ବ୍ରହ୍ମପୁର ଅଫିସ,୨୯।୧୦: ବ୍ରହ୍ମପୁର ମହାନଗର ନିଗମ (ବିଏମ୍ସି) ରେ ସହର ଉପକଣ୍ଠସ୍ଥ ୪ଟି ଗ୍ରାମ ମିଶ୍ରଣ ନେଇ ଶୁକ୍ରବାର ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ଚିଠି ନଂ. ୧୭୯୭୪ରେ ସୂଚନା ଦିଆଯାଇଛି। ଫଳରେ ବିଏମସିରେ ସହର ଉପକଣ୍ଠସ୍ଥ ଗ୍ରାମଗୁଡିକ ମିଶ୍ରଣ ନେଇ ବାଟ ଫିଟିଛି। ନଗର ଉନ୍ନୟନ ବିଭାଗର ଏଭଳି ପଦକ୍ଷେପକୁ ସହରତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ସ୍ବାଗତ ଜଣାଇଛି। ଲୋଚାପଡା ପଞ୍ଚାୟତର ଲୋଚାପଡା ଗ୍ରାମ, ବଡକୁଶସ୍ଥଳୀ ପଞ୍ଚାୟତର ସାନକୁଶସ୍ଥଳୀ ଗ୍ରାମ, ଗଉଞ୍ଜୁ ପଞ୍ଚାୟତର ବ୍ରହ୍ମାପଲୀ ଗ୍ରାମ ଓ ଗୋଳାବନ୍ଧ ପଞ୍ଚାୟତର ଗୋଳାବନ୍ଧ ଗ୍ରାମ ବିଏମ୍ସିରେ ମିଶ୍ରଣ ନେଇ ଚିଠିରେ ଉଲ୍ଲେଖ ରହିଛି। ସୂଚନାଯୋଗ୍ୟ, ବିଏମସି ପାର୍ଶ୍ୱବର୍ତ୍ତୀ ୧୮ଟି ପଞ୍ଚାୟତକୁ ବିଏମସିରେ ସାମିଲ କରିବା ନେଇ ୨୦୦୮ରେ ଗେଜେଟ ନୋଟିଫିକେସନ ପ୍ରକାଶ ପାଇଥିଲା। କିନ୍ତୁ ପରବର୍ତ୍ତୀ ସମୟରେ ଏହା କାର୍ଯ୍ୟକାରୀ ହୋଇପାରି ନ ଥିଲା। ଫଳରେ ସହର ତଳି ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ୨୦୨୧ ଡିସେମ୍ବର ୧୨ ତାରିଖରେ ଉଚ୍ଚ ନ୍ୟାୟଳୟରେ ରିଟ ପିଟିସନ ଦାଖଲ କରାଯାଇଥିଲା। ଏହାକୁ ନେଇ ଗତ ଜାନୟାରୀ ୧୧ରେ ହାଇକୋର୍ଟ ରାୟ ପ୍ରକାଶ କରି ଗୃହ ଓ ନଗର ଉନ୍ନୟନ ବିଭାଗର ପାୈର ପ୍ରଶାସନ ନିର୍ଦ୍ଦେଶକଙ୍କୁ ଉପରୋକ୍ତ ୪ଟି ଗ୍ରାମ ମିଶ୍ରଣ ୩ ମାସ ମଧ୍ୟରେ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଥିଲେ। କିନ୍ତୁ ରାଜ୍ୟ ସରକାର ଏହାକୁ ପାଳନ କରି ନ ଥିବା ବେଳେ ଅଗଷ୍ଟ ୨୪ରେ ସହରତଳି ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ଅଦାଲତ ଅବମାନନା ନେଇ ଆଉ ଏକ ପିଟିସନ ଦାଖଲ କରାଯାଇଥିଲା। ଉଚ୍ଚ ନ୍ୟାୟଳୟ ସେପ୍ଟମ୍ବର ୨୬ରେ ଉକ୍ତ ମାମଲାର ରାୟ ପ୍ରକାଶ କରି ଏକ ମାସ ମଧ୍ୟରେ ପୂର୍ବ ନିର୍ଦ୍ଦେଶ କାର୍ଯ୍ୟକାରୀ କରିବା ପାଇଁ ନିର୍ଦ୍ଦେଶ ଦେଇଥିଲେ। ତଦନୁଯାୟୀ ରାଜ୍ୟ ସରକାର ନିର୍ଦ୍ଦେଶକୁ ପାଳନ କରିଥିବା ସହର ତଳି ମିଳିତ କ୍ରିୟାନୁଷ୍ଠାନ କମିଟି ସଭାପତି ସଞ୍ଜୀବ କୁମାର ପଟ୍ଟନାୟକ କହିଛନ୍ତି। ତେବେ ମିଶ୍ରଣ ପରେ ଉକ୍ତ ଗ୍ରାମ ଗୁଡିକର ଉନ୍ନୟନ କ୍ଷେତ୍ରରେ ମଧ୍ୟ ପଦକ୍ଷେପ ଗ୍ରହଣ କରିବା ଜରୁରୀ ବୋଲି ସହର ତଳି ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ କୁହାଯାଇଛି।
