ନୂଆଦିଲ୍ଲୀ,୫ା୯: ଭାରତରେ କ୍ଷୀର ଦରବୃଦ୍ଧି ଯୋଗୁ ଏହାର ବ୍ୟବହାର କେତେ ପ୍ରଭାବିତ ହୋଇଛି ସେନେଇ କମ୍ୟୁନିଟି ସୋସିଆଲ ମିଡିଆ ପ୍ଲାଟଫର୍ମ ଲୋକାଲ ସର୍କଲ୍ସ ପକ୍ଷରୁ ଏକ ସର୍ବେକ୍ଷଣ କରାଯାଇଛି। ପ୍ରତି ୩ରେ ଗୋଟିଏ ପରିବାର କ୍ଷୀର ବ୍ୟବହାର କମାଇଦେଇଛନ୍ତି ବୋଲି ଏହି ସର୍ଭେରୁ ଜଣାପଡ଼ିଛି। ଦେଶର ୩୧୧ ଜିଲାରେ କରାଯାଇଥିବା ଏହି ସର୍ବେକ୍ଷଣରେ ୨୧,୦୦୦ ଲୋକଙ୍କୁ ସାମିଲ କରାଯାଇଥିଲା, ଯାହାଙ୍କ ମଧ୍ୟରୁ ୬୯% ହେଉଛନ୍ତି ପୁରୁଷ। ୪୧% ଲୋକ ଟିୟର ୧ ଜିଲାର ହୋଇଥିବାବେଳେ ୩୪% ଟିୟର ୨ ଏବଂ ୨୫% ଟିୟର ୩ , ୪ ଓ ଗ୍ରାମାଞ୍ଚଳ ଜିଲାର ବାସିନ୍ଦା।
ଅଧିକାଂଶ ଭାରତୀୟ ପରିବାରରେ କ୍ଷୀର ଏବଂ ଦହି, ଲହୁଣି, ଘିଅ ଓ ବଟର୍ ମିଲ୍କ ଭଳି ଦୁଗ୍ଧଜାତ ସାମଗ୍ରୀ ବ୍ୟବହୃତ ହୋଇଥାଏ। ଭାରତ କେବଳ ସର୍ବାଧିକ ଦୁଗ୍ଧ ଉତ୍ପାଦନକାରୀ ଦେଶ ନୁହେଁ, ବରଂ ଏହାର ବ୍ୟବହାର କ୍ଷେତ୍ରରେ ମଧ୍ୟ ଅନ୍ୟ ରାଷ୍ଟ୍ରଗୁଡ଼ିକଠାରୁ ଆଗରେ ରହିଥିବା ଆମେରିକାର କୃଷି ବିଭାଗ (ୟୁଏସ୍ଡିଏ) ପକ୍ଷରୁ ପ୍ରକାଶିତ ‘ଡେଏରି ଆଣ୍ଡ ପ୍ରଡକ୍ଟସ୍ ଆନୁଆଲ୍ ରିପୋର୍ଟ-୨୦୨୧’ରେ ଉଲ୍ଲେଖ କରାଯାଇଛି। ମୁଦ୍ରାସ୍ଫୀତି ଯୋଗୁ ଭାରତୀୟ ଉପଭୋକ୍ତା ହନ୍ତସନ୍ତ ହେଉଥିବାବେଳେ ଦରଦାମ ନିୟନ୍ତ୍ରଣରେ କ୍ରମଶଃ ଲଗାମ ଲଗାଯାଉଥିବା ନେଇ କେନ୍ଦ୍ର ସରକାରଙ୍କ ତଥ୍ୟ କହୁଛି। ତେବେ ଅଗଷ୍ଟ ୧୭ ପରଠାରୁ ଦେଶର ଦୁଗ୍ଧ ସମବାୟଗୁଡ଼ିକ ପକ୍ଷରୁ କ୍ଷୀର ଲିଟର ପିଛା ୨ ଟଙ୍କା ବୃଦ୍ଧି