ନୂଆଦିଲ୍ଲୀ,୪।୯: କମର୍ସିଆଲ ଖୋଇଲା ଖଣି ନିଲାମ ଲାଗି ଜାରି ହୋଇଥିବା ଖଣିଗୁଡିକର ତାଲିକାରେ ସରକାର କିଛିଟା ସଂଶୋଧନ କରିଛନ୍ତି। ନୂଆ ତାଲିକା ମୁତାବକ ୩୮ କୋଇଲା ଖଣି ନିଲାମ ହେବ ବୋଲି କେନ୍ଦ୍ର ସରକାର ଗୁରୁବାର ସୂଚନା ଦେଇଛନ୍ତି। ୪୧ ଖଣି ନିଲାମ କରାଯିବ ବୋଲି କୋଇଲା ମନ୍ତ୍ରଣାଳୟ ପକ୍ଷରୁ ପୂର୍ବରୁ ତାଲିକା ଜାରି କରାଯାଇଥିଲା। ସଂଶୋଧିତ ତାଲିକାରେ ୩ଟି ବ୍ଲକକୁ ଯୋଡା ଯାଇଛି। ତାଲିକାରୁ ୫ଟି ବ୍ଲକକୁ ହଟାଯାଇଥିବା ଜଣାପଡିଛି। ଯୋଡି ହୋଇଥିବା ୩ ବ୍ଲକ ମଧ୍ୟରେ ଡୋଲେସାରା, ଜାରେକେଲା,ଝାରପାଲମ-ତନଗରଘାଟ(ଛତିଶଗଡ) ସାମିଲ କରାଯାଇଛି। ସେହିଭଳି ମୋର୍ଗା ସାଉଥ, ଫତେହପୁର, ମଦନପୁର(ନର୍ଥ), ମୋର୍ଗା-୨ ଏବଂ ଛତିଶଗଡର ସାୟଙ୍ଗ ବ୍ଲକକୁ ତାଲିକାରୁ ହଟାଯାଇଛି।
ଏହା ପୂର୍ବରୁ ମନ୍ତ୍ରଣାଳୟ ମହାରାଷ୍ଟ୍ରର ଚନ୍ଦ୍ରପୁର ଜିଲାସ୍ଥିତ ବାନ୍ଦର କୋଇଲା ଖଣିକୁ ତାଲିକାରୁ ହଟାଇଥିଲା। ପରିବେଶ ପାଇଁ ଏହା ସମ୍ବେଦନଶୀଳ ହୋଇଥିବା କାରଣରୁ ସରକାର ଏଭଳି ପଦକ୍ଷେପ ଗ୍ରହଣ କରିଛନ୍ତି। ସଂଶୋଧନର କାରଣ ସମ୍ପର୍କରେ କୋଇଲା ମନ୍ତ୍ରଣାଳୟ ପକ୍ଷରୁ କିଛି ସ୍ପଷ୍ଟ କରାଯାଇନାହିଁ। ନିଲାମ ହେବାକୁ ଥିବା ଖଣିଗୁଡିକ ମଧ୍ୟରେ ଛତିଶଗଡର ୭ କୋଇଲା ବ୍ଲକ ସାମିଲ ରହିଛି। ସୂଚନା ଯୋଗ୍ୟ, ୪୧ କୋଇଲା ଖଣିର ନିଲାମ ପ୍ରକ୍ରିୟାକୁ କେନ୍ଦ୍ର ସରକାର ୨୦୨୦ ଜୁନ ୧୮ରୁ ଆରମ୍ଭ କରିଥିଲେ।
