ନୂଆଦିଲ୍ଲୀ,୪।୯: ମୋରାଟୋରିୟମ ସମୟ ଅବଧିରେ ସୁଧ ଉପରେ ସୁଧ ଲାଗୁ ପ୍ରସଙ୍ଗ ଉପରେ ଗୁରୁବାର ମଧ୍ୟ ସୁପ୍ରିମକୋର୍ଟ ଶୁଣାଣି କରିଛନ୍ତି। ଯେଉଁ ଗ୍ରାହକଙ୍କ ବ୍ୟାଙ୍କ ଆକାଉଣ୍ଟ ୩୧ ଅଗଷ୍ଟ ପର୍ଯ୍ୟନ୍ତ ଅନାଦାୟ ଋଣ (ଏନ୍ପିଏ) ଘୋଷଣା ହୋଇନାହିଁ, ସେହି ଖାତାଗୁଡିକୁ ମାମଲା ଶୁଣାଣି ହେବା ଶେଷ ଯାଏ ସୁରକ୍ଷା ପ୍ରଦାନ କରାଯିବ। ଏହି ବର୍ଗରେ ଆକାଉଣ୍ଟଗୁଡିକୁ ଶୁଣାଣି ନ ସରିବା ଯାଏ ଏନ୍ପିଏ ଘୋଷଣା ନ କରିବାକୁ ନ୍ୟାୟାଳୟ କହିଛନ୍ତି। ଗ୍ରାହକଙ୍କ ବିରୋଧରେ କୌଣସି କଠୋର କାର୍ଯ୍ୟାନୁଷ୍ଠାନ ନ ନେବାକୁ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି।
ଏହି ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର ୧୦ରେ ହେବ। ସୁପ୍ରିମକୋର୍ଟରେ ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟା ପକ୍ଷ ରଖିଛନ୍ତି। ସୁଧ ଛାଡ କରିବା କଷ୍ଟକର ମାତ୍ର ପେମେଣ୍ଟଜନିତ ଚାପକୁ କମ୍ କରାଯାଇ ପାରିବ ବୋଲି ସେ ନ୍ୟାୟାଳୟଙ୍କୁ କହିଛନ୍ତି। ଦେଶର ବ୍ୟାଙ୍କିଙ୍ଗ୍ କ୍ଷେତ୍ର ଅର୍ଥ ବ୍ୟବସ୍ଥାର ମୂଳ ଆଧାର ହୋଇଥିବା ବେଳେ ଏହା ଦୁର୍ବଳ ହେଲା ଭଳି କୌଣସି ପଦକ୍ଷେପ ସରକାର ନେବେ ନାହିଁ ବୋଲି ସେ ସ୍ପଷ୍ଟ କରିଥିଲେ। ସୂଚନାଯୋଗ୍ୟ ମୋରାଟୋରିୟମ ଏଭଳି ଏକ ସୁବିଧା ଯାହା ଦ୍ୱାରା ଗ୍ରାହକ କିଛି ମାସ ଋଣ କିସ୍ତି ପ୍ରଦାନରୁ ବିରତ ହୋଇପାରିବେ। କରୋନା ଯୋଗୁ ସମସ୍ୟା ସାମ୍ନା କରୁଥିବା ବ୍ୟକ୍ତିବିଶେଷଙ୍କୁ ସୁବିଧା ଦେବା ଲାଗି ରିଜର୍ଭ ବ୍ୟାଙ୍କ ଋଣ ମୋରାଟୋରିୟମ ଘୋଷଣା କରିଥିଲେ। ମାର୍ଚ୍ଚରେ ପ୍ରାଥମିକ ସମୟ ଲାଗି ୩ ମାସ ପୁଣି ଅଗଷ୍ଟ ଶେଷ ଯାଏ ଆଉ ୩ ମାସ ଏହାକୁ ବଢ଼ାଯାଇଥିଲା।
ବର୍ତ୍ତମାନ ମୋରାଟୋରିୟମ ଅବଧିର ୬ ମାସ ଶେଷ ହୋଇଛି। ଏହାକୁ ବଢାଇବା ଲାଗି ଗ୍ରାହକଙ୍କ ପକ୍ଷରୁ ଦାବି କରାଯାଉଛି। ଏହି ଅବଧିରେ ଲାଗୁ ହେଉଥିବା ସୁଧ ଛାଡ କରିବା ଲାଗି ଦାବି ହେଉଛି। କାରଣ ସୁଧ ଉପରେ ସୁଧ ଲାଗୁ କରିବା ବୋଝ ଉପରେ ନଳିତା ବିଡା ବା ଦୋହରା ମାଡ ସଦୃଶ ହେବ। ଏହାକୁ ବିଚାରକରି ବର୍ତ୍ତମାନ ସୁଦ୍ଧା ସୁଧ କିସ୍ତି ଟାଳିବା ଲାଗି ରିଜର୍ଭ ବ୍ୟାଙ୍କ ଅନୁମତି ପ୍ରଦାନ କରିଛି। ଫଳରେ ବକେୟା କିସ୍ତି ଉପରେ ଲାଗୁଥିବା ସୁଧ ପ୍ରଦାନ କରିବାକୁ ପଡୁଥିବା ଜଣାପଡିଛି। ଏହି ମାମଲାର ଚୂଡ଼ାନ୍ତ ଶୁଣାଣି କ’ଣ ହେଉଛି ତାହା ଦେଖିବାକୁ ବାକି ରହିଲା।