କରାଯିବା ଖାଉଟିଙ୍କ ପାଇଁ ନିଶ୍ଚିତ ଭାବେ ଏକ ଖରାପ ଖବର। ଏହା ପୂର୍ବରୁ ମାର୍ଚ୍ଚରେ ଅମୂଲ ଭଳି ଦୁଗ୍ଧ ଓ ଦୁଗ୍ଧଜାତ ସାମଗ୍ରୀ ଉତ୍ପାଦନକାରୀ ବ୍ରାଣ୍ଡ୍ଗୁଡ଼ିକ କ୍ଷୀର ଲିଟର ପିଛା ୨ ଟଙ୍କା ବଢ଼ାଇଥିଲେ। ଏହି ଦରବୃଦ୍ଧି ଯୋଗୁ ୬୮% ଉପଭୋକ୍ତା ସମାନ ପରିମାଣ ଓ ବ୍ରାଣ୍ଡ୍ର କ୍ଷୀର ପାଇଁ ପୂର୍ବାପେକ୍ଷା ଅଧିକ ଟଙ୍କା ଦେଉଥିବା ସର୍ବେକ୍ଷଣ ବେଳେ କହିଛନ୍ତି। ଅନ୍ୟପକ୍ଷେ ୧୦,୬୮୫ ଜଣଙ୍କ ମଧ୍ୟରୁ ୬% ଲୋକ ଏଥିଲାଗି ବ୍ରାଣ୍ଡ୍ ବଦଳାଇଛନ୍ତି ଅଥବା ଅପେକ୍ଷାକୃତ କମ୍ ଦାମ୍ରେ ମିଳୁଥିବା କ୍ଷୀର କିଣିବାକୁ ବାଧ୍ୟ ହୋଇଥିବା ମାନିଛନ୍ତି। ଅନ୍ୟ ୪% ଲୋକ ସମାନ ବ୍ରାଣ୍ଡ୍ର ଶସ୍ତା ବିକଳ୍ପ ଆପଣାଇଛନ୍ତି। କୌଣସି ଉତ୍ତରଦାତା କ୍ଷୀର କିଣିବା ବନ୍ଦ କରିଦେଇଥିବା ମାନିନାହାନ୍ତି। ତେବେ ୨୦% ଲୋକ ପୂର୍ବ ତୁଳନାରେ ପରିମାଣ ହ୍ରାସ କରିଥିବା କହିଛନ୍ତି। ଘରେ ବ୍ୟବହାର ପାଇଁ ଅଧିକାଂଶ ସମୟରେ କେଉଁ ଧରଣର କ୍ଷୀର କିଣୁଛନ୍ତି ବୋଲି ୧୦,୫୨୨ ଜଣଙ୍କୁ ସର୍ବେକ୍ଷଣକାରୀ ସଂସ୍ଥା ପକ୍ଷରୁ ପ୍ରଶ୍ନ କରାଯାଇଥିଲା। ୭୨% ଲୋକ ପ୍ଲାଷ୍ଟିକ୍ ପାଉଚ୍ ପ୍ୟାକେଟରେ ଉପଲବ୍ଧ ୫୦୦ ମିଲି ଲିଟର କିମ୍ବା ୧ ଲିଟର କ୍ଷୀର କିଣୁଥିବା କହିଥିଲେ। ସେହିପରି ୧୪% ଉପଭୋକ୍ତା ସ୍ଥାନୀୟ ବିକ୍ରେତାଙ୍କଠାରୁ ଖୋଲାରେ କ୍ଷୀର କିଣୁଥିବା ଉତ୍ତର ଦେଇଥିଲେ। ମାତ୍ର ୨% ଲୋକ ଅଧିକ ସମୟ ରହିପାରୁଥିବା ଟେଟ୍ରା ପ୍ୟାକ୍ ମିଲ୍କ କିଣୁଥିବା ନେଇ କହିଥିଲେ।
