ଭଞ୍ଜନଗର,୨୬।୬(ଡି.ଏନ.ଏ): ଭଞ୍ଜନଗର ଷ୍ଟେଟ ବ୍ୟାଙ୍କ ମୁଖ୍ୟ ଶାଖାରେ ଅନ୍ଲାଇନ ଠକେଇ ଦିନକୁ ଦିନ ବଢ଼ିବାରେ ଲାଗିଛି। ଶୁକ୍ରବାର ପୂର୍ବାହ୍ନରେ ସ୍ଥାନୀୟ କବିସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ଛାତ୍ର ରବି ଜେନାଙ୍କ ପାଖକୁ ଏକ ଫୋନ୍ କଲ୍ ଆସିଥିଲା। ରବି ଫୋନ୍ ଉଠାଇ କିଛି ସେକେଣ୍ଡ କଥା ହେବା ପରେ ତାଙ୍କ ଆକାଉଣ୍ଟରୁ ଟଙ୍କା କଟିଯାଇଥିଲା। ଏହାପରେ ପୁଣି ଦୁର୍ବୃତ୍ତମାନେ କେଉଁଭଳି ପରିସ୍ଥିତିରେ ରବି ଆକାଉଣ୍ଟରୁ ୩୨ ହଜାର ଟଙ୍କା ଉଠାଇ ନେଇଥିଲେ। ଏ ନେଇ ରବି ଜାଣିବା ପରେ ଶନିବାର ବ୍ୟାଙ୍କ ଏବଂ ଭଞ୍ଜନଗର ଥାନାରେ ଘଟଣା ସମ୍ପର୍କରେ ଜଣାଇଥିଲେ। କିନ୍ତୁ ଉଭୟ ସ୍ଥାନରୁ କୌଣସି ସନ୍ତୋଷଜନକ ଉତ୍ତର ମିଳି ନ ଥିଲା। ତେଣୁ ରବି କଟକ ଯାଇ ଘଟଣା ସମ୍ପର୍କରେ ଅଭିଯୋଗ କରିବା ପାଇଁ ପ୍ରସ୍ତୁତ ହେଉଛନ୍ତି। ରବିଙ୍କ ଆକାଉଣ୍ଟରୁ ସମସ୍ତ ଟଙ୍କା କିଭଳି ଗାଏବ ହୋଇଗଲା ତାହାକୁ ନେଇ ଅନ୍ୟ ଛାତ୍ରୀଛାତ୍ର ମଧ୍ୟ ନିଜ ଟଙ୍କା ସୁରକ୍ଷା ନେଇ ଚିନ୍ତିତ ହୋଇପଡ଼ିଛନ୍ତି। ଦୁର୍ବୃତ୍ତ ଜଣଙ୍କ ରବି ସହ କଥା ହୋଇଥିଲେ। ଉକ୍ତ ଫୋନ ନମ୍ବରଟି ମଧ୍ୟ ଓଡିଶାର ହୋଇଥିବା ଅନୁମାନ କରାଯାଉଛି। ଦୁର୍ବୃତ୍ତ ଜଣଙ୍କ ଓଡ଼ିଆରେ କଥା ହେଉଥିଲେ। ରବି କୌଣସି ପାସ୍ୱାର୍ଡ ନମ୍ବର ଦେଇନାହାନ୍ତି ତଥାପି ଟଙ୍କା କିଭଳି କଟିଲା ତାହାକୁ ନେଇ ଲୋକେ ଚିନ୍ତିତ ହୋଇପଡ଼ିଛନ୍ତି। ଏହିଭଳି ପରିସ୍ଥିତିରେ ଠକ ଜଣଙ୍କ ପୁଣି ଶନିବାର ସେହି ପୁରୁଣା ଫୋନ୍ ନମ୍ବରରୁ ହିଁ ରବିଙ୍କୁ ଫୋନ କରି ଆଉ ୫ ହଜାର ଟଙ୍କା ଆକାଉଣ୍ଟରେ ଡିପୋଜିଟ କରିବାକୁ କହିଥିଲେ। ରବିଙ୍କ ସନ୍ଦେହ ବଢ଼ିବାରୁ ଭଞ୍ଜନଗର ପୋଲିସକୁ ଘଟଣା ସମ୍ପର୍କରେ ସୂଚନା ଦେଇଛନ୍ତି।
