ରାଜକନିକା,୪ା୬(ସଞ୍ଜୟ କୁମାର ଦାଶ): ପରିବାର ପ୍ରତିପୋଷଣ ପାଇଁ ରାଜ୍ୟ ବାହାରକୁ ନୁହେଁ ଦେଶାନ୍ତର ହୋଇ ଦାଦନ ଖଟିବାକୁ ଯାଉଛନ୍ତି ଓଡିଆ ଶ୍ରମିକ। ବାହାର ଦେଶରେ ଶ୍ରମିକ ଭାବେ କାମକରି ଭଲ ଦି ପଇସା ଆଣିଲେ ପରିବାର ଭଲରେ ପ୍ରତିପୋଷଣ ହେବା ସହ ପରିବାରର ସଭିଙ୍କ ମୁହଁରେ ହସ ଫୁଟାଇବାକୁ ସାତ ସମୁଦ୍ର ପାରିହୋଇ ଦାଦନ ଖଟିବାକୁ ଯାଉଛି । ସେଠାରେ କିଛିଦିନ ଭଲରେ ଚଳି ଘରକୁ ଭଲ ଦି ପଇସା ପଠାଇଥାଏ। ହେଲେ କିଛିଦିନ ପରେ ଆରମ୍ଭ ହୁଏ ଶୋଷଣ ଓ କଷଣ । ଏମିତି ଏକ ଦୁଃଖଭରା କାହାଣୀର ଦଶ୍ୟକୁ ବର୍ଣ୍ଣନା ପୂର୍ବକ ଘରକୁ ଫେରାଇ ଆଣିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ରାପଡା ଏମପି ବୈଜୟନ୍ତ ପଣ୍ଡାଙ୍କୁ ଆକୁଳ ନିବେଦନ କରିଛନ୍ତି ୪ ଶ୍ରମିକ। ନିଜ ମୋବାଇଲରେ ଶୁଟ୍ କରିଥିବା ସେହି ଦୁଃଖଭରା କାହାଣୀର ଦଶ୍ୟ ସୋସିଆଲ ମିଡିଆରେ ଘୁରିବୁଲୁଛି।
ଥାଇଲାଣ୍ଡରେ ଫସିଛନ୍ତି କେନ୍ଦ୍ରାପଡ଼ା ଜିଲା ରାଜକନିକା ଓ ଆଳି ବ୍ଲକ୍ର ୪ ଓଡ଼ିଆ ଶ୍ରମିକ। ଚାରିମାସ ହେବ ମିଳିନି ପାରିଶ୍ରମିକ। ଭୋକ ଉପାସରେ ଦିନ କାଟୁଛନ୍ତି ସେମାନେ। ସେମାନଙ୍କର ନାହିଁ ପାସପୋର୍ଟ। କାମକୁ ନ ଗଲେ ପୋଲିସରେ ଧରାଇ ଦେବା ଧମକ ତଥା ହତ୍ୟା କରିବାକୁ ଧମକ ମିଳୁଛି କମ୍ପାନୀ ମାଲିକଙ୍କ ଠାରୁ ଭିଡିଓ ମାଧ୍ୟମରେ। ଏହି ୪ ଓଡ଼ିଆ ଶ୍ରମିକଙ୍କ ସହ ଉତ୍ତରପ୍ରଦେଶର ଜଣେ ଶ୍ରମିକ ଏପରି ଅଭିଯୋଗ ଆଣିବା ସହ ନିଜ ଜନ୍ମସ୍ଥାନକୁ ଫେରାଇ ଆଣିବାକୁ ସରକାରଙ୍କୁ କରିଛନ୍ତି ଆକୁଳ ନିବେଦନ।
