କାଠମାଣ୍ଡୁ, ୭।୬ : ନେପାଳ ସୈନ୍ୟବାହିନୀଙ୍କ ନେତୃତ୍ୱରେ ଏକ ଟିମ ‘ସଫା ହିମାଲ ଅଭିଯାନ -୨୦୨୨’ ସମୟରେ ୩୩.୮ ଟନ ଆବର୍ଜନା ସଂଗ୍ରହ କରିଛନ୍ତି। ଏହି ଅଭିଯାନ ୫ ଏପ୍ରିଲରେ ଆରମ୍ଭ ହୋଇଥିଲା। ୨୦୧୯ରେ ଆରମ୍ଭ ହୋଇଥିବା ଏହି ଅଭିଯାନ, କରୋନା ମହାମାରୀ ସଂକ୍ରମଣ ଯୋଗୁ ୨୦୨୦ରେ ବନ୍ଦ ହୋଇଯାଇଥିଲା। ଚଳିତ ବର୍ଷ ସଂଗୃହୀତ ହୋଇଥିବା ଆବର୍ଜନା ସର୍ବାଧିକ ବୋଲି କୁହାଯାଉଛି। ଏକ ବିବୃତ୍ତିରେ ସୈନ୍ୟବାହିନୀ କହିଛି ଯେ ୨୦୧୯ ରେ ପ୍ରାୟ ୧୦ ଟନ ଏବଂ ଗତ ୨୦୨୧ ବର୍ଷରେ ୨୭ ଟନ୍ରୁ ଅଧିକ ଆବର୍ଜନା ସଂଗ୍ରହ କରାଯାଇଥିଲା।
ରବିବାର ବିଶ୍ୱ ପରିବେଶ ଦିବସ ଅବସରରେ ‘ସଫା ହିମାଲ ଅଭିଯାନ ୨୦୨୨’ ସମାପ୍ତ ହୋଇଛି। ନେପାଳ ସେନା ଏବଂ ଶେର୍ପାଙ୍କର ଏକ ମିଳିତ ଦଳ ମାଉଣ୍ଟ ଏଭରେଷ୍ଟ, ଲୋହତ୍ସେ, କାଞ୍ଚନଜଙ୍ଘା ଏବଂ ମାନସଲୁରୁ ୩୩,୮୭୭ କିଲୋଗ୍ରାମ ଅଳିଆ ଆବର୍ଜନା ସଂଗ୍ରହ କରିଛନ୍ତି ।
୩୦ ସେନା କର୍ମଚାରୀ ଏବଂ ୪୮ ଶେର୍ପାଙ୍କ ଏକ ଟିମ ଏହି ସ୍ବଚ୍ଛତା ଡ୍ରାଇଭରେ ନିୟୋଜିତ ଥିଲେ । ଏହି ଟିମ୍ରେ ୪ ଜଣ ଡାକ୍ତର ମଧ୍ୟ ସାମିଲ ହୋଇଥିଲେ। ରବିବାର ଅଭିଯାନ ଶେଷ ହେବା ପରେ ଦଳ ନେପାଳର ସେନା ମୁଖ୍ୟ ପ୍ରଭାସ ରାମ ଶର୍ମାଙ୍କୁ ପତାକା ହସ୍ତାନ୍ତର କରିଛନ୍ତି।
ସେନା ମୁଖ୍ୟ ଶର୍ମା କହିଛନ୍ତି ଯେ ପରିବେଶର ଅବନତି ହେବାରେ ଲାଗିଛି। ଏପରିସ୍ଥଳେ ପରିବେଶରେ ସନ୍ତୁଳନ ବଜାୟ ରଖିବା ମଣିଷର ସର୍ବୋଚ୍ଚ କର୍ତ୍ତବ୍ୟ।
ଏହି ବିବୃତ୍ତିରେ କୁହାଯାଇଛି ଯେ ପର୍ବତରୁ ପୁନଃପ୍ରକ୍ରିୟା କରଣ ହେଉଥିବା ଏବଂ ପୁନଃପ୍ରକ୍ରିୟାକରଣ ହେଉ ନଥିବା ଦୁଇ ପ୍ରକାରର ଆବର୍ଜନା ସଂଗ୍ରହ କରାଯାଇଥିଲା । ବର୍ଜ୍ୟବସ୍ତୁକୁ ପୃଥକ ଭାବରେ ପ୍ରକ୍ରିୟା କରଣ କରାଯାଉଥିଲା ଏବଂ କିଛି ବର୍ଜ୍ୟବସ୍ତୁର ବର୍ତ୍ତମାନ ମଧ୍ୟ ପ୍ରକ୍ରିୟା କରଣ ହେଉଛି ।
ବିବୃତ୍ତିରେ କୁହାଯାଇଛି ଯେ ମାଉଣ୍ଟ ଏଭରେଷ୍ଟ ଏବଂ ଲୋହତ୍ସେର ଶିଖରକୁ ସଫା କରିବା ଲାଗି ୫୫ ଦିନ ଲାଗି ଥିଲା। ସେହିପରି କାଞ୍ଚନଜଙ୍ଘା ଏବଂ ମାନସଲୁର ସଫା ପାଇଁ ଯଥାକ୍ରମେ ୪୪ ଏବଂ ୪୩ ଦିନ ସମୟ ଲାଗିଛି। ଏହି ଅଭିଯାନର ତୃତୀୟ ପର୍ଯ୍ୟାୟରେ କାଞ୍ଚନଜଙ୍ଘାଠାରେ ଦୁଇଟି ମାନବ କଙ୍କାଳ ମଧ୍ୟ ମିଳିଥିଲା। ସେନା ପକ୍ଷରୁ କୁହାଯାଇଛି ଯେ ଜୈବ ଡିଗ୍ରେଡେବଲ ବର୍ଜ୍ୟବସ୍ତୁ ସମ୍ପୃକ୍ତ ସ୍ଥାନୀୟ ସରକାରଙ୍କୁ ହସ୍ତାନ୍ତର କରାଯାଇଥିବାବେଳେ ଅଣ-ଜୈବ ଡିଗ୍ରେଡେବଲ ବର୍ଜ୍ୟବସ୍ତୁ ପୁନଃବ୍ୟବହାର ପାଇଁ ବିଭିନ୍ନ ସଂଗଠନକୁ ଦିଆଯାଇଥିଲା। କିଛି ବର୍ଜ୍ୟବସ୍ତୁ ଏପର୍ଯ୍ୟନ୍ତ ହସ୍ତାନ୍ତର କରାଯାଇ ନାହିଁ।
ମାଇଁ ରିପବ୍ଲିକା ଖବରକାଗଜ ରିପୋର୍ଟ କରିଛି ଯେ ପର୍ଯ୍ୟଟନ ବିଭାଗର ମହାନିର୍ଦ୍ଦେଶକ ତାରାନାଥ ଅଧିକାରୀ କହିଛନ୍ତି ଯେ ପର୍ବତ ଶିଖରଗୁଡିକର ସୁରକ୍ଷା ତଥା ପରିଷ୍କାର କରିବା ପାଇଁ ଏକ ପୃଥକ ବାଟାଲିୟନ କିମ୍ବା କମ୍ପାନୀର ଆବଶ୍ୟକତା ରହିଛି।
