ରାଉରକେଲା,୨୦।୮(ସଙ୍ଗୀତା ଜେନା): ରାଉରକେଲାସ୍ଥିତ ଜାତୀୟ ପ୍ରଯୁକ୍ତି ପ୍ରତିଷ୍ଠାନ (ଏନ୍ଆଇଟି)ରେ ଟିଚିଂ ଓ ନନ୍ ଟିଚିଂ ଷ୍ଟାଫ ନିଯୁକ୍ତି ପରୀକ୍ଷା ଚାଲିଥିବା ବେଳେ ୪ଜଣ ନକଲି ପରୀକ୍ଷାର୍ଥୀ ଧରାପଡିଛନ୍ତି। ଅନ୍ୟମାନଙ୍କ ପାଇଁ ପରୀକ୍ଷା ଦେଉଥିବା ବେଳେ ପୋଲିସ ସେମାନଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ହରିୟାଣା ରାଜ୍ୟ ହିସାର ଜିଲାର ଗୌରବ ଚୌହାନ(୨୮), ପୁନିତ ସିଂ(୨୨), ଜିନ୍ଦ ଜିଲାର ମନୀଷ କୁମାର(୨୫) ଏବଂ ସୁନୀଲ କୁମାର(୨୫)। ସେମାନଙ୍କ ନିକଟରୁ ସ୍ପାଏ କ୍ୟାମେରା, ନାନୋ କ୍ୟାମେରା, ଇଅର ପିସ୍, କାର୍ବନ ପେପର, ମୋବାଇଲ ଫୋନ୍, ବ୍ଲୁଟୁଥ୍, ୱ୍ବେରଲେସ୍ ଇୟର ଫୋନ୍ ଓ ହାଇଟେକ ଡିଭାଇସ୍ ଜବତ ହୋଇଛି। ପୋଲିସ ସମସ୍ତ ଅଭିଯୁକ୍ତଙ୍କୁ ରବିବାର କୋର୍ଟଚାଲାଣ କରିଛି। ଏ ନେଇ ସେକ୍ଟର-୩ ଥାନାରେ ଏକ ମାମଲା (ନଂ.୯୮/୨୩) ରୁଜୁ ହୋଇଛି। ଏହି ଘଟଣା ପରେ ଏନ୍ଆଇଟି ଚତୁଃପାର୍ଶ୍ୱରେ ପୋଲିସ ମୁତୟନ ସହ ସୁରକ୍ଷା ବ୍ୟବସ୍ଥାକୁ କଡ଼ାକଡି କରାଯାଇଥିବା ନେଇ ଜୋନ୍-୧ର ଡିଏସ୍ପି ପୁଷ୍ପାରାଣୀ ନିନଗି ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ଡିଏସ୍ପି ନିନଗି କହିଥିଲେ, ରାଉରକେଲା ଏନ୍ଆଇଟିରେ ଟିଚିଂ ଓ ନନ୍ ଟିଚିଂ ଷ୍ଟାଫ ନିଯୁକ୍ତି ପାଇଁ ଅଗଷ୍ଟ ୧୬ରୁ ଲିଖିତ ପରୀକ୍ଷା ଆରମ୍ଭ ହୋଇଥିବା ବେଳେ ୨୭ ତାରିଖରେ ଶେଷ ହେବ। ଏଥିପାଇଁ ମୋଟ୍ ୧୩୦୭ ପରୀକ୍ଷାର୍ଥୀ ଆବେଦନ କରିଥିଲେ। ସେମାନଙ୍କୁ ଇ-ଆଡମିଟ୍ କାର୍ଡ ପ୍ରଦାନ କରାଯାଇଥିଲା। ଏହି କ୍ରମରେ ନନ୍ ଟିଚିଂ ଷ୍ଟାଫ ନିଯୁକ୍ତି ପାଇଁ ଶନିବାର ଅପରାହ୍ନ ସାଢେ ୨ରୁ ସାଢେ ୫ଟା ପର୍ଯ୍ୟନ୍ତ ଏଲଏ-୧ କମ୍ପ୍ଲେକ୍ସ ଓ ଏନ୍ଆଇଟି ପରିସରରେ ଲିଖିତ ପରୀକ୍ଷା ହୋଇଥିଲା। ପରୀକ୍ଷା କକ୍ଷକୁ ଯିବା ସମୟରେ ଉକ୍ତ ୪ ପରୀକ୍ଷାର୍ଥୀଙ୍କ ଉପରେ ସନ୍ଦେହ ହେବାରୁ ସେମାନଙ୍କୁ ପ୍ରଥମେ ଅଟକ ରଖାଯାଇଥିଲା। ପରେ ପୁନଃ ଯାଞ୍ଚ କରି ପରୀକ୍ଷା କକ୍ଷକୁ ପ୍ରବେଶ ଅନୁମତି ଦିଆଯାଇଥିଲା। ସେଠାରେ ପୁଣି ଯାଞ୍ଚ କରାଯିବାରୁ ସେମାନଙ୍କ ଫଟୋ ଏବଂ ଅନ୍ୟ ତଥ୍ୟରେ ତାଳମେଳ ନ ଥିବା ଦେଖିବାକୁ ମିଳିଥିଲା। ଇ-ଆଡମିଟ୍ କାର୍ଡରେ ଦୀପକ(ରୋଲ୍ ନଂ.୨୩୪ଏଲଓ୫୨୭୪୯)ଙ୍କ ସ୍ଥାନରେ ସୁନୀଲ, ସୁରଜ ଖଗୱାଲ(ରୋଲ୍ ନଂ.୨୩୪ଏଲଓ୫୨୮୬୯)ଙ୍କ ସ୍ଥାନରେ ଗୌରବ ଚୌହାନ, ତୁଷାର (ରୋଲ୍ ନଂ.୨୩୪ଏଲଓ୫୩୦୦୩)ଙ୍କ ସ୍ଥାନରେ ପୁନିତ ସିଂ ଏବଂ ଦୀପକ ମଲିକ (ରୋଲ୍ ନଂ.୧୩୪ଏଲଓ୫୩୨୦୨)ଙ୍କ ସ୍ଥାନରେ ମନୀଷ କୁମାର ପରୀକ୍ଷା ଦେଉଥିଲେ। ପରୀକ୍ଷା ଶେଷ ହେବା ପରେ ସନ୍ଧ୍ୟାରେ ଏନ୍ଆଇଟି ରେଜିଷ୍ଟ୍ରାର ରୋହନ ଧୀମନ ସେକ୍ଟର-୩ ଥାନାରେ ଲିଖିତ ଏତଲା ଦେବା ସହ ଉକ୍ତ ନକଲି ପରୀକ୍ଷାର୍ଥୀଙ୍କୁ ପୋଲିସକୁ ହସ୍ତାନ୍ତର କରିଥିଲେ।
