ସୋରଡା,୩୧ା୧୦(ଡି.ଏନ୍.ଏ.): ସୋରଡ଼ା ଥାନା ଅଞ୍ଚଳରେ ଦ୍ରୁତ ଗାଡିଚାଳନା ସମସ୍ୟା ସୃଷ୍ଟି କରୁଛି। ନାବାଳକ ତଥା ଅନଭିଜ୍ଞମାନେ ଦ୍ରୁତ ଗତିରେ ବାଇକ୍ ଚଲାଉଥିବାରୁ ଦୁର୍ଘଟଣା ବଢ଼ୁଛି। ବିଶେଷକରି ଧରାକୋଟ ଥାନା ଅନ୍ତର୍ଗତ ମୁଣ୍ଡମରାଇ ଠାରୁ ସୋରଡା ଦେଇ ପିପଳପଙ୍କା ପର୍ଯ୍ୟନ୍ତ ଜାତୀୟ ରାଜପଥରେ କ୍ଷୀପ୍ରଗତିରେ ବାଇକ୍ ଚଲାଇବା ସମସ୍ତଙ୍କ ମୁଣ୍ଡବ୍ୟଥା ବଢାଇଛି। ଏପରିକି ଗାଡ଼ି ଚଳାଇବା ବେଳେ ହେଲମେଟ ବ୍ୟବହାର ନ କରିବା, ମୋବାଇଲରେ କଥା ହେବା ଓ ଗୋଟିଏ ବାଇକ୍ରେ ୩ଜଣ ଯିବା ସାଧାରଣ କଥା ହୋଇଛି। ଯେଉଁଥିପାଇଁ ଦୁର୍ଘଟଣା ଘଟି ଅକାଳରେ ବହୁମୂଲ୍ୟ ଜୀବନ ଚାଲିଯାଉଛି। ସୋରଡା-ଦାରିଙ୍ଗବାଡି ଜାତୀୟ ରାଜପଥର ଘଷିପଡା ନିକଟରେ ୨ ବାଇକ ମୁହାଁମୁହିଁ ଧକ୍କା ଫଳରେ ଉଭୟ ଗାଡିର ୩ ଜଣଙ୍କ ମୃତ୍ୟୁ ଘଟିଥିଲା। ଉକ୍ତ ଦିନ ନୂଆଗଡ ରାସ୍ତାରେ କାର ଧକ୍କାରେ ଜଣେ ୬୫ ବର୍ଷୀୟ ବୃଦ୍ଧଙ୍କ ଜୀବନ ଯାଇଥିଲା। ଗତ ୧୦ଦିନ ମଧ୍ୟରେ ଅଞ୍ଚଳରେ ଦୁର୍ଘଟଣାରେ ୪ ଜଣଙ୍କ ଜୀବନ ଯାଇଥିଲେ ମଧ୍ୟ ଏଥିପ୍ରତି କାହାର ଚେତା ପଶୁନି । ଅନ୍ୟପଟେ ଦ୍ରୁତଗତି ଯୋଗୁ ରାସ୍ତା ପାର୍ଶ୍ୱ ଗ୍ରାମ ଲୋକେ ଭୟଭୀତ ଅବସ୍ଥାରେ ରହୁଛନ୍ତି। କରଡାବାଡି ଗ୍ରାମବାସୀ ଭୟରେ ରାସ୍ତା ପାର୍ଶରେ ଟାୟାର ରଖିବାକୁ ବାଧ୍ୟ ହୋଇଛନ୍ତି। ଯାହାଫଳରେ ସେଠାରେ ଗାଡିଗୁଡିକ ଧୀର ଗତିରେ ଯାଇପାରିବ। ମୋବାଇଲରେ କଥା ହୋଇ ଗାଡି ଚଳାଉଥିବା ଲୋକଙ୍କଠାରୁ ପୋଲିସ ମୋଟା ଅଙ୍କର ଅର୍ଥ ଆଦାୟ କଲେ ଯୁବବର୍ଗ ଏହି ଅଭ୍ୟାସରୁ ନିବୃତ ରହିବେ ବୋଲି ଆଲୋଚନା ହେଉଛି।
