ଭୋପାଳ,୨୮।୭: ମଧ୍ୟପ୍ରଦେଶର ସାଗର ଜିଲାରେ କରୋନା ଟିକାକରଣରେ ଏକ ଚରମ ଅବହେଳା ଦେଖିବାକୁ ମିଳିଛି। ଏଠାରେ ଗୋଟିଏ ଛୁଞ୍ଚିରେ ପ୍ରାୟ ୩୯ ପିଲାଙ୍କୁ କରୋନା ଟିକା ଦିଆଯାଇଛି। ଅଭିଭାବକ ଏହି ବିଷୟରେ ଅଭିଯୋଗ କରିବା ପରେ ପୁରା ଘଟଣା ସାମ୍ନାକୁ ଆସିଥିଲା।
ବିଦ୍ୟାଳୟର ଛାତ୍ରୀଛାତ୍ରଙ୍କ ପାଇଁ ମହା ଟିକାକରଣ ଅଭିଯାନ ଅଧୀନରେ ଜିଲାର ଜୈନ ଉଚ୍ଚ ମାଧ୍ୟମିକ ବିଦ୍ୟାଳୟରେ ଟିକା ଦିଆଯାଉଥିଲା। ଟିକା ଦେଉଥିବା ବ୍ୟକ୍ତି ଗୋଟିଏ ସିରିଞ୍ଜରେ ସମସ୍ତ ପିଲାମାନଙ୍କୁ ଟିକାକରଣ କରୁଥିବା କିଛି ଅଭିଭାବକ ଦେଖିଥିଲେ। ଏନେଇ ସେମାନେ ଆପତ୍ତି ଉଠାଇଥିଲେ।
ଟିକାକରଣ କରିଥିବା ଜିତେନ୍ଦ୍ର ଅହିରଓ୍ବାର୍ କହିଛନ୍ତି, ଜିଲା ଟିକାକରଣ ଅଧିକାରୀଙ୍କ ନିର୍ଦ୍ଦେଶରେ ସକାଳେ ଟିକା ଏବଂ ଟିକାକରଣ ସାମଗ୍ରୀ ସ୍କୁଲକୁ ଆସିଥିଲା। ଏଥିରେ କେବଳ ଗୋଟିଏ ସିରିଞ୍ଜ କର୍ତ୍ତୃପକ୍ଷଙ୍କ ଦ୍ୱାରା ପଠା ଯାଇଥିଲା। ସମସ୍ତ ପିଲାଙ୍କୁ ଏହି ଗୋଟିଏ ଛୁଞ୍ଚିରେ ଟିକାକରଣ କରିବାକୁ ବିଭାଗ ମୁଖ୍ୟ ନିର୍ଦ୍ଦେଶ ଦେଇଥିଲେ। ଏଥିରେ ମୋର କ’ଣ ଭୁଲ। ମୋତେ ଯାହା ନିର୍ଦ୍ଦେଶ ଦିଆଯାଇଥିଲା ମୁଁ ତାହା କଲି। ଗୋଟାଏ ସିରିଞ୍ଜରେ ୩୦ ଜଣଙ୍କୁ ଟିକା ଦେଇ ସାରିଲେଣି। ଜିତେନ୍ଦ୍ରଙ୍କର ଏହି ଭିଡିଓ କରି ଜଣେ ଅଭିଭାବକ ତାଙ୍କ ଟୁଇଟର୍ ଆକାଉଣ୍ଟରେ ଶେୟାର୍ କରିଛନ୍ତି।
ଏହି ଘଟଣାକୁ ନେଇ ବିବାହ ବଢିବାରୁ ମୁଖ୍ୟ ଚିକିତ୍ସା ଅଧିକାରୀ ଓ ସ୍ବାସ୍ଥ୍ୟ ଅଧିକାରୀଙ୍କୁ ଯାଞ୍ଚ ପାଇଁ ଜିଲ୍ଲାପାଳ କ୍ଷିତିଜ ସିଙ୍ଘଲ ନିର୍ଦ୍ଦେଶ ଦେଇଛନ୍ତି। ଏହାସହ ଜିତେନ୍ଦ୍ରଙ୍କ ବିରୋଧରେ ମାମଲା ରୁଜୁ ହୋଇଛି। ଏଥି ସହିତ ସ୍ବାସ୍ଥ୍ୟ ଅଧିକାରୀ କହିଛନ୍ତି ଯେ, ଟିକାକରଣ କରାଯାଇଥିବା ୧୫ ବର୍ଷରୁ ଅଧିକ ବୟସର ୩୯ ପିଲା ନବମ ଶ୍ରେଣୀରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଥିଲେ। ଘଟଣା ପରେ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ସେମାନେ ସମସ୍ତେ ସୁସ୍ଥ ଥିଲେ।
