସେଟରେ ନାଇଜେରିଆର ନାସିରୁ ସୁଲେଙ୍କଠାରୁ ପରାଜିତ ହୋଇଛନ୍ତି। ରବିବାର ବ୍ରୋଞ୍ଜ ମେଡାଲ ପ୍ଲେ ଅଫ୍ରେ ନାଇଜେରିଆର ଇସାଉ ଓଗୁଙ୍କୁନଲେଙ୍କୁ ଭେଟିବେ।
ଅଧାରେ ଅଟକିଲା କୁସ୍ତି ମ୍ୟାଚ୍
ରାଜ୍ୟଗୋଷ୍ଠୀ କ୍ରୀଡା ୨୦୨୨ର କୁସ୍ତି ଇଭେଣ୍ଟ ଶୁକ୍ରବାରଠାରୁ ଆରମ୍ଭ ହୋଇଛି। ତେବେ ଜଣେ ସ୍ପିକର ତଳକୁ ଖସିଯିବାରୁ ମ୍ୟାଚଗୁଡିକ ବିଳମ୍ବିତ ହୋଇଥିଲା। ମ୍ୟାଚ ଚାଲିଥିବା ସମୟରେ ମ୍ୟାଟ୍ ନିକଟକୁ ଛାତରୁ ସ୍ପିକର ଜଣଙ୍କ ଖସିବା ସହିତ କିଛି ସମୟ ପାଇଁ ହଲରୁ ସମସ୍ତ ଦର୍ଶକଙ୍କୁ ଖାଲି କରାଯାଇଥିଲା। ଦୀପକ ପୁନିଆଙ୍କ ପ୍ରିକ୍ୱାର୍ଟର ଫାଇନାଲ ମୁକାବିଲା ଶେଷ ହେବା ପରେ ଏହି ଅଭାବନୀୟ ଘଟଣା ଘଟିଥିଲା। ସମସ୍ତ ଦର୍ଶକଙ୍କୁ ଖାଲି କରାଯିବା ସହିତ ପୁଙ୍ଖାନୁପୁଙ୍ଖ ତଦନ୍ତ କରାଯିବା ସହିତ ସମସ୍ତ ସୁରକ୍ଷା ବ୍ୟବସ୍ଥାକୁ ଆଉଥରେ ଅନୁଧ୍ୟାନ କରାଯାଇଥିଲା। ଅନୁଧ୍ୟାନ ପରେ ସ୍ଥାନୀୟ ସମୟ ୧୨.୪୫ ବା ଭାରତୀୟ ସମୟ ୬.୦୦ରେ ପୁନର୍ବାର ଖେଳ ଆରମ୍ଭ ହୋଇଥିଲା।
ଲନ୍ ବୋଲ୍: ଭାରତୀୟ ମହିଳା ଯୋଡ଼ି ପରାସ୍ତ
ଭାରତୀୟ ମହିଳା ଯୋଡ଼ି ଲଭ୍ଲି ଚୌବେ ଓ ନୟନମୋନି ସାଇକାଇ ରାଜ୍ୟଗୋଷ୍ଠୀ କ୍ରୀଡ଼ା ମହିଳା କ୍ୱାର୍ଟରଫାଇନାଲରୁ ବିଦାୟ ନେଇଛନ୍ତି। ଭାରତୀୟ ଯୋଡ଼ି ଇଂଲଣ୍ଡର ସୋଫି ଟୋ ଟୋଲଚାର୍ଡ ଓ ଆମି ଫାରୋଙ୍କଠାରୁ ୧୮-୧୪ରେ ହାରିଯାଇଛନ୍ତି। ଇଂଲଣ୍ଡ ବର୍ତ୍ତମାନ ସେମିଫାଇନାଲରେ ନ୍ୟୁଜିଲାଣ୍ଡକୁ ଏବଂ ଅଷ୍ଟ୍ରେଲିଆ ମାଲେସିଆକୁ ଭେଟିବ।