ସୂଚନା ମୁତାବକ ରାଜକନିକା ବ୍ଲକ ସିକୋ ପଞ୍ଚାୟତ ଗୋବାଙ୍ଗ ଗାଁର କ୍ଷୀରୋଦ ଦାସ, ପୋଇଝାରିଆ ଗାଁର ମନୋଜ ମଲିକ, ନହୁଣୀ ପଞ୍ଚାୟତ ନହୁଣୀ ଗାଁର କୈଳାସ ସେଠୀ, ଆଳି ବ୍ଲକ ପଦନାପାଳ ଗାଁର ନିତ୍ୟାନନ୍ଦ ମଲିକ ଓ ଉତ୍ତରପ୍ରଦେଶର ପସି ରାଜକୁମଦା ଥାଇଲାଣ୍ଡର କବିନବୁରୀ ଜିଲ୍ଲାରେ ଥିବା ସାନଭି ଭିନିୟର ପ୍ଲାଇଉଡ୍ କମ୍ପାନୀରେ ଏକ ବର୍ଷରୁ ଉର୍ଦ୍ଧ୍ୱ ସମୟ ହେବ କାମ କରୁଛନ୍ତି। ଏମାନଙ୍କୁ କମ୍ପାନୀ ମାଲିକ ଟୁରିଷ୍ଟ ଭିସାରେ ଥାଇଲାଣ୍ଡ ନେଇଥିଲେ। ପ୍ରଥମେ ସେମାନେ ଠିକ୍ ଭାବେ ଦରମା ପାଉଥିଲେ। ହେଲେ ଗତ ୪ ହେବ ସେମାନଙ୍କୁ ଦରମା ନ ଦେଇ ହଇରାଣ ହରକତ କରାଯାଉଥିବା ଜାରି ଭିଡିଓରେ ଶ୍ରମିକମାନେ ବଖାଣିଛନ୍ତି। ଚଳିବାକୁ ପାଖରେ ପଇସାପତ୍ର ନ ଥିବାରୁ ରାଶନ ଅଭାବ ଯୋଗୁ ଓଳିଏ ଖାଇଲେ ଓଳିଏ ଉପସ ରହିବାକୁ ପଡୁଛି ବୋଲି ଭିଡିଓ ମାଧ୍ୟମରେ ୫ ଶ୍ରମିକ ସୂଚନା ଦେଇଛନ୍ତି।
ସେହିପରି କୈଳାସଙ୍କ ହାତଗୋଡ଼ ଫୁଲିବା ସହ ଦେହ ଅସୁସ୍ଥ ଅନୁଭବ କରୁଛନ୍ତି। ହେଲେ କମ୍ପାନୀ ମାଲିକ ଡାକ୍ତରଖାନା ନେବାର ବ୍ୟବସ୍ଥା କରୁନାହାନ୍ତି। ମନୋଜଙ୍କ ଜେଜେ ମା’ ମୃତ୍ୟୁରେ ସେ ଶୁଦ୍ଧି ହେବାକୁ କହିଥିଲେ। ମାତ୍ର ଭିଜା ସରିଯାଇଥିବାରୁ ଟଙ୍କା ଦେଲେ ଛାତ୍ର ଭିଜା କରି ପଠାଇବାର ବ୍ୟବସ୍ଥା କରାଯିବ ବୋଲି ମାଲିକ କହୁଛନ୍ତି। କାମକୁ ନ ଗଲେ ଭିଜା ନ ଥିବା ଦର୍ଶାଇ ପୋଲିସରେ ଧରାଇ ଦେବେ, ଜୀବନରୁ ମାରିଦେବାକୁ ଧମକ ଦେଉଛନ୍ତି ବୋଲି ଶ୍ରମିକମାନେ ଅଭିଯୋଗ କରିଛନ୍ତି । ତୁରନ୍ତ କେନ୍ଦ୍ର ଓ ରାଜ୍ୟ ସରକାର ସେମାନଙ୍କୁ ଘରକୁ ଫେରାଇ ଆଣିବାକୁ ଭିଡିଓ ମାଧ୍ୟମରେ ଶ୍ରମିକମାନେ ଆକୁଳ ନିବେଦନ କରିଛନ୍ତି।
